PM Kisan: ବୁଧବାର ଏହି ୪୬.୬୨ ଲକ୍ଷ ଚାଷୀ ଆକାଉଣ୍ଟରେ ଆସିବ ୭୦୦୦ ଲେଖାଁଏ ଟଙ୍କା

PM Kisan 21st installment: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଅର୍ଥାତ ୧୯ ନଭେମ୍ବର ୨୦୨୫(ବୁଧବାର)ରେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧିର ୨୧ତମ କିସ୍ତି ଜାରି କରିବେ। ଏହା ଅଧୀନରେ ଦେଶବ୍ୟାପୀ କୋଟି କୋଟି ଯୋଗ୍ୟ ଚାଷୀ ୨,୦୦୦ ଲେଖାଁଏ ଟଙ୍କା ପାଇବେ। ତଥାପି ପ୍ରାୟ ୪୬.୬୨ ଲକ୍ଷ ଚାଷୀ ୭୦୦୦ ଲେଖାଁଏ ଟଙ୍କା ପାଇବେ। ଯେଉଁଥିରେ ୨୦୦୦ ଟଙ୍କା କେନ୍ଦ୍ର ସରକାର ଓ ୫୦୦୦ ଟଙ୍କା ରାଜ୍ୟ ସରକାର ଟ୍ରାନ୍ସଫର କରିବେ।

ଆନ୍ଧ୍ର ପ୍ରଦେଶର ଚନ୍ଦ୍ରବାବୁ ନାଇଡୁ ସରକାର ଘୋଷଣା କରିଛନ୍ତି ଯେ "ଅନ୍ନଦାତା ସୁଖିଭବ" ଯୋଜନା ଅଧୀନରେ ଆସନ୍ତାକାଲି ୪.୬୬୨ ନିୟୁତ ଚାଷୀ ଏହି ଟଙ୍କା ପାଇବେ। ସରକାର କହିଛନ୍ତି ଯେ ଏହି ଯୋଜନା ଅଧୀନରେ ଆସନ୍ତାକାଲି ୪,୬୬୨,୯୦୪ ଚାଷୀଙ୍କ ଆକାଉଣ୍ଟକୁ ₹୫,୦୦୦ ଲେଖାଁଏ ଟ୍ରାନ୍ସଫର କରାଯିବ। ଏହି ଟଙ୍କା ପ୍ରଧାନମନ୍ତ୍ରୀ କିଷାନ ଯୋଜନା ଟ୍ରାନ୍ସଫର ସହିତ ସମାନ ସମୟରେ ବଣ୍ଟନ କରାଯିବ।

ଏହି ବିଜ୍ଞପ୍ତି ଆନ୍ଧ୍ରପ୍ରଦେଶର ସମସ୍ତ ୨୬ ଜିଲ୍ଲାରେ ଜାରି କରାଯାଇଛି। ମୃତ ଚାଷୀଙ୍କ ପରିବାରର ମନୋନୀତ ବ୍ୟକ୍ତିଙ୍କ ଆକାଉଣ୍ଟକୁ ପାଣ୍ଠି ଟ୍ରାନ୍ସଫର କରିବା ପାଇଁ ସରକାର ଅଧିକାରୀମାନଙ୍କୁ ପ୍ରୟାସ କରିବାକୁ କହିଛନ୍ତି।

ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ରାଶି ନଭେମ୍ବର ୧୯ ତାରିଖ ଦିନ ଅପରାହ୍ନ ୨ ଟାରେ ଟ୍ରାନ୍ସଫର  ହେବ। ଏହା କେନ୍ଦ୍ର ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧିର ୨୧ ତମ କିସ୍ତି ହେବ। ଯେଉଁ ଚାଷୀମାନେ ସେମାନଙ୍କର ଇ-କେୱାଇସି ପୂରଣ କରିନାହାଁନ୍ତି ସେମାନେ ସେମାନଙ୍କ ଆକାଉଣ୍ଟକୁ ଟଙ୍କା ଟ୍ରାନ୍ସଫର ହେବାରେ ସମସ୍ୟାର ସମ୍ମୁଖୀନ ହୋଇପାରନ୍ତି। ସରକାରୀ ନିର୍ଦ୍ଦେଶ ଅନୁଯାୟୀ କିଷାନ ସମ୍ମାନ ନିଧି ଯୋଜନାର ହିତାଧିକାରୀମାନଙ୍କୁ ଇ-କେୱାଇସି ପୂରଣ କରିବାକୁ ପଡିବ।

ପ୍ରଧାନମନ୍ତ୍ରୀ କିଷାନ ଯୋଜନା ଅଧୀନରେ ଚାଷୀମାନଙ୍କୁ ପ୍ରତିବର୍ଷ ୨୦୦୦ ଟଙ୍କା ଲେଖାଏଁ ତିନୋଟି କିସ୍ତିରେ ୬,୦୦୦ ଟଙ୍କା ପ୍ରଦାନ କରାଯାଏ। ଏପର୍ଯ୍ୟନ୍ତ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନା ଅଧୀନରେ ୨୦ଟି କିସ୍ତି ଟ୍ରାନସ୍ଫର କରାଯାଇଛି ଏବଂ ୨୧ ତମ କିସ୍ତି ବୁଧବାର ଆସିବ।

ସରକାର ୪ଟି ରାଜ୍ୟ ପଞ୍ଜାବ, ହିମାଚଳ, ଜମ୍ମୁ-କାଶ୍ମୀର ଏବଂ ଉତ୍ତରାଖଣ୍ଡର ଚାଷୀଙ୍କ ଆକାଉଣ୍ଟରେ ୨୧ତମ କିସ୍ତି ପ୍ରଦାନ କରିସାରିଛନ୍ତି। ଏହାର ଅର୍ଥ ହେଉଛି ଏହି ରାଜ୍ୟଗୁଡ଼ିକର ଚାଷୀମାନେ ଆସନ୍ତାକାଲି ୨୧ତମ କିସ୍ତିର ଟଙ୍କା ପାଇବେ ନାହିଁ।