TOP 10 News: ଅନୁଭବ-ଜାଗ୍ରତିଙ୍କ ପଡିଲା ହାତଗଣ୍ଠି, ବିଧାନସଭାରୁ ନିଲମ୍ୱିତ ହେଲା କଂଗ୍ରେସ ବିଧାୟକ, ପଢ଼ନ୍ତୁ ୧୦ ବଡ଼ ଖବର

Top 10 News Headlines:ସମସ୍ତ କଳ୍ପନାଜଳ୍ପନାକୁ ଅନ୍ତ ଘଟାଇ ଓଡ଼ିଆ ସୁପରଷ୍ଟାର ତଥା ପୂର୍ବତନ ସାଂସଦ ଅନୁଭବ ମହାନ୍ତି ମଙ୍ଗଳବାର ଦିନ ସାମ୍ବାଦିକ ଏବଂ ଲେଖିକା ଜାଗ୍ରତି ଶୁକ୍ଳାଙ୍କ ସହିତ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ଏଠାରେ ସଂକ୍ଷେପରେ ପଢ଼ନ୍ତୁ ଦିନ ତମାମର ୧୦ଟି ବଡ଼ ଖବର।

Top 10 News Headlines 11 March 2025: H1. Anubhav Mohanty Ties The Knot With Jagrati Shukla: ସମସ୍ତ କଳ୍ପନାଜଳ୍ପନାକୁ ଅନ୍ତ ଘଟାଇ ଓଡ଼ିଆ ସୁପରଷ୍ଟାର ତଥା ପୂର୍ବତନ ସାଂସଦ ଅନୁଭବ ମହାନ୍ତି ମଙ୍ଗଳବାର ଦିନ ସାମ୍ବାଦିକ ଏବଂ ଲେଖିକା ଜାଗ୍ରତି ଶୁକ୍ଳାଙ୍କ ସହିତ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ପରିବାର ସଦସ୍ୟ ଏବଂ ନିକଟ ସମ୍ପର୍କୀୟଙ୍କ ଉପସ୍ଥିତିରେ ରାଜ୍ୟ ବାହାରେ ଏହି ବିବାହ ସମ୍ପନ୍ନ ହୋଇଛି। ବର ଏବଂ କନ୍ୟା ମାଳା ଆଦାନପ୍ରଦାନ କରୁଥିବାର ଅନେକ ଫଟୋ ସୋସିଆଲ ମିଡିଆରେ ମଧ୍ୟ ଭାଇରାଲ୍ ହେଉଛି।

H2. MLA Tara Bahinipati suspended: ବିଧାନସଭା ଗୃହ କାର୍ଯ୍ୟକାଳ ମଧ୍ୟରେ ହାତାହାତି ଏବଂ ଧସ୍ତା ଧସ୍ତି ପରେ ଜୟପୁରର କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କୁ ଓଡ଼ିଶା ବିଧାନସଭାରୁ ସାତ ଦିନ ପାଇଁ ନିଲମ୍ବିତ କରାଯାଇଛି। ଶାସକ ଦଳ ମୁଖ୍ୟ ସଚେତକ ସରୋଜ ପ୍ରଧାନଙ୍କ ପ୍ରସ୍ତାବ ଆଧାରରେ ନିଲମ୍ବନ ପ୍ରସ୍ତାବ ଆଣା ଯାଇଥିଲା ଏବଂ ବାଚସ୍ପତି ସୁରମା ପାଢୀଙ୍କ ଦ୍ୱାରା ଏହାକୁ ଅନୁମୋଦନ କରିଛନ୍ତି।

H3. ARI Sentenced To Four Years: କଟକର ଏକ ଭିଜିଲାନ୍ସ କୋର୍ଟ ଜଣେ ପୂର୍ବତନ ସହକାରୀ ରାଜସ୍ୱ ନିରୀକ୍ଷକଙ୍କୁ ଏକ ଲାଞ୍ଚ ମାମଲାରେ ଦୋଷୀ ସାବ୍ୟସ୍ତ କରି ଚାରି ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ପୂର୍ବତନ ସହକାରୀ ରାଜସ୍ୱ ନିରୀକ୍ଷକ ସୁରେଶ ଚନ୍ଦ୍ର ପ୍ରଧାନଙ୍କୁ ଏକ ମ୍ୟୁଟେସନ୍ ମାମଲା ଆରମ୍ଭ କରିବା ପାଇଁ ଜଣେ ଅଭିଯୋଗକାରୀଙ୍କଠାରୁ ଲାଞ୍ଚ ଦାବି କରିବା ଏବଂ ନେବା ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଥିଲା।

