Top 10 News Headlines: ଦିନ ଯାକର ପ୍ରମୁଖ ୧୦ ଖବର

Top 10 News Headlines Odisha

1.Lander Vikram Rover Pragyan Latest Update: ଚନ୍ଦ୍ରାୟନ-୩ ଅଭିଯାନରେ ବ୍ୟବହୃତ ହେଉଥିବା ସାମିଲ ହୋଇଥିବା ଲ୍ୟାଣ୍ଡର ବିକ୍ରମ ଏବଂ ରୋଭର ପ୍ରଜ୍ଞାନ ଏ ପର୍ଯ୍ୟନ୍ତ ଜାଗ୍ରତ ହୋଇନାହାଁନ୍ତି। ଅନ୍ୟପଟେ ଚନ୍ଦ୍ର ପୃଷ୍ଠରେ ସନ୍ଧ୍ୟା ହେବାକୁ ଯାଉଥିବା ବେଳେ ଶୀତ ରାତି ଫେରୁଛି। ହେଲେ ଇସ୍ରୋ ଦ୍ୱାରା ଚନ୍ଦ୍ର ପୃଷ୍ଠକୁ ପଠାଯାଇଥିବା ଲ୍ୟାଣ୍ଡର-ରୋଭର ଏପର୍ଯ୍ୟନ୍ତ ଜାଗ୍ରତ ହୋଇନାହାଁନ୍ତି। ବିକ୍ରମ-ପ୍ରଜ୍ଞାନ ଜାଗ୍ରତ ନ ହେବା ଏବେ ଚିନ୍ତାର ବିଷୟ ପାଲଟିଛି। ଯଦିଓ ଭାରତୀୟ ଗବେଷଣା ସଂସ୍ଥା ପକ୍ଷରୁ ଏନେଇ ପ୍ରୟାସ ଜାରି ରହିଛି। 

2.Cyber Security Campaign in Odisha: ସେପ୍ଟମ୍ବର ୩୦ ତାରିଖ ଶନିବାର କଳିଙ୍ଗ ଷ୍ଟାଡିୟମ ଠାରେ ସାଇବର ସୁରକ୍ଷା ଅଭିଯାନର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ପ୍ରାୟ ୩୪ ସାଇବର ସୁରକ୍ଷା ରଥ ରବିବାର ଠାରୁ ସାରା ରାଜ୍ୟର ବିଭିନ୍ନ ସ୍କୁଲ, କଲେଜ, ପଞ୍ଚାୟତ ଆଦି ଭ୍ରମଣ କରି ସାଇବର ସୁରକ୍ଷା ସମ୍ପର୍କରେ ଜନସାଧାରଣଙ୍କୁ ସଚେତନାର ବାର୍ତ୍ତା ପ୍ରଦାନ କରିବ। ବିଗତ କିଛି ବର୍ଷ ମଧ୍ୟରେ ରାଜ୍ୟ ସହିତ ସମଗ୍ର ଦେଶରେ ସାଇବର ଅପରାଧର (Cyber Crime) ମାତ୍ରା ଚିନ୍ତାଜନକ ଭାବେ ବୃଦ୍ଧି ପାଇଛି। ସଚେତନତା ଏବଂ ସତର୍କତା ଦିନକୁ ଦିନ ବଢି ଚାଲିଥିବା ସାଇବର ଅପରାଧକୁ ରୋକିବାର ଏକ ପ୍ରମୁଖ ଉପାୟ। ଏହାକୁ ନଜରରେ ରଖି ରାଜ୍ୟର ସବୁ ସ୍ତରରେ ଏ ସମ୍ପର୍କରେ ସଚେତନତା ଆଣିବା ପାଇଁ ଏହି ଅଭିଯାନ ଆରମ୍ଭ କରାଯାଇଛି।

