Top 10 News Today: ବିଜେପିରେ ଯୋଗଦେଲେ ପ୍ରଶାନ୍ତ, ପଢନ୍ତୁ ଅପରାହ୍ଣର ୧୦ ବଡ଼ ଖବର

H1.ବିଜେପିରେ ମିଶିଲେ ପ୍ରଶାନ୍ତ ଜଗଦ୍ଦେବ
ବିଜେପିରେ ଯୋଗ ଦେଲେ ଚିଲିକା ବିଧାୟକ ପ୍ରଶାନ୍ତ ଜଗଦେବ । ବିଜେପି ରାଜ୍ୟ କାର୍ଯ୍ୟାଳୟରେ ପହଞ୍ଚି  ମିଶ୍ରଣ ପର୍ବରେ ଯୋଗଦେଲେ । ଏହି କାର୍ଯ୍ୟକ୍ରମରେ ବିଜେପିର ଅନେକ ବରିଷ୍ଠ ନେତାଗଣ ଉପସ୍ଥିତ ଥିଲେ । ପ୍ରଶାନ୍ତଙ୍କ ସହ ଅନେକ କର୍ମୀ ବିଜେପିରେ ହେଲେ ସାମିଲ । ବିଜେପି ସହପ୍ରଭାରୀ ଲତାଉସେଣ୍ଡି ଉପସ୍ଥିତ ଥିଲେ । 

H2.୫ରେ ଓଡ଼ିଶା ଆସିବେ ପ୍ରଧାନମନ୍ତ୍ରୀ
ମାର୍ଚ୍ଚ ୫ରେ ଓଡ଼ିଶା ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପ୍ରଧାନମନ୍ତ୍ରୀ ଆସିବା ନେଇ ସହପ୍ରଭାରୀ ଲତା ଉସେଣ୍ଡି ସୂଚନା ଦେଇଛନ୍ତି । ପ୍ରଧାନମନ୍ତ୍ରୀଙ୍କର ଯାଜପୁର ଗସ୍ତ କାର୍ଯ୍ୟକ୍ରମ ରହିଛି । ଯାଜପୁରର ଚଣ୍ଡିଖୋଲରେ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମ ରହିଥିବା ସୂଚନା ଦିଆଯାଇଛି ।

H3.ଆଜିଠୁ ବଢିବ ତାତି
ଆଜିଠାରୁ ରାଜ୍ୟରେ ଗରମ ବଢ଼ିବା ଆଶଙ୍କା କରାଯାଇଛି। ୩ରୁ ୪ ଦିନ ଏପରି ଗରମ ପାଗ ଅନୁଭୂତ ହେବ। ମାର୍ଚ୍ଚ ୪ ତାରିଖ ବେଳକୁ ଆଭ୍ୟନ୍ତରୀଣ ଓଡ଼ିଶାରେ ବର୍ଷା ସମ୍ଭାବନା ଥିଲେ ମଧ୍ୟ ତାହା ତାପମାତ୍ରା ଉପରେ ପ୍ରଭାବ ପକାଇବ ନାହିଁ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି।

H4.କେନ୍ଦୁଝରରେ ରାଷ୍ଟ୍ରପତି
ଓଡ଼ିଶା ଗସ୍ତର ଦ୍ଵିତୀୟ ଦିନରେ କେନ୍ଦୁଝରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଗୋନାସିକାର କଦଳୀବାଡ଼ି ଗାଁରେ ପହଞ୍ଚି ରାଷ୍ଟ୍ରପତି ଜୁଆଙ୍ଗ ଜନଜାତିଙ୍କ ସହ ଆଲୋଚନା କରିଛନ୍ତି। ଜନଜାତିଙ୍କ ଆର୍ଥିକ ବିକାଶ ସହ ସ୍ୱାବଲମ୍ବୀ ଉପରେ ଗୁରୁତ୍ୱ ଦିଆଯିବ ବୋଲି ରାଷ୍ଟ୍ରପତି କହିଛନ୍ତି। ଏହାସହ ରାଷ୍ଟ୍ରପତି କହିଛନ୍ତି ଯେ ଦେଶ, ସମାଜ, ଘରର ଉନ୍ନତି ପାଇଁ ପୁରୁଷ ଓ ମହିଳାଙ୍କ ଉନ୍ନତି ଆବଶ୍ୟକ। ଶିକ୍ଷା ହିଁ ଜୀବନକୁ ଭଲ ଭାବରେ ବଞ୍ଚିବାର ମାର୍ଗ ଦେଖାଏ। ଯେତେ କଠିନ ପରିସ୍ଥିତି ହେଲେ ମଧ୍ୟ ପାଠ ପଢ଼ା ଜାରି ରଖିବା ନିହାତି ଜରୁରୀ। ସେହିପରି ଅଧାରୁ ପାଠ ଛାଡ଼ିଥିବା ପିଲାଙ୍କୁ ଚିହ୍ନଟ କରି ତାଲିମ ଦିଆଯାଉ ଏବଂ ତାଲିମ ପରେ ଆର୍ଥିକ ସହାୟତା ପ୍ରଦାନ କରି ସ୍ୱାବଲମ୍ବୀ କରାଯାଉ ବୋଲି ରାଷ୍ଟ୍ରପତି କହିଛନ୍ତି।