Add Zee News as a Preferred Source

H4. Odisha Weather Update: ଗୁରୁବାରଠାରୁ ଓଡ଼ିଶାର ବିଭିନ୍ନ ଜିଲ୍ଲାରେ ଗ୍ରୀଷ୍ମ ପ୍ରବାହ ସ୍ଥିତି ନେଇ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। ମାର୍ଚ୍ଚ ୧୩ ତାରିଖରେ ବୌଦ୍ଧ, ସୋନପୁର, ବଲାଙ୍ଗିର, ବରଗଡ଼, ସୁନ୍ଦରଗଡ଼, ଝାରସୁଗୁଡ଼ା ଏବଂ ସମ୍ବଲପୁର ଜିଲ୍ଲା ପାଇଁ ଏକ ୟେଲୋ ୱାର୍ଣ୍ଣିଙ୍ଗ ଜାରି କରାଯାଇଛି। ମାର୍ଚ୍ଚ ୧୪ ଏବଂ ୧୫ ରେ ଅନୁଗୁଳ, ବୌଦ୍ଧ, ସୋନେପୁର, ବୋଲାଙ୍ଗୀର, ବରଗଡ, ସୁନ୍ଦରଗଡ, ଝାରସୁଗୁଡା ଓ ସମ୍ବଲପୁର ଜିଲ୍ଲା ପାଇଁ ମଧ୍ୟ ଏଭଳି ସମାନ ଚେତାବନୀ ଦିଆଯାଇଛି।

H5. DMK Reaches Out To BJD: ମଙ୍ଗଳବାର ଦିନ ତାମିଲନାଡୁର ମନ୍ତ୍ରୀ ଟିଆରବି ରାଜା ଏବଂ ସାଂସଦ ଦୟାନିଧି ମାରାନଙ୍କୁ ନେଇ ଗଠିତ ଏକ ଦୁଇ ସଦସ୍ୟ ବିଶିଷ୍ଟ ଡିଏମକେ ପ୍ରତିନିଧିମଣ୍ଡଳୀ ସୀମା ନିର୍ଦ୍ଧାରଣର ବିବାଦୀୟ ପ୍ରସଙ୍ଗ ଉପରେ ଆଲୋଚନା କରିବା ପାଇଁ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ସହ ସାକ୍ଷାତ କରିଛନ୍ତି।

H6. Pakistan Train Hijack News: ପାକିସ୍ତାନର ବେଲୁଚିସ୍ତାନରେ ବାଲୁଚ୍ ଲିବରେସନ୍ ଆର୍ମି (BLA) ଜାଫର ଏକ୍ସପ୍ରେସକୁ ହାଇଜାକ୍ କରିଛି। କେବଳ ଏତିକି ନୁହେଁ, ବାଲୁଚ୍ ସେନା ଟ୍ରେନ୍‌ରେ ଥିବା ୪୫୦ରୁ ଅଧିକ ଯାତ୍ରୀଙ୍କୁ ବନ୍ଧକ ରଖିଛି। ବାଲୁଚ୍ ଲିବରେସନ୍ ଆର୍ମି ସୋସିଆଲ ମିଡିଆରେ ଟ୍ରେନ ହାଇଜାକ୍ ସମ୍ପର୍କରେ ମଧ୍ୟ ସୂଚନା ଦେଇଛି।

H7. Mauritius gave biggest honor to PM Modi: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମରିସସ ସରକାରଙ୍କ ସର୍ବୋଚ୍ଚ ନାଗରିକ ସମ୍ମାନ 'ଦି ଗ୍ରାଣ୍ଡ କମାଣ୍ଡର ଅଫ୍ ଦି ଅର୍ଡର ଅଫ୍ ଦି ଷ୍ଟାର ଆଣ୍ଡ କି ଅଫ୍ ଦି ଇଣ୍ଡିଆନ ଓସେନ' ପ୍ରଦାନ କରାଯାଇଛି। ପ୍ରଧାନମନ୍ତ୍ରୀ ମୋଦି ଏହି ସମ୍ମାନଜନକ ସମ୍ମାନ ପାଇବାରେ ପ୍ରଥମ ଭାରତୀୟ ହୋଇଛନ୍ତି। କହିରଖୁଛୁ ଯେ ଏହା କୌଣସି ଦେଶ ଦ୍ୱାରା ପ୍ରଧାନମନ୍ତ୍ରୀ ମୋଦିଙ୍କୁ ଦିଆଯାଇଥିବା ୨୧ତମ ଆନ୍ତର୍ଜାତୀୟ ସମ୍ମାନ।