3.Santali Language Dictionary Launch: ସେପ୍ଟମ୍ବର ୩୦ ତାରିଖ ଶନିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନବୀନ ନିବାସ ଠାରେ ଜନଜାତି ଭାଷା ସଂସ୍କୃତି ପ୍ରତିଷ୍ଠାନ ପକ୍ଷରୁ ପ୍ରକାଶିତ ସାନ୍ତାଳୀ-ଓଡିଆ-ଇଂରାଜୀ ଶଦ୍ଦକୋଷ ଲୋକାର୍ପଣ କରିଛନ୍ତି। ଏହା ସହିତ ସୌରା, କୁଇ, କୁଭି, ଗୋଣ୍ଡି, ମୁଣ୍ଡା ଭାଷାର ପ୍ରାଥମିକ ଶ୍ରେଣୀ ଲାଗି ଉଦ୍ଦିଷ୍ଟ ୨୧ ଅତିରିକ୍ତ ପାଠ୍ୟପୁସ୍ତକ ମଧ୍ୟ ଲୋକାର୍ପଣ କରିଛନ୍ତି। ଏହି ଅବସରରେ ଉପସ୍ଥିତ ଜନଜାତି ସମ୍ପ୍ରଦାୟର ପ୍ରତିନିଧିଙ୍କୁ ମୁଖ୍ୟମନ୍ତ୍ରୀ କହିଥିଲେ ଯେ ଏହି ଅଭିଧାନ ସାନ୍ତାଳୀ ଭାଷାକୁ ଆହୁରି ସମୃଦ୍ଧ କରିବ। ସାନ୍ତାଳୀ ଭାଷା ଶିକ୍ଷା କରିବା ପାଇଁ ଅନ୍ୟମାନଙ୍କ ମଧ୍ୟରେ ଆଗ୍ରହ ସୃଷ୍ଟି କରିବ। ପ୍ରାଥମିକ ଶିକ୍ଷା ପାଇଁ ଅତିରିକ୍ତ ପାଠ୍ୟପୁସ୍ତକ ଛାତ୍ରଛାତ୍ରୀଙ୍କ ପାଇଁ ବିଶେଷ ଉପଯୋଗୀ ହେବ। ଏନେଇ ନିଷ୍ଠାର ସହ କାମ କରିଥିବା ସନ୍ତାଳୀ ଭାଷାବିତ୍‌, ଗବେଷକ ଏବଂ ଜନଜାତି ଭାଷା ସଂସ୍କୃତି ପ୍ରତିଷ୍ଠାନକୁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଥିଲେ।   

4.Old Pension System in Odisha: ଅକ୍ଟୋବର ୧ ତାରିଖରେ ଦିଲ୍ଲୀର ରାମଳୀଳା ମଇଦାନ ଠାରେ ନୂତନ ପେନସନ୍ ଭୁକ୍ତ କର୍ମଚାରୀଙ୍କ ମହାସମାବେଶ ହେବାକୁ ଯାଉଛି। ଏଥିରେ ଦେଶର ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରୁ ପ୍ରାୟ ୫ ଲକ୍ଷରୁ ଉର୍ଦ୍ଧ୍ୱ କର୍ମଚାରୀ ଯୋଗଦେବେ। ଏହି ସମାବେଶରେ ରାଜ୍ୟର ବିଭିନ୍ନ ସଙ୍ଗଠନରୁ ୫ ହଜାରରୁ ଉର୍ଦ୍ଧ୍ଵ କର୍ମଚାରୀ ଯୋଗ ଦେବେ। ଦେଶରେ ବିଭିନ୍ନ ରାଜ୍ୟ ନିଜ କର୍ମଚାରୀଙ୍କ ଲାଗି ନୂତନ ପେନସନ୍ ଯୋଜନା ଉଚ୍ଛେଦ କରି ପୁରୁଣା ପେନସନ୍ ଲାଗୁ କରିଛନ୍ତି। କେନ୍ଦ୍ର ସରକାର ପୁରୁଣା ପେନସନ୍ ଲାଗୁ କରିବେ ନାଁ ନାହିଁ ସେ ନେଇ କିଛି ଜଣାପଡ଼ିନାହିଁ।

