Top 10 News Headlines: ମାଟ୍ରିକ୍ ପରୀକ୍ଷା ପାଇଁ କଡ଼ା ସୁରକ୍ଷା ବ୍ୟବସ୍ଥା, ପଢନ୍ତୁ ଦିନଯାକର ୧୦ ପ୍ରମୁଖ ଖବର

ବିଶ୍ୱ ଓଡ଼ିଆ ଭାଷା ସମ୍ମିଳନୀ ଆରମ୍ଭ
ଭୁବନେଶ୍ୱରରେ ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ ଆରମ୍ଭ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ଉଦ୍‌ଘାଟନ କରିଛନ୍ତି। ଏହି ସମ୍ମିଳନୀରେ ଯାହା ପ୍ରସ୍ତାବ ଆସିବ, ରାଜ୍ୟ ସରକାର ତାକୁ ଗ୍ରହଣ କରି ଏକ ସ୍ବତନ୍ତ୍ର ଭାଷା ନୀତି ପ୍ରସ୍ତୁତ କରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଓଡିଆ ଜାତିର ଭବିଷ୍ୟତ ବିକାଶ ରାସ୍ତାକୁ ଏହା ପ୍ରଶସ୍ତ କରିବ ବୋଲି ସେ ମତଦେଇ ଓଡିଆ ଜାତିର ଓ ଓଡିଆ ଭାଷାର ଭବିଷ୍ୟତ ଉଜ୍ଜଳ ବୋଲି କହିଛନ୍ତି। ଏହି ଅବସରରେ ଭାଷାବିତ୍‍ ପଦ୍ମଶ୍ରୀ ଦେବୀ ପ୍ରସନ୍ନ ପଟ୍ଟନାୟକଙ୍କୁ ପ୍ରଥମ ଭାଷା ପୁରସ୍କାର ପ୍ରଦାନ କରାଯାଇଛି। 

ଲୋକାର୍ପିତ ହେଲା IIM ସମ୍ବଲପୁର
ସମ୍ବଲପୁରଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପହଞ୍ଚିଛନ୍ତି। ସେଠାରେ ଆଇଆଇଏମ୍‍ ସମ୍ବଲପୁରର ନୂଆ କୋଠାକୁ ଉଦ୍‍ଘାଟନ କରିବା ସହ ସେ ୬୮ ହଜାର କୋଟି ଟଙ୍କା ବିନିଯୋଗରେ ସୃଷ୍ଟି ହୋଇଥିବା ନୂଆ ଶିଳ୍ପ ଭିତ୍ତିଭୂମିକୁ ଉଦ୍ଘାଟନ କରିଛନ୍ତି ଏହାସହ ସୋନପୁର-ପୁରୀ-ସୋନପୁର ପାଇଁ ନୂଆ ରେଳଲାଇନ ଉଦ୍‍ଘାଟନ  କରିଛନ୍ତି। । ଏହି ସଭାରେ ରାଜ୍ୟପାଳ, ମୁଖ୍ୟମନ୍ତ୍ରୀ ଏବଂ ତିନି କେନ୍ଦ୍ରମନ୍ତ୍ର୍ରୀ ଉପସ୍ଥିତ ଥିଲେ। ସମ୍ବଲପୁରରେ ମେଡ୍‍ଠାରେ ଆୟୋଜିତ ସାଧାରଣ ସଭାରେ ମଧ୍ୟ ଶ୍ରୀ ମୋଦୀ ଅଭିଭାଷଣ ରଖିଛନ୍ତି।  ଆଜି ଭାରତୀୟ ଜନତା ପାର୍ଟି ଓ ସମସ୍ତ କାର୍ଯ୍ୟକର୍ତ୍ତାଙ୍କ ପାଇଁ ଗର୍ବ ଓ ଗୌରବର ଦିବସ ବୋଲି ବର୍ଣ୍ଣନା କରିଛନ୍ତି। ଆଜି ବିଜେପିର ବରିଷ୍ଠ ନେତା ଲାଲ୍‍କୃଷ୍ଣ ଆଡ୍‍ଭାନୀଙ୍କୁ ଭାରତରତ୍ନ ମିଳିଥିବାରୁ ଏହା ସମସ୍ତ କାର୍ଯ୍ୟକର୍ତ୍ତା ଏବଂ ରାଷ୍ଟ୍ର ପ୍ରଥମ ବିକାଶଧାରାର ସମ୍ମାନ ବୋଲି କହିଛନ୍ତି ମୋଦୀ। 

