Top 10 News Today: ଦୀଘା 'ଜଗନ୍ନାଥ ଧାମ'କୁ ନେଇ ମୁହଁ ଖୋଲିଲେ ଶଙ୍କରାଚାର୍ଯ୍ୟ, ଆଜି ଡିଜିଏମଓସ୍ତରୀୟ ଆଲୋଚନା ଓ ସକାଳର ୧୦ ବଡ଼ ଖବର

‘ଜଗନ୍ନାଥ ଧାମ’ କେବଳ ପୁରୀରେ ଅବସ୍ଥିତ: ଗୋବର୍ଦ୍ଧନ ପୀଠ ଶଙ୍କରାଚାର୍ଯ୍ୟ
‘ଜଗନ୍ନାଥ ଧାମ’ କେବଳ ଓଡ଼ିଶାର ପୁରୀରେ ଅବସ୍ଥିତ।ପଶ୍ଚିମବଙ୍ଗର ଦୀଘାରେ ନୂଆ ମନ୍ଦିରକୁ ନେଇ ଚାଲିଥିବା ବିବାଦ ମଧ୍ୟରେ ଗୋବର୍ଦ୍ଧନ ପୀଠ ଶଙ୍କରାଚାର୍ଯ୍ୟ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ରବିବାର ଏନେଇ ସ୍ପଷ୍ଟ କରିଛନ୍ତି। ଗୋବର୍ଦ୍ଧନ ମଠର ଏକ୍ସ ହ୍ୟାଣ୍ଡେଲରେ କୁହାଯାଇଛି ଯେ, “ଉତ୍କଳ ପ୍ରଦେଶରେ ଅବସ୍ଥିତ ଶ୍ରୀ ଜଗନ୍ନାଥପୁରୀ ହେଉଛି ଶ୍ରୀ ଜଗନ୍ନାଥ-ଧାମ। ଏହି ଐତିହ୍ୟ ତଥ୍ୟର ଅନ୍ୟତ୍ର ବ୍ୟବହାର ସମ୍ପୂର୍ଣ୍ଣ ଅନୁପଯୁକ୍ତ।” ଶଙ୍କରାଚାର୍ଯ୍ୟଙ୍କ ଦ୍ୱାରା ପୋଷ୍ଟରେ ପ୍ରକାଶିତ ମତ ଗୁରୁତ୍ୱପୂର୍ଣ୍ଣ। କାରଣ ଏହା ପଶ୍ଚିମବଙ୍ଗ ସରକାରଙ୍କ ଦ୍ୱାରା ଦୀଘାରେ ସମ୍ପ୍ରତି ଉଦଘାଟନ ହୋଇଥିବା ଜଗନ୍ନାଥ ମନ୍ଦିର ପାଇଁ ବ୍ୟବହୃତ ‘ଧାମ’ ଶବ୍ଦକୁ ନେଇ ବିବାଦ ମଧ୍ୟରେ ଏହି ମତ ଆସିଛି।

ଆଜି ଡିଜିଏମଓ ସ୍ତରରେ ଆଲୋଚନା
ଭାରତ ଏବଂ ପାକିସ୍ତାନ ମଧ୍ୟରେ ଚାରି ଦିନ ଧରି ଚାଲିଥିବା ସାମରିକ ସଂଘର୍ଷ ପରେ ରବିବାର ଦିନ ଯୁଦ୍ଧବିରତି କାର୍ଯ୍ୟକାରୀ ହୋଇଛି। ଆଜି ଉଭୟ ଦେଶର ଡିଜିଏମଓମାନେ ଦିନ ୧୨ଟାରେ ଯୁଦ୍ଧବିରତିର ସର୍ତ୍ତାବଳୀ ଏବଂ ଭବିଷ୍ୟତ ରଣନୀତି ସମ୍ପର୍କରେ ଆଲୋଚନା କରିବେ। ଯାହା ପରେ ଜଣାପଡିବ ଯେ ଏହି ଶାନ୍ତି ସ୍ଥାୟୀ ରହିବ ନା ପୁଣି ଉତ୍ତେଜନା ସୃଷ୍ଟି ହେବାର ସମ୍ଭାବନା ରହିବ। ଭାରତ ଏହି ମାମଲାରେ ତୃତୀୟ ପକ୍ଷ ମଧ୍ୟସ୍ଥତାକୁ ପ୍ରତ୍ୟାଖ୍ୟାନ କରିସାରିଛି।

