ସାର୍ବଭୌମତ୍ୱର ଅଧିକାର ନେଇ କଲମ୍ବସଙ୍କ ଆହ୍ୱାନ ହିଁ ଉପନିବେଶବାଦର ଜନନୀ’

କଟକ: ଯେତେବେଳେ ଇତିହାସକୁ ସମ୍ପୂର୍ଣ୍ଣ ନୂତନ ଶୈଳୀରେ ଅବଲୋକନ କରାଯାଏ, ସେତେବେଳେ ବହୁ ସତ୍ୟ ଓ ତଥ୍ୟ ଆପେ ଆପେ ସାମ୍ନାକୁ ଆସିଥାଏ। ‘କଲମ୍ୱସ ଯେତେବେଳେ ଆମେରିକାର ଆବିଷ୍କାର କଲେ, ସେତେବେଳେ ସେ କୌଣସି ନୂଆଦେଶ ଆବିଷ୍କାର ନିମନ୍ତେ ସାର୍ବଭୌମ ଅଧିକାରର ବ୍ୟବହାର କରିଥିଲେ । ବୋଧହୁଏ ଏହିପରି ଭାବରେ ହିଁ ଷୋଡ଼ଶ ଶତାବ୍ଦାର ଶେଷଆଡ଼କୁ ପୃଥିବୀରେ ଜନ୍ମ ନେଇଥିଲା ଉପନିବେଶବାଦ ବୋଲି ପ୍ରଭେସର ସଚ୍ଚିଦାନନ୍ଦ ମହାନ୍ତି କହିଛନ୍ତି। କଳା, ସଞ୍ଚାର ଏବଂ ଇଣ୍ଡିକ୍ ଷ୍ଟଡିଜ୍ ଦ୍ୱାରା ଆୟୋଜିତ ଏକ ସେମିନାରରେ ମୁଖ୍ୟ ବକ୍ତା ଭାବେ ଯୋଗ ଦେଇଥିଲେ ପ୍ରଫେସର ସଚ୍ଚିଦାନନ୍ଦ ମହାନ୍ତି କହିଛନ୍ତି। ପ୍ରଫେସର ମହାନ୍ତି ହେଉଛନ୍ତି ହାଇଦ୍ରାବାଦ ବିଶ୍ୱବିଦ୍ୟାଳୟର ଇଂରାଜୀ ବିଭାଗର ପୂର୍ବତନ ପ୍ରଫେସର ଏବଂ ବିଭାଗୀୟ ମୁଖ୍ୟ।

ବିଶ୍ୱବିଦ୍ୟାଳୟରେ ହିନ୍ଦୁସ୍ତାନୀ ଭୋକାଲ ବିଭାଗରେ ସ୍ନାତକ କରୁଥିବା ପରଫର୍ମିଂ ଆର୍ଟ ଛାତ୍ରଛାତ୍ରୀମାନଙ୍କ ଦ୍ୱାରା ଓଡ଼ିଶାର ଜାତୀୟ ଗୀତ ‘ବନ୍ଦେ ଉତ୍କଳ ଜନନୀ’ ଗାନ ସହିତ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା । ପ୍ରଫେସର ମହାନ୍ତିଙ୍କୁ ଶ୍ରୀ ଶ୍ରୀ ବିଶ୍ୱବିଦ୍ୟାଳୟର ମାନନୀୟ କୁଳପତି ଡଃ. ବି. ଆର. ଶର୍ମା, ଏସଏସୟୁର କାର୍ଯ୍ୟକାରୀ ପ୍ରବନ୍ଧକ ଡା. ଦୀପା ବିନୟ, ଏଫଏସିଆଇଏସର ଡିନ୍ ଗୁରୁ ରତିକାନ୍ତ ମହାପାତ୍ର ଏବଂ ଏଫଏସିଆଇଏସର ବିଭାଗୀୟ ମୁଖ୍ୟ ପ୍ରଫେସର ଡଃ. କମଳା ପ୍ରସାଦ ମହାପାତ୍ର ସମ୍ବର୍ଦ୍ଧିତ କରିଥିଲେ।  ସମ୍ମାନ ପ୍ରଦାନ ସମାରୋହ ପରେ ପ୍ରଫେସର ମହାନ୍ତିଙ୍କ ପୁସ୍ତକ, ‘ଆର୍ଲି ୱିମେନ୍ସ ରାଇଟିଂସ୍ ଇନ୍ ଓଡ଼ିଶା ଫ୍ରମ୍ 1898 ଟୁ 1950 : ଏ ଲଷ୍ଟ୍ ଟ୍ରାଡିସନ’କୁ ସେଠାରେ ବହୁସଂଖ୍ୟାରେ ଉପସ୍ଥିତ ଥିବା ବିଶ୍ୱବିଦ୍ୟାଳୟର ଛାତ୍ରଛାତ୍ରୀ, ଅଧ୍ୟାପକ-ଅଧ୍ୟାପିକା, ଗବେଷକ ଏବଂ ଏସଏସୟୁର ନିର୍ଦ୍ଦେଶକମାନଙ୍କ ଗହଣରେ ଲୋକାର୍ପଣ କରାଯାଇଥିଲା । ଏହାପରେ ଏଫଏସିଆଇଏସ ବିଭାଗୀୟ ମୁଖ୍ୟଙ୍କ ଦ୍ୱାରା କନସେପ୍ଟ ନୋଟ୍ ପାଠ ସହିତ ଅତିଥି ପରିଚୟ ପ୍ରଦାନ କରାଯାଇଥିଲା । 