H5.ରତ୍ନଭଣ୍ଡାରର ଲେଜର ସ୍କାନିଂ ରିପୋର୍ଟ ଉପସ୍ଥାପିତ
ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଆରମ୍ଭ ହେଲା ପରିଚାଳନା କମିଟି ବୈଠକ। ଶ୍ରୀଜଗନ୍ନାଥ ମନ୍ଦିର ପ୍ରଶାସନ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହେଉଛି। ଏଥିରେ ନୂତନ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟ ନିର୍ମାଣ, ଶ୍ରୀଜଗନ୍ନାଥ ଅଭ୍ୟର୍ଥନା କକ୍ଷ ନିର୍ମାଣ, ରଘୁନନ୍ଦନ ଲାଇବ୍ରରୀ ଓ ସାଂସ୍କୃତିକ କେନ୍ଦ୍ର ନିର୍ମାଣ ସମ୍ପର୍କରେ ବିସ୍ତୃତ ଭାବରେ ଆଲୋଚନା କରାଯିବ। ତେବେ ରତ୍ନଭଣ୍ଡାରର ବାହାରପଟ ଲେଜର ସ୍କାନିଂର ରିପୋର୍ଟ ଏ ଏସ୍ ଆଇ ତରଫରୁ ଉପସ୍ଥାପିତ କରାଯାଇଛି। ଏଥିସହ ରତ୍ନଭଣ୍ଡାର ମରାମତି ସମ୍ପର୍କରେ ଆଲୋଚନା କରାଯିବ। ଶ୍ରୀମନ୍ଦିରର ଆଲୋକୀକରଣ ଓ ପ୍ରମୋଦ ଉଦ୍ୟାନର ବିକାଶ ଉପରେ ମଧ୍ୟ।ଆଲୋଚନା କରାଯିବାର କାର୍ଯ୍ୟକ୍ରମ ରହିଛି ଏହା ସହ ପରିଚାଳନା କମିଟିର ଅଧ୍ୟକ୍ଷଙ୍କ ମତ ଅନୁସାରେ ଅନ୍ୟାନ୍ୟ ବିଷୟ ଉପରେ ମଧ୍ୟ ଆଲୋକପାତ କରାଯାଇପାରିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି।

H6.ନିର୍ବାଚନ ଲଢିପାରନ୍ତି ଅକ୍ଷୟ କୁମାର
ନୂଆଦିଲ୍ଲୀର ଲୋକସଭା ଆସନରୁ ନିର୍ବାଚନ ଲଢିପାରନ୍ତି ଅକ୍ଷୟ କୁମାର। ଏବେ ବିଜେପି ଲୋକସଭା ଆସନକୁ ନେଇ ଜୋରଦାର୍ ଚର୍ଚ୍ଚା ହେଉଛି। ଆମ ଆଦମୀ ପାର୍ଟି ସହ କଂଗ୍ରେସର ମେଣ୍ଟ ପରେ ବିଜେପି ଏବେ ପ୍ରତିନିଧିଙ୍କ ନାଁ ସର୍ଟଲିଷ୍ଟ କରୁଛି। ପାର୍ଟିର ନେତାମାନେ ବିଭିନ୍ନ ରାଜ୍ୟରୁ ଆଶାୟୀ ଥିବା ଲୋକଙ୍କ ନାଁ ଏକାଠି କରୁଛି। ଏନେଇ ବହୁତ ବୈଠକ ବି ହୋଇଛି। ସମସ୍ତଙ୍କ ନାଁ ଫାଇନାଲ କରିବାକୁ ଆଜି ମିଟିଂ ହେବ। ଉତ୍ତର ଦିଲ୍ଲୀର ୭ଟି ଲୋକସଭା ଆସନ ପାଇଁ ଦିଲ୍ଲୀ ବିଜେପି ମୁଖ୍ୟ ବିରେନ୍ଦ୍ର ସଚ୍ଚଦେବ ଏବଂ ବାଂସୁରୀ ସ୍ବରାଜଙ୍କ ନାଁ ରହିଛି। ବାଂସୁରୀ ହେଉଛନ୍ତି ନୂର୍ବତନ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ବରାଜଙ୍କ ଝିଅ। ବଲିଉଡ ସୁପରଷ୍ଟାର ଅକ୍ଷୟ କୁମାରଙ୍କ ନାଁ ବି ରେସରେ ରହିଛି । ଆଗାମୀ କିଛି ଦିନ ମଧ୍ୟରେ ପ୍ରାର୍ଥୀଙ୍କ ନାଁ ଘୋଷଣା ହୋଇପାରେ।

