Top 10 News: ଭାରତରେ ତୁର୍କୀ ସୋସିଆଲ ମିଡିଆ ବ୍ୟାନ୍‌ ସହ ଅନ୍ୟ ଖବର

Top 10 News Today: ରାଜ୍ୟ ତଥା ଦେଶ ବିଦେଶର ସବୁ ବଡ଼ ଖବର ପଢନ୍ତୁ ଚୁଟକୀରେ

Top 10 News Today

Headlines 01- ମୋଦୀ କ୍ୟାବିନେଟ୍ ଦେଶର ଷଷ୍ଠ ସେମିକଣ୍ଡକ୍ଟର ୟୁନିଟକୁ ଅନୁମୋଦନ କରିଛି। ଯାହା ବୈଷୟିକ କ୍ଷେତ୍ରରେ ଭାରତର ଆତ୍ମନିର୍ଭରଶୀଳତାକୁ ସୁଦୃଢ଼ ​​କରିବ ଏବଂ ଚୀନ୍‌କୁ କଡ଼ା ଜବାବ ଦେବ। ଏହି ୟୁନିଟ୍ ଉତ୍ତର ପ୍ରଦେଶର ଜେୱରରେ ସ୍ଥାପନ କରାଯିବ। ଏହି ପ୍ରକଳ୍ପ ପାଇଁ ୩୭୦୬ କୋଟି ଟଙ୍କା ଖର୍ଚ୍ଚ ହେବ ଏବଂ ଏହା ପ୍ରାୟ ୨୦୦୦ ଲୋକଙ୍କୁ ନିଯୁକ୍ତି ପ୍ରଦାନ କରିବ। ଏହି ୟୁନିଟ୍ HCL ଏବଂ ତାଇୱାନିଜ୍ କମ୍ପାନୀ ଫକ୍ସକନ୍ ମଧ୍ୟରେ ଏକ ମିଳିତ ଉଦ୍ୟମ ଭାବରେ ପ୍ରତିଷ୍ଠିତ ହେବ। ଏହି ନିଷ୍ପତ୍ତି ବିଷୟରେ ସୂଚନା ଦେଇ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ବିଶ୍ୱ ସେମିକଣ୍ଡକ୍ଟର ଯୋଗାଣ ଶୃଙ୍ଖଳରେ ଭାରତକୁ ଏକ ପ୍ରମୁଖ ଭୂମିକା ଦେବା ଦିଗରେ ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ। ଏହି ୟୁନିଟରେ ୩୬୦ ଲକ୍ଷ ଚିପ୍ସ ତିଆରି ହେବ। ଏଠାରୁ ସେଗୁଡ଼ିକୁ ଦେଶ ଏବଂ ବିଶ୍ୱର ବିଭିନ୍ନ ସ୍ଥାନକୁ ରପ୍ତାନି କରାଯିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଜେୱରରେ ଉତ୍ପାଦନ ଦ୍ୱାରା ଉତ୍ତର ପ୍ରଦେଶକୁ ବହୁତ ଲାଭ ମିଳିବ ଏବଂ ଜେୱର ବିମାନବନ୍ଦର ଥିବାରୁ ରପ୍ତାନି ମଧ୍ୟ ସହଜ ହେବ।

Headlines 02- ଭାରତରେ ତୁର୍କୀ ସୋସିଆଲ ମିଡିଆ ବ୍ୟାନ୍‌ କରାଯାଇଛି । ପାକିସ୍ତାନକୁ ସହଯୋଗ କରିବା ପ୍ରମାଣ ମିଳିବା ପରେ ତୁର୍କୀର ସରକାରୀ ସୋସିଆଲ ମିଡିଆ TRT ବ୍ୟାନ୍‌ ହୋଇଥିବା ସୂଚନା ମିଳିଛି । ଅପରେସନ ସିନ୍ଦୂର ବେଳେ ପାକିସ୍ତାନକୁ ତୁର୍କୀ ସହଯୋଗ କରିଥିଲା ବୋଲି ଜାତୀୟ ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା ।