୫ରୁ ବିଧାସଭା ଅଧିବେସନ
ଆସନ୍ତା ୫ ତାରିଖରୁ ବିଧାନସଭା ଅଧିବେସନ ଆରମ୍ଭ ହେବାକୁ ଯାଉଛି। ଏଥିପାଇଁ ଆଜି କ୍ୟାବିନେଟ ବୈଠକ ବସିଥିଲା। କ୍ୟାବିନେଟରେ ଏକାଧିକ ପ୍ରସ୍ତାବ ପାରିତ ହୋଇଥିବା ଜଣାପଡ଼ିଛି। 

ମାଟ୍ରିକ୍ ପରୀକ୍ଷା ପାଇଁ କଡ଼ା ସୁରକ୍ଷା ବ୍ୟବସ୍ଥା
ଫେବ୍ରୁଆରୀ ୨୦ ତାରିଖରୁ ଆରମ୍ଭ ହେଉଛି ମାଟ୍ରିକ୍ ପରୀକ୍ଷା। ମଝିରେ ରହିଲା ଆଉ ମାତ୍ର ୨ ସପ୍ତାହ। ଏହି ପରୀକ୍ଷାକୁ ବ୍ୟବସ୍ଥିତ ଭାବେ ପରିଚାଳିତ କରିବା ପାଇଁ କାର୍ଯ୍ୟକ୍ରମ ଜାରି ରଖିଛି ମାଧ୍ୟମିକ ଶିକ୍ଷା ପରିଷଦ। ଏହି କ୍ରମରେ କପି ରୋକିବାକୁ ନୂଆ ଫର୍ମୂଲା ଆପଣାଇଛି ବୋର୍ଡ। ଏଣିକି ପରୀକ୍ଷା ପାଇଁ ଧାର୍ଯ୍ୟ ସମୟର ଦେଢ଼ ଘଣ୍ଟା ପୂର୍ବରୁ ପରୀକ୍ଷା ହଲକୁ ପ୍ରବେଶ କରିବେ ପରୀକ୍ଷାର୍ଥୀ। ଅର୍ଥାତ୍ ସକାଳ ୯ ଟାରେ ପରୀକ୍ଷା ଥିବାବେଳେ ସାଢ଼େ ୭ଟାରୁ ପରୀକ୍ଷା କେନ୍ଦ୍ରକୁ ପରୀକ୍ଷାର୍ଥୀଙ୍କୁ ଛଡ଼ାଯିବ। ୮ଟା ୧୫ ମିନିଟ୍ ପରେ ଆଉ କାହାକୁ ପରୀକ୍ଷା ହଲ୍‌କୁ ପ୍ରବେଶ ଅନୁମତି ମିଳିବନି।

ସ୍ୱାସ୍ଥ୍ୟସେବାରେ ଯୋଡ଼ି ହେଲା ନୂଆ ବ୍ୟବସ୍ଥା
ସ୍ୱାସ୍ଥ୍ୟ ସେବାକ୍ଷେତ୍ରରେ ପୁଣି ଏକ ମାଇଲଖୁଣ୍ଟ ହାସଲ କରିଛି ଏମ୍‌ସ ଭୁବନେଶ୍ୱର। ହସ୍ପିଟାଲରେ ପକ୍ଷରୁ ରୋଗୀସେବାକୁ ଅଧିକ ସହଜ ଓ ସୁନ୍ଦର କରିବା ପାଇଁ ଏକାଧିକ ନୂତନ ବ୍ୟବସ୍ଥା ଯୋଡ଼ିହୋଇଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ. ମନସୁଖ୍‌ ମାଣ୍ଡଭିୟ ଆଜି ଆଭାସି କାର୍ଯ୍ୟକ୍ରମ ମାଧ୍ୟମରେ ଏମ୍‌ସ ଭୁବନେଶ୍ୱରର ଧର୍ମଶାଳା, ନୂତନ ଟ୍ରମା କେନ୍ଦ୍ର ଏବଂ ହାଇ ଏନର୍ଜୀ ଲିନିୟର୍‌ ଆକ୍ସେଲରେଟର୍‌ (ହେଲା) ମେସିନ୍‌ର ଉଦ୍‌ଘାଟନ କରିଛନ୍ତି। 