H8. Manipur road accident: ମଣିପୁରର ସେନାପତି ଜିଲ୍ଲାର ଚାଙ୍ଗୌବୁଙ୍ଗ ଗାଁରେ ସୁରକ୍ଷା ବାହିନୀକୁ ନେଇ ଯାଉଥିବା ଏକ ଟ୍ରକ୍ ଘାଇକୁ ଖସି ପଡ଼ିଛି। ଏହି ଦୁର୍ଘଟଣାରେ ଅତି କମରେ ତିନି ଜଣ ବିଏସଏଫ କର୍ମଚାରୀଙ୍କ ମୃତ୍ୟୁ ଘଟିଛି ଏବଂ ଅନ୍ୟ ୧୩ ଜଣ ଆହତ ହୋଇଛନ୍ତି। ସୁରକ୍ଷା ଅଧିକାରୀ କହିଛନ୍ତି ଯେ ଦୁଇ ଜଣ ସୀମା ସୁରକ୍ଷା ବାହିନୀ କର୍ମଚାରୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା, ଯେତେବେଳେ ଅନ୍ୟ ଜଣେ ଆହତ ହୋଇ ହସ୍ପିଟାଲକୁ ନିଆଯିବା ସମୟରେ ମୃତ୍ୟୁବରଣ କରିଛନ୍ତି।

H9. Dharmendra Pradhan Lok Sabha: ମଙ୍ଗଳବାର ମଧ୍ୟ ସଂସଦର ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟରେ ପ୍ରବଳ ହଟ୍ଟଗୋଳ ହୋଇଥିଲା। ସୋମବାର ଦିନ ପ୍ରଧାନ ନିଜର ମନ୍ତବ୍ୟ ପ୍ରତ୍ୟାହାର କରିବା ସତ୍ତ୍ୱେ, ମଙ୍ଗଳବାର ଦିନ ଡିଏମକେ ସାଂସଦ କାନିମୋଝିଙ୍କ ନେତୃତ୍ୱରେ ଦଳୀୟ ସାଂସଦମାନେ ନୂତନ ଶିକ୍ଷା ନୀତି ବିରୋଧରେ ସଂସଦରେ ପ୍ରତିବାଦ କରିଥିଲେ। NEPରେ ତିନି ଭାଷା ସୂତ୍ରକୁ ନେଇ ଚାଲିଥିବା ବିବାଦ ମଧ୍ୟରେ ମଙ୍ଗଳବାର କେନ୍ଦ୍ର ଶିକ୍ଷା ମନ୍ତ୍ରୀ ବିରୋଧୀ ଦଳ ଉପରେ ବର୍ଷିଛନ୍ତି।

H10. ICC Chairman Fake PA arrested: ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ICC (ଆନ୍ତର୍ଜାତୀୟ କ୍ରିକେଟ ପରିଷଦ) ଅଧ୍ୟକ୍ଷ ଜୟ ଶାହଙ୍କ ନକଲି ବ୍ୟକ୍ତିଗତ ସଚିବ (PA)ଙ୍କୁ ପୋଲିସ ଗିରଫ କରିଛି। ଏହି ବ୍ୟକ୍ତି ଜଣକ ଜୟ ଶାହଙ୍କ ବ୍ୟକ୍ତିଗତ ସଚିବ ବୋଲି କହି ଗତ କିଛି ଦିନ ଧରି ଏକ ହୋଟେଲରେ ରହୁଥିଲେ ଏବଂ ସେଠାକାର ସୁବିଧାର ସୁଯୋଗ ନେଉଥିଲେ। ଅଭିଯୋଗ ଆଧାରରେ ପୋଲିସ ଏହି ନକଲି ପିଏକୁ ଅଟକ ରଖିଛି।