Add Zee News as a Preferred Source

Headlines 03- ଦାରା ସିଂଙ୍କ ଦଣ୍ଡ କୋହଳ ପାଇଁ ସୁପ୍ରିମକୋର୍ଟରେ ଶୁଣାଣି ପରେ ଜବାବ ରଖିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି । ୨ ସପ୍ତାହ ଭିତରେ ଜବାବ ଦେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ । ରାଜ୍ୟ ସରକାରଙ୍କ ପକ୍ଷରୁ AG ପୀତାମ୍ବର ଆଚାର୍ଯ୍ୟ ନିଜ ପକ୍ଷ ରଖିଥିବା ସୂଚନା ମିଳିଛି ।

Headlines 04- କୋରାପୁଟରେ ବଜ୍ରାଘାତ କାରଣରୁ ଗୋଟିଏ ପରିବାରର ୩ ଜଣଙ୍କ ମୃତ୍ୟୁ ହୋଇଛି । ପଟାଙ୍ଗୀ ବ୍ଲକ ଅମ୍ପାବାଲି ପଞ୍ଚାୟତ କନ୍ଧପୁଟାବନ୍ଧ ଗାଁରେ ବଜ୍ରପାତରେ ପ୍ରାଣ ହରାଇଛନ୍ତି ବାପା, ଝିଅ ଏବଂ ମାଉସୀ । ବିଲରେ କାମ କରିବା ବେଳେ ବଜ୍ରାପାତ ହୋଇଥିବା ସୂଚନା ମିଳିଛି ।

Headlines 05- ପାରାଦୀପ ଏସ୍.ପି.ଏମ୍ ବର୍ଥ ରେ ଲାଗିବ ଏମ୍.ଭି. ତୈଳବାହୀ ଜାହାଜ  'ଏକତଟି ସିରେନ୍-୨। ଜାହାଜ ରେ ୨୧ ପାକିସ୍ତାନ ନାଗରିକ ଥିବା ସୂଚନା ମିଳିଛି। ଦକ୍ଷିଣ କୋରିଆରୁ ୧୩୫ଟନ୍ ଅଶୋଧିତ ତୈଳ ନେଇ ଆସୁଥିବା ଏହି ଜାହାଜରେ ପାକିସ୍ତାନୀ ସଦସ୍ୟ ରହିଥିବା ନେଇ କଷ୍ଟମ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଛି। ଜାହାଜରେ ପାକିସ୍ତାନୀ ନାବିକ ଥିବା ରୁ ପାରାଦୀପ ବନ୍ଦର ପ୍ରଶାସନ, ଇମିଗ୍ରେସନ, କୋଷ୍ଟଗାର୍ଡ ଓ ମେରାଇନ୍ ପୋଲିସ ତରଫରୁ ସତର୍କତା ଅବଲମ୍ବନ। ଜାହାଜ ଲାଗିବା ନେଇ ପାରାଦୀପ ବନ୍ଦର ଡିଟିଆର୍ (ଡେଲି ଟ୍ରାଫିକ ରିପୋର୍ଟ )' ରୁ ସୂଚନା ଦିଆଯାଇଛି। ପାରାଦୀପ ବନ୍ଦର ପରିସରରେ ସୁରକ୍ଷା କଡ଼ାକଡ଼ି କରାଯାଇଛି। 

Headlines 06- ମଙ୍ଗଳବାର ଦିନ ମୌସୁମୀ ବାୟୁ ବଙ୍ଗୋପସାଗରର ଦକ୍ଷିଣ ଅଂଶ, ଆଣ୍ଡାମାନ ସାଗରର ଦକ୍ଷିଣ ଅଂଶ, ନିକୋବର ଦ୍ୱୀପପୁଞ୍ଜ, ଆଣ୍ଡାମାନ ସାଗରର ଉତ୍ତର ଅଂଶରେ ପହଞ୍ଚିଥିଲା। ମୌସୂମୀ ୨୭ ମଇ ସୁଦ୍ଧା କେରଳରେ ପହଞ୍ଚିବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ। ଜୁଲାଇ ପ୍ରଥମ ସପ୍ତାହରେ ମୌସୁମୀ ସମଗ୍ର ଦେଶକୁ ଆଚ୍ଛାଦିତ କରିପାରେ। ମୌସୁମୀ ପ୍ରବେଶ ଯୋଗୁଁ, ଗତ ୨୪ ଘଣ୍ଟା ମଧ୍ୟରେ ନିକୋବର ଦ୍ୱୀପପୁଞ୍ଜର କିଛି ସ୍ଥାନରେ ପ୍ରବଳ ବର୍ଷା ହୋଇଛି।