ମୁକାବିଲା ପାଇଁ ଭାରତ ପ୍ରସ୍ତୁତ, ୪୦ ପାକ୍ ସେନା ମରିଛନ୍ତି
ଅପରେସନ ସିନ୍ଦୂର ନେଇ ଭାରତୀୟ ସେନାର ବିସ୍ତୃତ ସୂଚନା । ଆତଙ୍କବାଦ ବିରୋଧରେ ଥିଲା ଅପରେସନ ସିନ୍ଦୂର ଏବଂ ଏହା ଶତ ପ୍ରତିଶତ ସଫଳ ହୋଇଛି । ଏଥିରେ ୧୦୦ରୁ ଅଧିକ ଆତଙ୍କବାଦୀ ନିପାତ ହୋଇଛନ୍ତି । ଏହି ମୃତ ଆତଙ୍କୀ ମଧ୍ୟରେ କୁଖ୍ୟାତ ୟୁସୁଫ ଆଜହର, ଅବଦୁଲ ମଲିକ ରୌଫ୍, ମୁଦାସିର ଅହମ୍ମଦ ରହିଛନ୍ତି । ଏମାନେ କାନ୍ଦାହାର ବିମାନ ଅପହରଣ ଓ ପୁଲୱାମା ଆଟାକରେ ସଂପୃକ୍ତ ଥିଲେ । ପାକିସ୍ତାନ ପଟୁ ଆସିଥିବା ସବୁ ଡ୍ରୋନ ସଫଳତାର ସହ ଖସାଇ ଦେଇଛୁ । ଏଥିରେ ଭାରତର କିଛି କ୍ଷତି ହୋଇନି ବୋଲି ସୂଚନା ଦେଲେ DGAO। 

ଗୁଳିର ଜବାବ ଗୋଳାରେ ଦିଆଯିବ: ମୋଦି
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକାର ଉପରାଷ୍ଟ୍ରପତି ଜେଡି ଭାନ୍ସଙ୍କ ସହ ଆଲୋଚନା କରିଛନ୍ତି । ମୋଦୀ ସ୍ପଷ୍ଟ ଭାବରେ କହିଛନ୍ତି ଯେ, ଯଦି ପାକିସ୍ତାନ କିଛି କରେ ତେବେ ଆମର ଜବାବ ଆହୁରି କଠୋର ହେବ। ପାକିସ୍ତାନ ଭାରତର ୨୬ଟି ସ୍ଥାନରେ ଆକ୍ରମଣ କରିଥିଲା ​​ଏବଂ ଏହାର କଡ଼ା ଜବାବ ଦେଇଥିଲା ଭାରତୀୟ ସେନା। ସେମାନଙ୍କର ଆଡ୍ଡା ଉପରେ ଆକ୍ରମଣ କରାଯାଇଥିଲା। ସୂତ୍ର ଅନୁସାରେ, ମୋଦୀ କହିଥିଲେ ଯେ, କାଶ୍ମୀର ଉପରେ ଆମର ସ୍ଥିତି ବହୁତ ସ୍ପଷ୍ଟ, ଏବେ କେବଳ ଗୋଟିଏ ପ୍ରସଙ୍ଗ ବାକି ଅଛି - ପାକିସ୍ତାନ ଅଧିକୃତ କାଶ୍ମୀର (POK) ଫେରସ୍ତ। ଏହା ବ୍ୟତୀତ ଆଉ କିଛି ନାହିଁ। ଯଦି ସେମାନେ ଆତଙ୍କବାଦୀମାନଙ୍କୁ ହସ୍ତାନ୍ତର କରିବା ବିଷୟରେ କଥା ହୁଅନ୍ତି, ତେବେ ଆମେ ଆଲୋଚନା କରିବୁ। ଅନ୍ୟ କୌଣସି ବିଷୟରେ କଥା ହେବାର ମୋର କୌଣସି ଉଦ୍ଦେଶ୍ୟ ନାହିଁ। ଏ ଘଟଣାରେ ଅନ୍ୟ କେହି ମଧ୍ୟସ୍ଥତା କରନ୍ତୁ ବୋଲି ଆମେ ଚାହୁଁନାହୁଁ।