5.Congress Allegations against Rajanagar MLA: ବିଧାୟକ ଧ୍ରୁବ ଚରଣ ସାହୁଙ୍କ ବିରୋଧରେ ଗୁରୁତର ଅଭିଯୋଗ କରିଛି ରାଜନଗର ବ୍ଲକ କଂଗ୍ରେସ। ଏନେଇ ହୋଇଥିବା ଅଭିଯୋଗ ଅନୁଯାୟୀ ଜଙ୍ଗଲ ଜମି ଅବରୋଧ କରି ରାଜନଗର ବିଧାୟକ ଧ୍ରୁବ ସାହୁ ଡ଼ାଙ୍ଗମାଳ ଠାରେ ହୋଟେଲ କରିଛନ୍ତି। ଏନେଇ ରାଜନଗର ବନଖଣ୍ଡ ଅଧିକାରୀଙ୍କୁ ଅଭିଯୋଗ କରିବା ସହ ବିଧାୟକଙ୍କ କୁଶପୁତ୍ତଳିକା ଦାହ କରିଥିଲା ରାଜନଗର କଂଗ୍ରେସ। ଏହାର ଜବାବରେ ରାଜନଗର ବିଜୁ ଜନତା ଦଳ ତରଫରୁ ସମ୍ଭାଦିକ ସମିଳନୀ କରିବା ସହ ଏହା ବିଧାୟକଙ୍କ ନାମରେ ମିଥ୍ୟା ଅଭିଯୋଗ ବୋଲି ଦଳ ପକ୍ଷରୁ କୁହାଯାଇଛି। ଏହି ହୋଟେଲ ସାମ୍ବାଦିକ ସୂର୍ଯ୍ୟ ନାରାୟଣ ଲେଙ୍କାଙ୍କ ବୋଲି କୁହାଯାଇଛି। ଅପରପକ୍ଷରେ ହୋଟେଲ ମାଲିକ ସୂର୍ଯ୍ୟ ନାରାୟଣ ଲେଙ୍କା କହିଛନ୍ତି ଏହା ମୋ ହୋଟେଲ। ଏଥିରେ ବିଧାୟକଙ୍କର କୌଣସି ଭାଗିଦାରୀ ନାହିଁ।

6.Poshan Mah Orgnised at Sambalpur: ସେପ୍ଟମ୍ବର ୩୦ ତାରିଖ ରବିବାର ସମ୍ବଲପୁର ଠାରେ ଆୟୋଜିତ ହୋଇଯାଇଛି ଜିଲ୍ଲା ସ୍ତରୀୟ ପୋଷଣ ମାହ। ତପସ୍ୱିନୀ ହଲ୍ ଠାରେ ଆୟୋଜିତ ଏହି ଉତ୍ସବରେ ଜିଲ୍ଲାପାଳ ଅନନ୍ୟା ଦାସ କାର୍ଯ୍ୟକ୍ରମକୁ ଉଦଘାଟନ କରିଥିଲେ। ସମ୍ବଲପୁର ଜିଲ୍ଲା ପ୍ରଶାସନ ତଥା ଜିଲ୍ଲା ସମାଜ କଲ୍ୟାଣ ଦ୍ୱାରା ଆୟୋଜିତ ଏହି ପୋଷଣ ମାହ ଅବସରରେ ମହିଳାଙ୍କ ହିମୋଗ୍ଲୋବିନ ପରୀକ୍ଷା ସହ କିଭଳି ଖାଦ୍ୟ ନିଜ ପାଇଁ ଏବଂ ଶିଶୁଙ୍କ ପାଇଁ ଆବଶ୍ୟକ ସେ ବିଷୟରେ ଅବଗତ କରାଯିବା ସହ ଏକ ପ୍ରଦର୍ଶନୀ ଆୟୋଜିତ ହୋଇଥିଲା। ମାଣ୍ଡିଆରେ ପ୍ରସ୍ତୁତ ବିଭିନ୍ନ ଖାଦ୍ୟ ପ୍ରସ୍ତୁତ କରାଯାଇ ସମସ୍ତଙ୍କୁ କିଭଳି କରାଯାଇ ପାରିବ ସେ ଦିଗରେ ସମସ୍ତ ମହିଳାଙ୍କୁ ବୁଝାଯାଇଥିଲା।