Headlines 07- ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି ଯେ, ଖୁବ୍‌ଶୀଘ୍ର ଯୁକ୍ତ ଦୁଇ ପରୀକ୍ଷା ଫଳ ପ୍ରକାଶ ପାଇବ । ଏନେଇ ସମସ୍ତ ପ୍ରକ୍ରିୟା ଚାଲିଛି, ଆଶା ଖୁବ୍‌ଶୀଘ୍ର ପ୍ରକାଶ ପାଇବ।  ତେବେ, ମେ ୧୫ ତାରିଖ ସୁଧା ପରୀକ୍ଷା ଫଳ ବାହାରିବ ବୋଲି ଲକ୍ଷ ରଖାଯାଇଥିଲା।  ସୂଚନା ଯୋଗ୍ୟ, ମାର୍ଚ୍ଚ ୨୮ରେ ଯୁକ୍ତ ୨ ପରୀକ୍ଷା ଶେଷ ହୋଇଛି।  ଏଥିରେ ରାଜ୍ୟର ୩ ଲକ୍ଷ ୯୩ ହଜାର ୬୧୮ ଜଣ ପିଲା ପରୀକ୍ଷା ଦେଇଛନ୍ତି।  ଏପ୍ରିଲ୍ ୨ ତାରିଖରୁ ଖାତା ଦେଖା ଆରମ୍ଭ ହୋଇଛି। ୨ଟି ପର୍ଯ୍ୟାୟରେ ଖାତା ଦେଖା ହୋଇଛି। 

Headlines 08- ଆତଙ୍କବାଦ ବିରୋଧୀ ଅଭିଯାନ, ଅପରେସନ୍‍ ସିନ୍ଦୁର’ର ସଫଳତା ପରେ ଆଜି ଭୁବନେଶ୍ୱରର କଳିଙ୍ଗ ଷ୍ଟାଡିଅମ ଠାରେ ଏକ ତ୍ରିରଙ୍ଗା ବାଇକ୍ ଯାତ୍ରା ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଯୋଗଦେଇ ଏହି ବାଇକ୍ ଯାତ୍ରାକୁ ପତାକା ଦେଖାଇ ଉଦ୍ଘାଟନ କରିଥିଲେ। ଏହି ଯାତ୍ରା, ସକାଳ ୮ଟାରେ କଳିଙ୍ଗ ଷ୍ଟାଡିଅମ ଠାରୁ ଆରମ୍ଭ ହୋଇ ରାଜଭବନ ପର୍ଯ୍ୟନ୍ତ ହୋଇଥିବା ବେଳେ, ପୋଲିସ ବାହିନୀ, ସୁରକ୍ଷା ବାହିନୀ, ଲୋକପ୍ରତିନିଧି ଏବଂ ସାଧାରଣ ଜନତା ଏହି ରାଲିରେ, ନିଜ ସହିତ ତ୍ରିରଙ୍ଗା ପତାକା ଧରି ବାଇକ ଚଳାଇ ବନ୍ଦେ ମା ତରଂ ଧ୍ଵନି ଦେଇ ସହର ପରିକ୍ରମା କରିଥିଲେ । ମୁଖ୍ୟମନ୍ତ୍ରୀ ନିଜ ଅଭିଭାଷଣରେ କହିଥିଲେଯେ, ଅପରେସନ୍‍ ସିନ୍ଦୁର’ର ସଫଳତା ପରେ ଆଜିର ଏହି ତ୍ରିରଙ୍ଗା ବାଇକ୍ ଯାତ୍ରା ଆତଙ୍କବାଦ ବିରୁଦ୍ଧରେ ଦେଶର ଅଭିଯାନକୁ ଆହୁରି ସଶକ୍ତ କରିବ। ଜାତି, ଧର୍ମ ନିର୍ବିଶେଷରେ ସବୁ ଭାରତୀୟ ତ୍ରିରଙ୍ଗା ତଳେ, ଯେତେବେଳେ ଏକଜୁଟ୍‍ ହେବେ, ସେତେବେଳେ କୌଣସି ଶକ୍ତି ଆମ ବିରୁଦ୍ଧରେ ସଫଳ ହେବେ ନାହିଁ ।