ପ୍ରଫେସର ସଚ୍ଚିଦାନନ୍ଦ ମହାନ୍ତି ପୁସ୍ତକ ଉନ୍ମୋଚନ ପରେ ଆଲୋଚନାଚକ୍ରର ବିଷବସ୍ତୁକୁ ନେଇ ଏକ ସାରଗର୍ଭକ ଅଭିଭାଷଣ ପ୍ରଦାନ କରିଥିଲେ । ସେ ଐତିହାସିକ ଗବେଷଣାର ମହତ୍ତ୍ୱ, ତୃଣମୂଳ ସ୍ତରରେ ହେଉଥିବା କାର୍ଯ୍ୟ ପଛରେ ଥିବା ଦୃଢ଼ତା ଏବଂ ଜଣେ ବ୍ୟକ୍ତିଙ୍କ ନିଜ ଦେଶର ଇତିହାସର ପୁନଃ ଅନାବରଣ ନିମନ୍ତେ ବିଶ୍ୱସ୍ତରରେ ଚିନ୍ତା କରିବା ସମ୍ପର୍କରେ ନିଜ ବକ୍ତବ୍ୟରେ କହିଥିଲେ । ସେ ବାସ୍ତବରେ ସମ୍ପ୍ରଦାୟ କୈନ୍ଦ୍ରିକ ଚିନ୍ତାଧାରା, ମହତ୍ତ୍ୱପୂର୍ଣ୍ଣ ଉପାଖ୍ୟାନ ଏବଂ ସନ୍ଦର୍ଭରେ ସାହିତ୍ୟିକ ପାଠର ପ୍ରତିଷ୍ଠିତତା ବିଚାରରେ ଉପସ୍ଥିତ ଜନମାନସକୁ ତେଜାଇ ଦେଇଥିଲେ । ଏଥିସହିତ ଏହି ଆଲୋଚନା ମାଧ୍ୟମରେ ଉପସ୍ଥିତ ଦର୍ଶକଙ୍କ ମଧ୍ୟରେ ଗ୍ରୀନବ୍ଲାଟଙ୍କ ନୂତନ ଐତିହାସିକତାବାଦ ବିଷୟରେ ଆହୁରି ଅଧିକ ଜାଣିବା ପାଇଁ ଉତ୍ସାହ ଜଗାଇଥିଲେ ।

ସମଗ୍ର ସେମିନାରକୁ ଉପସ୍ଥିତ ସମସ୍ତେ ଖୁବ୍ ଭଲଭାବରେ ହୃଦୟଙ୍ଗମ କରିଥିଲେ । ଫଳରେ କାର୍ଯ୍ୟକ୍ରମଟି ସକାରାତ୍ମକ ଭାବରେ ଶେଷ ହୋଇଥିଲା । ଏହି ସଫଳତା ଯୋଗୁଁ ଶ୍ରୀଯୁକ୍ତ ମହାନ୍ତି ଖୁବ୍ ଶୀଘ୍ର ଶ୍ରୀ ଶ୍ରୀ ବିଶ୍ୱବିଦ୍ୟାଳୟକୁ ଅନ୍ୟଏକ ପ୍ରାସଙ୍ଗିକ ବିଷୟବସ୍ତୁକୁ ନେଇ ପୁନର୍ବାର ଆସିବେ ବୋଲି ପ୍ରତିଶ୍ରୁତି ଦେଇଥିଲେ। ଡକ୍ଟର ପ୍ରୋନେମା ବାଗଚି ସେମିନାରରେ ମାଷ୍ଟର ଅଫ୍ ସେରିମନି ଥିଲେ । ଏମଏ ଛାତ୍ରୀ ଅତସୀ ସିହ୍ନା ପ୍ରଶ୍ନ-ଉତ୍ତର ଅଧିବେଶନକୁ ପରିଚାଳନା କରିଥିଲେ ଏବଂ ପରେ ଡକ୍ଟର ମଧୁମିତା ଦାସ ଧନ୍ୟବାଦ ଅର୍ପଣ କରିଥିଲେ । ସ୍ୱାତୀ, ସାଇ, ଲକ୍ଷ୍ମୀ, ସୁଶ୍ରୀ ଏବଂ ସମାପିକା ପ୍ରମୁଖ ଛାତ୍ରୀମାନେ ଅତିଥିମାନଙ୍କୁ ପ୍ରଦୀପ ପ୍ରଜ୍ଜ୍ୱଳନରେ ସାହାଯ୍ୟ କରିଥିଲେ ଏବଂ ଡିନଙ୍କୁ ପୁଷ୍ପଗୁଚ୍ଛ ପ୍ରଦାନ କରିଥିଲେ। କଳା, ଯୋଗାଯୋଗ ଏବଂ ଇଣ୍ଡିକ୍ ଷ୍ଟଡିଜ୍ (ଏଫ୍ଏସିଆଇଏସ୍) ର ଛାତ୍ରମାନଙ୍କ ପାଇଁ ସେମିନାର୍ ବାସ୍ତବରେଥିଲା ଏକ ଶିକ୍ଷଣୀୟ ବିଷୟ।