Kotia: ରାଜ୍ୟ ସରକାରଙ୍କ ଫୋକସରେ ଏବେ କୋଟିଆ, ଗଠନ ହେଲା ସ୍ଵତନ୍ତ୍ର ଟାସ୍କ ଫୋର୍ସ

Kotia: କୋଟିଆକୁ ନେଇ ଓଡ଼ିଶା ଓ ଆନ୍ଧ୍ର ମଧ୍ୟରେ ବହୁ ବାଦ ବିବାଦ ଲାଗି ରହିଛି। ଆନ୍ଧ୍ର ବାରମ୍ବାର କୋଟିଆ ଭିତରେ ପ୍ରବେଶ କରି ଲୋକଙ୍କୁ ବିଭିନ୍ନ ଯୋଜନାରେ ସାମିଲ କରି ସେମାନଙ୍କୁ ଆନ୍ଧ୍ର ପ୍ରତି ଆକୃଷ୍ଟ କରିବାର ପ୍ରଚେଷ୍ଟା ଜାରି ରଖିଛି। ତେବେ କିଛି ଦିନ ତଳେ କୋଟିଆ ପଞ୍ଚାୟତର ୪/୫ ଖଣ୍ଡ ଗ୍ରାମର ଲୋକେ ଆନ୍ଧ୍ରର ଶରଣ ପଶିବା ସହିତ ଓଡ଼ିଶା ସରକାରଙ୍କ ଦ୍ୱାରା କିଛି ସୁବିଧା ସୁଯୋଗକୁ ପ୍ରତ୍ୟାଖାନ କରିଥିଲେ। ଏପରି ସ୍ଥିତିରେ ବର୍ତ୍ତମାନର ସରକାର କମିଟି ଗଠନ କରିଛନ୍ତି। ଆଉ ଏହି କମିଟି ପରିବର୍ତ୍ତନ ଦିଗରେ କାମ କରିବେ ବୋଲି ଆଶା କରା ଯାଉଛି।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିର୍ଦେଶରେ ରାଜସ୍ବ ମନ୍ତ୍ରୀ ସୁରେଶ ପୁଜାରୀଙ୍କ ଅଧ୍ୟକ୍ଷତାରେ ଗଠନ ହୋଇଛି କମିଟି। ୧୬ ଜଣକୁ ନେଇ ଗଠିତ କମିଟିରେ ଅତିରିକ୍ତ ମୁଖ୍ୟ ଶାସନସଚିବ ରାଜସ୍ବ ବିଭାଗ, ଅତିରିକ୍ତ ମୁଖ୍ୟ ଶାସନସଚିବ ଗୃହ ବିଭାଗ, ପ୍ରମୁଖ ଶାସନସଚିବ ଅନୁସୂଚିତ ଜାତି ଓ ଜନଜାତି,ଗ୍ରାମ୍ୟ ଉନ୍ନୟନ ବିଭାଗ ସଚିବ,ଶ୍ରମ ଓ କର୍ମ ନିଯୁକ୍ତି ବିଭାଗ ସଚିବ, ଖାଦ୍ୟ ଓ ଯୋଗାଣ ବିଭାଗ ସଚିବ,ଓଡିଆ ଭାଷା ଓ ସାହିତ୍ୟ ସଂସ୍କୃତି ବିଭାଗ ସଚିବ,ଆଇନ ବିଭାଗ ସଚିବ, ବିଦ୍ୟାଳୟ ଓ ଗଣ ଶିକ୍ଷା ବିଭାଗର ସଚିବ, ପଞ୍ଚାୟତିରାଜ ପାନୀୟ ଜଳ ବିଭାଗ ସଚିବ, ସ୍ଵାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସଚିବ, ଦକ୍ଷିଣାଞ୍ଚଳ ରାଜସ୍ବ କମିଶନର,ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ସହ କୋରାପୁଟ ଜିଲ୍ଲାପାଳ ଓ ଏସପି ରହିଛନ୍ତି।

କମିଟି ଆସନ୍ତା ଦିନରେ କୋଟିଆରେ ଚାଲୁଥିବା ଉନ୍ନୟନମୂଳକ କାର୍ଯ୍ୟ, ଶିକ୍ଷା, ସ୍ଵାସ୍ଥ୍ୟ ଗମନାଗମନର ସ୍ଥିତି ଅନୁଧ୍ୟାନ କରିବେ। କୋଟିଆରେ ଓଡିଆ ଅସ୍ମିତାକୁ ନେଇ କାର୍ଯ୍ୟ କରିବ କମିଟି। ଓଡ଼ିଶା ମାଟିରେ ପିଲା ତେଲୁଗୁ ବଦଳରେ ପଢ଼ିବେ ଓଡିଆ । ଯାହାକୁ ନେଇ କମିଟି କାମ କରିବ।କୋଟିଆର ବିକାଶକୁ ନେଇ ରାଜ୍ୟ ସରକାର ନେଇଛନ୍ତି ସ୍ଵତନ୍ତ୍ର ପଦକ୍ଷେପ। ରାଜ୍ୟ ସରକାରଙ୍କ ଦ୍ୱାରା ଏହି କମିଟି କେବେ କୋଟିଆ ଗସ୍ତ କରିବେ? ଏବଂ କୋଟିଆ ର ଉନ୍ନତି ସହିତ ଲୋକଙ୍କୁ ଓଡ଼ିଶା ପ୍ରତି ଆକୃଷ୍ଟ କରିବା ପାଇଁ କି ପ୍ରକାର ପଦକ୍ଷେପ ନେବେ ଏବେ ତାହାକୁ ଅପେକ୍ଷା।