7. Ratnabhandar Issue Puri: ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ମାମଲାରେ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି ଓଡ଼ିଶା ହାଇକୋର୍ଟ। ପ୍ରାୟ ୨ ମାସ ମଧ୍ୟରେ ଏକ ଉଚ୍ଚସ୍ତରୀୟ କମିଟି ଗଠନ କରି ରତ୍ନଭଣ୍ଡାର ଖୋଲି ରତ୍ନାଳଙ୍କାର ଗଣତି କରିବାକୁ ଶ୍ରୀମନ୍ଦିର ପରିଚାଳନା କମିଟି ସତ୍ଯପାଠ ଆଧାରରେ ରାୟ ପ୍ରକାଶ କରିଛନ୍ତି। ହାଇକୋର୍ଟଙ୍କ ଐତିହାସିକ ରାୟକୁ ଜଗନ୍ନାଥ ସେନା ସ୍ୱାଗତ କରିବା ସହ ଶ୍ରୀମନ୍ଦିର ସିଂହଦ୍ଵାର ସାମ୍ନାରେ ଦୀପଦାନ କରିଛନ୍ତି। ଜଗନ୍ନାଥ ସେନାର ଆବାହକ ପ୍ରୀୟଦର୍ଶନ ପଟ୍ଟନାୟକଙ୍କ ନେତୃତ୍ୱରେ ରବିବାର ଶ୍ରୀମନ୍ଦିର ନିକଟରେ ଭଜନ କୀର୍ତ୍ତନ କରିବା ସହ ଭକ୍ତଙ୍କ ମଧ୍ୟରେ ମିଠା ବାଣ୍ଟିଛନ୍ତି। ହେଲେ ବିଳମ୍ବରେ କାହିଁକି ପରିଚାଳନା କମିଟି ସତ୍ଯପାଠ ଦାଖଲ କଲା ବୋଲି ପ୍ରଶ୍ନ ଉଠାଇଛି ଜଗନ୍ନାଥ ସେନା। ଶୁଣାଣିର ଶେଷ ଦିନ ପରିଚାଳନା କମିଟି ସତ୍ଯପାଠ ଦାଖଲ କରିବା ଏବଂ ୨ ମାସ ସମୟ ମାଗିବା ଏହା ଏକ ଷଡଯନ୍ତ୍ର ହୋଇପାରେ ବୋଲି ଆଶଙ୍କା ପ୍ରକଟ କରିଛି ଜଗନ୍ନାଥ ସେନା।

8. Youth Mercilessly Attacked in Paradip: ରାସ୍ତାରେ ପାଣି ଛିଟିକି ପଡିବାରୁ ଗଣ୍ଡଗୋଳ। କଥା ଏପରି ହେଲା ଯେ ଗୋଡେଇ ଗୋଡେଇ କଟୁରୀରେ ଚୋଟ ପରେ ଚୋଟ ମାରି ଚାଲିଲେ ଯୁବକ। ପାରାଦୀପ ଲକ୍ ପଡା ଅଞ୍ଚଳରେ ଦେଖିବାକୁ ମିଳିଛି ଏଭଳି ଏକ ଅଭାବନୀୟ ଘଟଣା। ଶୁକ୍ରବାର ବିଳମ୍ବିତ ରାତିରେ ଲକ୍ ପଡା ଅଞ୍ଚଳର ଚିରନ୍ତନ ଘଡେଇ ରାସ୍ତା ଉପରେ ଛିଡ଼ା ହୋଇ ଥିବା ବେଳେ ବିଜୟଚାନ୍ଦପୁରର ମଦନ କଡି ସେହି ରାସ୍ତା ଦେଇ ବାଇକ୍ ଯୋଗେ ଯିବା ବେଳେ ଚିରନ୍ତନଙ୍କ ଉପରେ ପାଣି ଛିଟିକି ପଡ଼ିଥିଲା। ଚିରନ୍ତନ ଏହାର ପ୍ରତିବାଦ କରିବାରୁ ମଦନ ଘରୁ ଯାଇ ଏକ କଟୁରୀ ଆଣି ଚିରନ୍ତନଙ୍କୁ ଗୋଡେଇ ଗୋଡେଇ ହାଣିବା ସହ ତାଙ୍କ ବାଇକ ମଧ୍ଯ ହାଣି ଗୁଣ୍ଡ କରି ପକାଇଥିଲେ। ଚିରନ୍ତନଙ୍କୁ ଗୁରୁତର ଅବସ୍ଥାରେ ଅଠରବାଙ୍କୀ ବିଜୁ ମେମୋରିଆଲ ଡାକ୍ତରଖାନାରେ ଭର୍ତ୍ତି କରାଯାଇଛି। ଅନ୍ୟପଟେ ଆକ୍ରମଣକାରୀ ମଦନ ଫେରାର ହୋଇଯାଇଛି। 