କୋଟିଆକୁ ନେଇ ଆନ୍ଧ୍ରକୁ ଟାର୍ଗେଟ କଲେ ଟିଡିପି ନେତା
କୋରାପୁଟ ଜିଲ୍ଲାର ପଟାଙ୍ଗି ବ୍ଲକ ଅନ୍ତର୍ଗତ କୋଟିଆ ପଞ୍ଚାୟତରେ ଓଡ଼ିଶା ସରକାରଙ୍କ ପକ୍ଷରୁ ବିଭିନ୍ନ ଉନ୍ନତିମୂଳକ କାର୍ଯ୍ୟ କରାଯିବା ସହିତ ଲୋକଙ୍କୁ ବିଭିନ୍ନ ଯୋଜନାରେ ସାମିଲ କରାଯାଉଛି। ଓଡ଼ିଶାର ଏହିଭଳି କାର୍ଯ୍ୟକୁ ଦେଖି ଆନ୍ଧ୍ର ଛାନିଆ ହୋଇ ଯାଇଛି। କୋଟିଆରେ ଆମ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମକୁ ଦେଖିବା ପରେ ଆନ୍ଧ୍ର ହାତରୁ କୋଟିଆ ଖସି ଯାଉଥିବା ଅନୁଭବ କରି ଟିଡିପି ନେତା ଆରୋପ କରିଛନ୍ତି ଆନ୍ଧ୍ରକୁ। କୋଟିଆରେ ଓଡ଼ିଶାର ଉନ୍ନୟନ କାମ ଦେଖି ଆନ୍ଧ୍ର ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କଲେ ଆନ୍ଧ୍ରର ସାଲୁରୁ ଦାୟିତ୍ୱରେ ଥିବା ଟିଡିପି ନେତା ଭୀଷ୍ମ ବାବାଜୀ। କୋଟିଆକୁ ଏକ ୪ ଜଣିଆ ଟିଡିପି ପ୍ରତିନିଧି ଦଳ ଗସ୍ତ କରି ଓଡ଼ିଶା ସରକାରଙ୍କ କାର୍ଯ୍ୟଧାରାକୁ ଦେଖି ଆନ୍ଧ୍ର ସରକାର କେବେ ବି ଏହା ଉପରେ ପ୍ରତିକ୍ରିୟା ରଖି ନାହାନ୍ତି ବୋଲି ପ୍ରତିନିଧି ଦଳ ଅଭିଯୋଗ କରିଥିଲେ।

ସମ୍ବଲପୁର ପର୍ଯ୍ୟନ୍ତ ଲମ୍ବିଲା ଗୋରଖପୁର-ହଟିଆ ଏକ୍ସପ୍ରେସ
ଗୋରଖପୁରରୁ ହଟିଆ ଚାଲୁଥିବା ଏକ୍ସପ୍ରେସ ଟ୍ରେନ୍‍ ଯାତ୍ରା ଏଣିକି ସମ୍ବଲପୁର ଯାଏଁ ସଂମ୍ପ୍ରସାରିତ ହେବ। ଏନେଇ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି। ସମ୍ବଲପୁରଠାରେ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମରେ ଯୋଗ ଦେବା ଲାଗି ଆସିଥିବା ରେଳମନ୍ତ୍ର ଏହି ସୂଚନା ରଖିଛନ୍ତି। ସମ୍ବଲପୁର ଗସ୍ତକରି ଆଜି ସକାଳେ ପ୍ରଧାନମନ୍ତ୍ରୀ ଶିଳାନ୍ୟାସ କରିବାକୁ ଥିବା ବିଭିନ୍ନ କାର୍ଯ୍ୟକ୍ରମର ସେ ସମୀକ୍ଷା କରିଛନ୍ତି। ଏହା ସହ ସମ୍ବଲପୁର ରେଳ ଷ୍ଟେସନକୁ ନିରୀକ୍ଷଣ କରି ସମ୍ପୃକ୍ତ ଷ୍ଟେସନର ନବୀକରଣ ଲାଗି ଘୋଷଣା କରିଛନ୍ତି। ସେ କହିଛନ୍ତି ଯେ, ଗୋରଖପୁର-ହଟିଆ ମୌର୍ଯ୍ୟ ଏକ୍ସପ୍ରେସକୁ ସମ୍ବଲପୁର ପର୍ଯ୍ୟନ୍ତ ସେବା ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି।  