H7.ନବୀନ ଠାରୁ ଅଧିକ ଶକ୍ତିଶାଳୀ ଅଶ୍ୱିନୀ
ଯେଉଁ ନବୀନ ପଟ୍ଟନାୟକଙ୍କ ସହଯୋଗରେ ସେ ନିଜର ସାଂସଦ ପଦବୀ ବଜାୟ ରଖିପାରିଲେ ତାଙ୍କଠୁ ବି ସେ ଶକ୍ତିଶାଳୀ ସାବ୍ୟସ୍ତ ହୋଇଛନ୍ତି। ଇଣ୍ଡିଆନ୍‍ ଏକ୍ସପ୍ରେସ୍‍ ପକ୍ଷରୁ ପ୍ରକାଶିତ ଶକ୍ତିଶାଳୀ ୧୦୦ ତାଲିକାରେ ନବୀନଙ୍କଠୁ ଢେର ଉପରେ ରହିଛନ୍ତି ଅଶ୍ୱିନୀ ବୈଷ୍ଣବ ଏବଂ ଧର୍ମେନ୍ଦ୍ର ପ୍ରଧାନ। ରେଳ ଏବଂ ଆଇଟି ମନ୍ତ୍ରୀ ଶ୍ରୀ ବୈଷ୍ଣବଙ୍କୁ ଏହି ତାଲିକାରେ ୧୩ତମ  ସ୍ଥାନ ମିଳିଥିବା ବେଳେ ୩୩ ତମ ସ୍ଥାନରେ ରହିଛନ୍ତି ଶିକ୍ଷାମନ୍ତ୍ରୀ ଶ୍ରୀ ପ୍ରଧାନ। କିନ୍ତୁ ମୁଖ୍ୟମନ୍ତ୍ରୀ ନବୀନଙ୍କୁ ଏହି ତାଲିକାରେ ୫୨ତମ ସ୍ଥାନ ମିଳିଛି। ଏପରିକି ତାଙ୍କ ସ୍ଥାନ ମମତା ବାନାର୍ଜୀଙ୍କଠାରୁ ବି ତଳକୁ ଖସି ଆସିଛି।

H8.ଆନ୍ଦୋଳନରତ ଚାଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବ ହରିଆଣା ପୋଲିସ
କୃଷକ ଆନ୍ଦୋଳନରେ ଉତ୍ତଜନା, ହିଂସା ସୃଷ୍ଟି କରି ସରକାରୀ ସମ୍ପତ୍ତି ନଷ୍ଟ କରୁଥିବା ବ୍ୟକ୍ତିଙ୍କ ବିରୁଦ୍ଧରେ ଶକ୍ତ ହୋଇଛି ହରିୟାଣା ପୁଲିସ। ଏହିଭଳି ନେତା ବା କର୍ମୀଙ୍କ ପାସ୍ପୋସର୍ଟ ଓ ଭିସା ବାତିଲ କରିବାକୁ ପାଇଁ ପୁଲିସ ନିଷ୍ପତ୍ତି ନେଇଛି। ପଞ୍ଜାବ ହରିୟାଣା ସୀମାରେ ଘଟୁଥିବା ଏଭଳି ହିଂସାକୁ ରୋକିବା ଲାଗି ପୁଲିସ କଠୋର ହୋଇଛି। ପୁଲିସ କହିଛି ପଞ୍ଜାବରୁ ଏହିଭଳି କିଛି ବ୍ୟକ୍ତି କୃଷକ ସଂଗଠନ ନାଁରେ ହରିୟାଣା ଆସି ହିଂସାତ୍ମକ ଆଚରଣରେ ଲିପ୍ତ ରହିଛନ୍ତି।