9. Weather Update Odisha: ପୂର୍ବ କେନ୍ଦ୍ରୀୟ ବଙ୍ଗୋପ ସାଗର ତଥା ଏହାର ପାର୍ଶ୍ବବର୍ତ୍ତୀ ଅଞ୍ଚଳରେ ସକ୍ରିୟ ଲଘୁଚାପ କ୍ଷେତ୍ର ରବିବାର (ସେପ୍ଟମ୍ବର ୩୦) ଅଧିକ ସୁଦୃଶ୍ୟ ହେବା ସମ୍ଭାବନା ରହିଛି। ଏହା ଓଡ଼ିଶା ଆଡ଼କୁ ମୁହାଁଉଥିବାରୁ ରାଜ୍ୟରା ପ୍ରବଳ ବର୍ଷା ଆଶଙ୍କା ରହିଛି। ଆସନ୍ତା ୪ ତାରିଖ ପର୍ଯ୍ୟନ୍ତ ଏପରି ପରିସ୍ଥିତି ଲାଗି ରହିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି। ଏହା ସହିତ ୫ ଜିଲ୍ଲାକୁ ଅରେଞ୍ଜ ଓ୍ବାର୍ଣ୍ଣିଂ (Orange Warning) ଜାରି କରାଯାଇଛି।

10. Indra Gobinda Bandapana Rituals at Srimandir: ପବିତ୍ର ଇନ୍ଦୁପୂର୍ଣ୍ଣିମା ଅବସରରେ ଶ୍ରୀମନ୍ଦିରରେ ଅନୁଷ୍ଠିତ ହୋଇଛି ଇନ୍ଦ୍ରୋତ୍ସବ ପୂର୍ଣ୍ଣିମା ନୀତି। ଏଥିରେ ସିଂହଦ୍ଵାର ନିକଟରେ ଇନ୍ଦ୍ର ଗୋବିନ୍ଦ ବନ୍ଦାପନା ସହ ଇନ୍ଦ୍ର ହାତୀ ପ୍ରସ୍ତାବ ନୀତି ଅନୁଷ୍ଠିତ ହୋଇଯାଇଛି। ପରମ୍ପରା ଅନୁଯାୟୀ ଶ୍ରୀମନ୍ଦିରରେ ପ୍ରଭୁ ଦୋଳଗୋବିନ୍ଦ ଦକ୍ଷିଣି ଘର ଭୋଗ ଶେଷ ପରେ ମହାପ୍ରଭୁଙ୍କ ଆଜ୍ଞାମାଳ ପାଇ ଘଣ୍ଟାଘଣ୍ଟା ଛତି କାହାଳି ସହ ପାଲିଙ୍କିରେ ବିଜେ କରିଥିଲେ। ସିଂହଦ୍ଵାର ନିକଟ ବଡଛତା ମଠ ପାର୍ଶ୍ଵରେ ଥିବା ଟିକିରା ଗୋହୀରି ନିକଟକୁ ବିଜେ ହୋଇଥିଲେ। ସେଠାରେ ଶୀତଳ ଭୋଗ ହୋଇଥିଲା। ଏହା ପରେ ଇନ୍ଦ୍ରଚନ୍ଦ୍ର ଏବଂ ଗୋବିନ୍ଦଙ୍କୁ ବନ୍ଦାପନା କରାଯାଇଥିଲା। ପରେ ହରଚଣ୍ଡିସାହୀ ପକ୍ଷରୁ ଇନ୍ଦ୍ରହାତୀ ପ୍ରସ୍ତାବ ଓ ନାଟ ପରିବେଷଣ ହୋଇଥିଲା। କାଠରେ ନିର୍ମିତ ଐରାବତ ହାତୀ ପିଠିରେ ବସି ବେଶଧାରୀ ଇନ୍ଦ୍ର ହରଚଣ୍ଡିସାହୀ ଆଖଡା ଘରଠାରୁ ଶୋଭାଯାତ୍ରାରେ ବାଲିସାହି ଦେଇ ମନ୍ଦିରକୁ ଆସିଥିଲେ।