କୋର୍ଟରେ ପହଞ୍ଚିଲା ଇଡି
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ବିରୋଧରେ କୋର୍ଟଙ୍କ ଦ୍ୱାରସ୍ଥ ହୋଇଛି ଇଡି। ଦିଲ୍ଲୀର ତଥାକଥିତ ଅବକାରୀ ନୀତି ଦୁର୍ନୀତି ଘଟଣାରେ ଇଡି କେଜ୍ରିୱାଲଙ୍କୁ ହାଜର ହେବାକୁ ୫ଥର ସମନ କରି ସାରିଲାଣି। କିନ୍ତୁ ସେ ଥରେ ହେଲେ ବି ଜେରାର ସମ୍ମୁଖୀନ ହେବାକୁ ଇଡି ପାଖରେ ହାଜର ହୋଇ ନାହାନ୍ତି। ଶୁକ୍ରବାର କେଜ୍ରିୱାଲ ଇଡିର ୫ମ ସମନକୁ ବେଖାତିର କରିଥିଲେ। ଏଥିପାଇଁ ଆଜି ଇଡି ଦିଲ୍ଲୀର ରୋଜ ଆଭିନ୍ୟୁ କୋର୍ଟର ଦ୍ୱାରସ୍ଥ ହୋଇଛି।

୨ କୋଟି ଲୋକଙ୍କ ପାଇଁ ପକ୍କାଘର ଯୋଜନା
ପିଏମ୍‍ ଆବାସ ଯୋଜନାରେ ଯେଉଁମାନଙ୍କୁ ଘର ମିଳିନାହିଁ ସେମାନଙ୍କ ଚିନ୍ତା ବି ଭାରତ ସରକାର କରିଛନ୍ତି। ଏହି ବଜେଟରେ ୨ କୋଟି ଲେକଙ୍କ ପାଇଁ ପକ୍କା ଘର ଲାଗି ଯୋଜନା କରାଯାଇଛି। ଯଦି ଆପଣଙ୍କ ଅଞ୍ଚଳରେ କେହି ପକ୍କା ଘରେ ରହି ନାହାନ୍ତି ତେବେ ତାଙ୍କୁ ଯାଇ କୁହନ୍ତୁ ମୋଦୀ ଆସିଥିଲେ ଏବଂ ପକ୍କା ଘରର ପ୍ରତିଶୃତି ଦେଇ ଯାଇଛନ୍ତି। ମୋର କେହି ଭାରତବାସୀ ଛପର ଚାଳ ଘରେ ନରହନ୍ତୁ ସେଥିଲାଗି ମୋଦୀ ସରକାର ସବୁବେଳେ କାମ କରୁଛନ୍ତି। ଏଥିରେ ଓଡ଼ିଶାର ୨୫ ହଜାର ପରିବାର ସାମିଲ୍‍ ହେବେ ବୋଲି କହିଛନ୍ତି ମନ୍ତ୍ରୀ।

ପିଏମ କିସାନ ଯୋଜନାରେ ୪୦ ଲକ୍ଷ ଚାଷୀ ଉପକୃତ
ଓଡ଼ିଶାର ୪୦ ଲକ୍ଷ କୃଷକଙ୍କୁ ପିଏମ୍‍ କିସାନ ଯୋଜନା ଜରିଆାରେ ସହାୟତା ପାଇଛନ୍ତି। ପ୍ରତି କୃଷକଙ୍କୁ ଏହି ସରକାର ସମୟରେ ଅତିକମ୍‍ରେ ୩୦ ହଜାର ଟଙ୍କା ମିଳିଛି। ପ୍ରଥମଥର ପାଇଁ ବିଜେପି ସରକାର କୃଷକଙ୍କ ଖର୍ଚ୍ଚର ଦେଢ଼ଗୁଣା ଏମ୍‍ଏସ୍‍ପି କରିଛି ବୋଲି କହିଛନ୍ତି ପ୍ରଧାନମନ୍ତ୍ରୀ।