H9.ତିରିଷ ବର୍ଷ ପରେ ମୁକୁଳିଲେ ମନୋଜ
ତିରିଶ ବର୍ଷ ଦଣ୍ଡ ପାଇବା ପରେ ନିର୍ଦ୍ଦୋଷରେ ମୁକ୍ତ ହୋଇଛନ୍ତି ଜୀବନର ଅପରାହ୍ଣରେ ଉପନୀତ ହୋଇଥିବା ଜଣେ ଅଭିଯୁକ୍ତ ମନୋଜ ମିଶ୍ର। ୧୯୯୩ର ଏକ ମାମଲାକୁ ମାତ୍ର ୧୦ ମିନିଟରେ ଶୁଣାଣି କରି ସୁପ୍ରିମ୍ କୋର୍ଟ ଏହି ନିଷ୍ପତ୍ତି ନେଇଛନ୍ତି। କୋର୍ଟ କହିଛନ୍ତି, ‘ଫୌଜଦାରୀ ବିଚାର ବ୍ୟବସ୍ଥା ସ୍ୱୟଂ ଏକ ଦଣ୍ଡ, ଯାହା ଏହି ଘଟଣାରେ ସାବ୍ୟସ୍ତ ହୋଇଛି’। ଏହି ଦଣ୍ଡ ଭୋଗ କରିଥିବା ମନୋଜ ମିଶ୍ର। ନିଜ ପତ୍ନୀଙ୍କୁ ଆତ୍ମହତ୍ୟାରେ ସହଯୋଗ କରିଥିବା ବା ଉସକାଇଥିବା ବୋଲି ଅଭିଯୋଗ ହୋଇଥିଲା। ଆଇସିପିର ଧାରା ୩୦୬ ବଳରେ ତାଙ୍କ ବିରୁଦ୍ଧରେ ୧୯୯୩ ମସିହାରେ ମାମଲା ରୁଜ୍ଜୁ ହୋଇଥିଲା। ଯାହାର ସମସ୍ତ ଯନ୍ତ୍ରଣା ମନୋଜ ଭୋଗ କରିଛନ୍ତି ବୋଲି କୋର୍ଟ ଅନୁଭବ କରିଛନ୍ତି। 

H10.ପଞ୍ଚମ ଟେଷ୍ଟ ପାଇଁ ଭାରତୀୟ ଦଳ ଘୋଷଣା
ଭାରତ ଓ ଇଂଲଣ୍ଡ ମଧ୍ୟରେ ଖେଳାଯାଉଥିବା ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଶେଷ ହେବାକୁ ଯାଉଛି। ଏହି ସିରିଜରେ ଭାରତୀୟ ଦଳ ୩-୧ ର ଅଗ୍ରଣୀ ରହିଛି ଏବଂ ବର୍ତ୍ତମାନ ଫାଇନାଲ ମ୍ୟାଚ୍ ୭ ମାର୍ଚ୍ଚରୁ ଧର୍ମଶାଳାରେ ଖେଳାଯିବ। ତେବେ ଏହି ମ୍ୟାଚ୍ ପୂର୍ବରୁ ଗୁରୁବାର ଦିନ ବିସିସିଆଇ ପଞ୍ଚମ ଟେଷ୍ଟ ଦଳ ସହ ଜଡିତ କିଛି ଗୁରୁତ୍ୱପୂର୍ଣ୍ଣ ଅପଡେଟ୍ ସେୟାର କରିଛି। ବୋର୍ଡ କହିଛି ଯେ ବ୍ୟାଟ୍ସମ୍ୟାନ୍ କେ.ଏଲ୍ ରାହୁଲଙ୍କୁ ମଧ୍ୟ ପଞ୍ଚମ ଟେଷ୍ଟରୁ ବାଦ୍ ଦିଆଯାଇଥିବାବେଳେ ୱାଶିଂଟନ୍ ସୁନ୍ଦରଙ୍କୁ ମଧ୍ୟ ଦଳରୁ ରିଲିଜ୍ କରାଯାଇଛି। ଏଥି ସହ ରାଞ୍ଚି ଟେଷ୍ଟରେ ବିଶ୍ରାମ ନେଇଥିବା ଦ୍ରୁତ ବୋଲର ଜସପ୍ରୀତ ବୁମ୍ରା ଦଳକୁ ଫେରିଛନ୍ତି। ପଢନ୍ତୁ ପୂରା ରିପୋର୍ଟ...