ଦଇତାପତି ରାମକୃଷ୍ଣ ଦାସମହାପାତ୍ର ନିଲମ୍ବିତ
ଦୀଘା ଦାରୁ ଦିଅଁ ବିବାଦ ଘଟଣାରେ ବରିଷ୍ଠ ସେବାୟତ ରାମକୃଷ୍ଣ ଦାସମହାପାତ୍ର ନିଲମ୍ବିତ । ରାମକୃଷ୍ଣଙ୍କୁ ନିଲମ୍ବନ କଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ । ଶ୍ରୀମନ୍ଦିର ଗରିମା ଓ ମର୍ଯ୍ୟାଦା କ୍ଷୁର୍ଣ୍ଣ କରିଥିବା ଦର୍ଶାଇ ତାଙ୍କ ଉପରେ କାର୍ଯ୍ୟାନୁଷ୍ଠାନ ହୋଇଛି । ରାମକୃଷ୍ଣଙ୍କୁ ୩୦ ଦିନ ପାଇଁ ମହାପ୍ରଭୁଙ୍କ ସେବା ତଥା ଶ୍ରୀମନ୍ଦିରରେ ପ୍ରବେଶ କରିବାକୁ ବାରଣ କରାଯାଇଛି । ନିଲମ୍ବନ ସମୟରେ ସେ କୌଣସି ସେବକଙ୍କୁ ଧମକ ଦେଇ ସେବାପୂଜାରେ ବାଧକ ସାଜିବେନି । ଏପରି କଲେ ନିଲମ୍ବନ ଅବଧି ବୃଦ୍ଧି କରାଯାଇ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ନିର୍ଦ୍ଦେଶ ଦେଇଛନ୍ତି ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ।

ମୋଦୀଙ୍କୁ ଚିଠି ଲେଖିଲେ ବିରୋଧି ଦଳ ନେତା
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରାଜ୍ୟସଭା ଓ ଲୋକସଭା ବିରୋଧୀଦଳ ନେତା ଚିଠି ଲେଖିଛନ୍ତି । ସଂସଦର ସ୍ବତନ୍ତ୍ର ଅଧିବେଶନ ପାଇଁ ଉଭୟେ ନେତା ଚିଠିରେ ଉଲ୍ଲେଖ କରିଛନ୍ତି । ପହଲଗାମ ଆତଙ୍କୀ ଆକ୍ରମଣ ନେଇ ଆଲୋଚନା କରିବାକୁ ଚିଠିରେ ଦାବି କରିଛନ୍ତି । ଅପରେସନ୍‌ ସିନ୍ଦୂର, ଆମେରିକା ପକ୍ଷରୁ ପ୍ରଥମେ ଅସ୍ତ୍ରବିରତି ଏବଂ ଭାରତ ଓ ପାକିସ୍ତାନ ପକ୍ଷରୁ ଅସ୍ତ୍ରବିରତି ଘୋଷଣା କଥା ଚିଠିରେ ଉଲ୍ଲେଖ ରହିଛି । ଏ ସମ୍ପର୍କରେ ଆଲୋଚନା କରିବାକୁ ସ୍ବତନ୍ତ୍ର ଅଧିବେଶନ ଡକାଯାଉ ବୋଲି ଦାବି କରିଛନ୍ତି ।

ରାୟପୁରରେ ଭୟଙ୍କର ଦୁର୍ଘଟଣା: ୧୩ ମୃତ
ସୋମବାର ସକାଳୁ ଏକ ଦୁଃଖଦ ଖବର ସାମ୍ନାକୁ ଆସିଛି। ଛତିଶଗଡ଼ର ସାରାଗାଁର ରାୟପୁର ବଡ଼ୌଲା ବଜାର ରୋଡ୍ ନିକଟରେ ଏକ ମାଲବାହୀ ଗାଡ଼ି ଏବଂ ଏକ ଟ୍ରଲର ମଧ୍ୟରେ ଏକ ଭୟଙ୍କର ଧକ୍କା ହୋଇଥିଲା। ଏହି ଦୁର୍ଘଟଣାରେ ମହିଳା ସମେତ ୧୩ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୪ ଜଣ ଶିଶୁ ଏବଂ ୯ ଜଣ ମହିଳା ଅଛନ୍ତି। ଟ୍ରକ୍ ଏବଂ ଟ୍ରଲର ଧକ୍କା ହେବା ମାତ୍ରେ ଏକ ଜୋରଦାର ଶବ୍ଦ ହୋଇଥିଲା ଏବଂ ସ୍ଥାନୀୟ ଲୋକମାନେ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଲୋକଙ୍କୁ ସାହାଯ୍ୟ କରିଥିଲେ।