Headlines 09- ଓଡ଼ିଶା ସ୍ଥାବର ସମ୍ଫତ୍ତି ନିୟାମକ ପ୍ରାଧିକରଣ (ORERA)ରେ ଏକ ଗୁରୁତ୍ୱପୂର୍ଣ୍ଣ ନେତୃତ୍ୱ ପରିବର୍ତ୍ତନ ହୋଇଛି। ଅସିତ କୁମାର ମହାପାତ୍ରଙ୍କୁ ଏହାର ନୂତନ ଅଧ୍ୟକ୍ଷ ଭାବରେ ନିଯୁକ୍ତ କରାଯାଇଛି। ତାଙ୍କ ସହିତ ରାଜେନ୍ଦ୍ର ମିଶ୍ର ଏବଂ ଶ୍ୟାମ ସୁନ୍ଦର ଦାଶଙ୍କୁ ମଧ୍ୟ ସଦସ୍ୟ ଭାବରେ ସାମିଲ କରାଯାଇଛି। ଯାହା ନିୟାମକ ସଂସ୍ଥା ପାଇଁ ଏକ ନୂତନ ଦୃଷ୍ଟିକୋଣ ଆଣିବ ବୋଲି କୁହାଯାଉଛି। ORERA ଏହି ନୂତନ ଅଧ୍ୟାୟ ଆରମ୍ଭ କରୁଥିବାରୁ ଘରକ୍ରେତା ଏବଂ ଡେଭଲପରମାନେ ଉଭୟ ଗଠନମୂଳକ ସଂସ୍କାର ପାଇଁ ଅପେକ୍ଷା କରିଛନ୍ତି। ଯାହା ରାଜ୍ୟର ରିଅଲ୍ ଷ୍ଟେଟ୍ ପ୍ରଶାସନକୁ ଆହୁରି ଉନ୍ନତ କରିବ। ଏହି ପରିବର୍ତ୍ତନ ଶିଳ୍ପର ନିୟାମକ ପରିବେଶ ପାଇଁ ଏକ ଗୁରୁତ୍ୱପୂର୍ଣ୍ଣ ସମୟରେ ଆସିଛି। ଯାହା ତଦାରଖ ସୁନିଶ୍ଚିତ କରେ ଏବଂ ନିରପେକ୍ଷ ଅଭ୍ୟାସଗୁଡ଼ିକୁ ପ୍ରୋତ୍ସାହିତ କରେ।

Headlines 10- ରାଜ୍ୟରେ ଲାଗି ରହିଛି କାଳବୈଶାଖୀ ବର୍ଷା। ଦିନରେ ଖରା ଗୁଳୁଗୁଳି ଦେଖିବାକୁ ମିଳୁଥିବା ବେଳେ ଅପରାହ୍ଣରେ ବିଜୁଳି-ଘଡ଼ଘଡ଼ି ସହ ବର୍ଷା ପବନ ଦେଖିବାକୁ ମିଳୁଛି। ଅନେକ ଜିଲ୍ଲାରେ ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା ଦେଖିବାକୁ ମିଳିଛି। ଆସନ୍ତା କାଲି ଗୁରୁବାର ବିଜୁଳି-ଘଡ଼ଘଡ଼ି ସହ ପ୍ରବଳ ବର୍ଷା ହେବା ନେଇ ୧୩ ଜିଲ୍ଲା ପାଇଁ ୟେଲୋ ଆଲର୍ଟ ଜାରି କରାଯାଇଥିବା ବେଳେ ୬ ଜିଲ୍ଲା ପାଇଁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଭାଗ। ୟେଲୋ ଆଲର୍ଟ ଜାରି କରାଯାଇଥିବା ୧୩ ଜିଲ୍ଲା ହେଉଛି ପୁରୀ, ଖୋର୍ଦ୍ଧା, ନୟାଗଡ଼, ନବରଙ୍ଗପୁର, କନ୍ଧମାଳ, ସୁନ୍ଦରଗଡ଼, ସମ୍ବଲପୁର, ବରଗଡ଼, ଝାରସୁଗୁଡ଼ା, କେନ୍ଦୁଝର, ମୟୂରଭଞ୍ଜ, ବଲାଙ୍ଗିର, କଳାହାଣ୍ଡି, ନୂଆପଡ଼ା ଓ କଟକ।