ଜଳୁଛି ଓଡ଼ିଶା
ଆଗକୁ ପ୍ରଚଣ୍ଡ ତାତି। ଆସନ୍ତା ୧୬ ତାରିଖ ପର୍ଯ୍ୟନ୍ତ ତାତିରୁ ଏବେ ନିସ୍ତାର ନାହିଁ। ସାରା ରାଜ୍ୟରେ ଗ୍ରୀଷ୍ମ ପ୍ରବାହ। ଉଷ୍ମ ଓ ଆର୍ଦ୍ର ଅବସ୍ଥା ଲାଗି ରହିବ। ପଶ୍ଚିମ ଓଡ଼ିଶାରେ ଭୟଙ୍କର ଅଗ୍ନିବର୍ଷା। ଅଧିକାଂଶ ସହରରେ ଦିନର ସର୍ବୋଚ୍ଚ ତାପମାତ୍ରା ୪୦ ଡଡିଗ୍ରୀ ଉପରେ ରହିବ। ବିଶେଷ କରି ପଶ୍ଚିମ ଓଡ଼ିଶାରେ ୪୫ ଡିଗ୍ରି ଟପିଯିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଉପକୂଳରେ ଉଷ୍ମ ଅବସ୍ଥା ଲାଗିରହିବାକୁ ଥିବାରୁ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଆସନ୍ତା ୫ ଦିନ ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି। ସୋମବାର ସମ୍ବଲପୁର ଓ ଟିଟିଲାଗଡ଼ରେ ତାତି ୪୪ ଡିଗ୍ରୀ ଛୁଇଁଯିବ। ମଙ୍ଗଳବାର ଏହି ଦୁଇ ସ୍ଥାନରେ ରେ ତାତି ୪୫ ଡିଗ୍ରୀ ରହିପାରେ। 

ତିବତରେ ଭୟଙ୍କର ଭୂମିକମ୍ପ
ରବିବାର ମଧ୍ୟରାତ୍ରିରେ, ଯେତେବେଳେ ଲୋକମାନେ ଗଭୀର ଶୋଇଥିଲେ, ହଠାତ୍ ତିବ୍ଦତ ଭୂମି ଭୂମିକମ୍ପର ପ୍ରବଳ କମ୍ପନରେ ଥରିବାକୁ ଲାଗିଲା। ଭାରତୀୟ ସମୟ ଅନୁସାରେ ରାତି ୨:୪୧ ରେ ଭୂମିକମ୍ପ ହୋଇଥିଲା, ଯାହା ଫଳରେ ଲୋକଙ୍କ ବିଛଣା ଥରିବାକୁ ଲାଗିଲା ଏବଂ ସେମାନେ ନିଦରୁ ଉଠି ପଡ଼ିଲେ। ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର ଅନୁଯାୟୀ, ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ 5.7 ମାପ କରାଯାଇଥିଲା ଏବଂ ଏହାର କେନ୍ଦ୍ରସ୍ଥଳ ତିବ୍ଦତ ଅଞ୍ଚଳରେ ଥିଲା। ନିଶ୍ଚିତ ଭାବରେ ଭୂମିକମ୍ପର ଝଟକା ଶକ୍ତିଶାଳୀ ଥିଲା କିନ୍ତୁ ଏପର୍ଯ୍ୟନ୍ତ କୌଣସି ଜୀବନ କିମ୍ବା ସମ୍ପତ୍ତି କ୍ଷତିର ଖବର ନାହିଁ। ଭୂମିକମ୍ପର ପ୍ରଭାବ ଉତ୍ତର ପ୍ରଦେଶ ଏବଂ ବିହାରରେ ମଧ୍ୟ ଦେଖିବାକୁ ମିଳିଥିଲା।

ଆଜି ନର୍ସ ଡେ
ପ୍ରତିବର୍ଷ ମେ 12 ତାରିଖରେ ବିଶ୍ୱବ୍ୟାପୀ ଆନ୍ତର୍ଜାତୀୟ ନର୍ସ ଦିବସ ପାଳନ କରାଯାଏ। ଆପଣଙ୍କୁ କହିରଖୁଛୁ ଯେ ଏହି ଦିବସ ପାଳନ ଜାନୁଆରୀ 1974 ରେ ଇଣ୍ଟରନ୍ୟାସନାଲ କାଉନସିଲ ଅଫ୍ ନର୍ସ (ICN) ଦ୍ୱାରା ଆରମ୍ଭ କରାଯାଇଥିଲା, କିନ୍ତୁ ପରେ ଏହି ଦିବସକୁ 12 ମଇରେ ପାଳନ କରିବାକୁ ନିଷ୍ପତ୍ତି ନିଆଯାଇଥିଲା। ଏହା ପଛରେ କାରଣ ହେଉଛନ୍ତି ଆଧୁନିକ ନର୍ସିଂର ପ୍ରତିଷ୍ଠାତା ଫ୍ଲୋରେନ୍ସ ନାଇଟିଙ୍ଗେଲ। ପ୍ରକୃତରେ, ପ୍ରସିଦ୍ଧ ଫ୍ଲୋରେନ୍ସ ନାଇଟିଙ୍ଗେଲଙ୍କ ଜନ୍ମ ୧୨ ମଇ ୧୮୨୦ରେ ହୋଇଥିଲା। ତାଙ୍କ ସ୍ମୃତିରେ ପ୍ରତିବର୍ଷ ଅନ୍ତର୍ଜାତୀୟ ନର୍ସ ଦିବସ ପାଳନ କରାଯାଏ।