 "ಅನಿಲ್ ಅಂಬಾನಿ ನೇತೃತ್ವದ ಕಂಪನಿಯ 35 ಸ್ಥಳಗಳ ಮೇಲೆ ಇಡಿ ದಾಳಿ")
)
ನವದೆಹಲಿ: ಜಾರಿ ನಿರ್ದೇಶನಾಲಯ (ಇಡಿ) ಗುರುವಾರ ಬೆಳಿಗ್ಗೆ ಅನಿಲ್ ಅಂಬಾನಿ ನೇತೃತ್ವದ ರಿಲಯನ್ಸ್ ಅನಿಲ್ ಧೀರುಭಾಯ್ ಗ್ರೂಪ್ ಕಂಪನಿಗಳ ವಿರುದ್ಧ ಸಾಲ ವಂಚನೆ ತನಿಖೆಗೆ ಸಂಬಂಧಿಸಿ 35 ಸ್ಥಳಗಳಲ್ಲಿ ದಾಳಿ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ರಿಲಯನ್ಸ್ ಕಮ್ಯುನಿಕೇಷನ್ಸ್ (ಆರ್ಕಾಮ್) ಕಂಪನಿಯನ್ನು ‘ವಂಚನೆ’ ಎಂದು ವರ್ಗೀಕರಿಸಿ, ಇದರ ಮಾಜಿ ನಿರ್ದೇಶಕ ಅನಿಲ್ ಅಂಬಾನಿಯವರನ್ನು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾಕ್ಕೆ (ಆರ್ಬಿಐ) ವರದಿ ಮಾಡಲು ನಿರ್ಧರಿಸಿದ ಬೆನ್ನಲ್ಲೇ ಈ ಕಾರ್ಯಾಚರಣೆ ನಡೆದಿದೆ.ಇಡಿ ಪ್ರಸ್ತುತ 50ಕ್ಕೂ ಹೆಚ್ಚು ಕಂಪನಿಗಳು ಮತ್ತು 25 ವ್ಯಕ್ತಿಗಳ ಜಾಲವನ್ನು ತನಿಖೆಗೆ ಒಳಪಡಿಸಿದೆ. ಪ್ರಾಥಮಿಕ ತನಿಖೆಯಲ್ಲಿ, ಯೆಸ್ ಬ್ಯಾಂಕ್ನ ಪ್ರವರ್ತಕರು ರಿಲಯನ್ಸ್ ಗ್ರೂಪ್ ಕಂಪನಿಗಳಿಗೆ ದೊಡ್ಡ ಮೊತ್ತದ ಸಾಲವನ್ನು ಮಂಜೂರು ಮಾಡುವ ಮೊದಲು ತಮ್ಮ ವೈಯಕ್ತಿಕ ಖಾತೆಗಳಿಗೆ ಹಣ ಸ್ವೀಕರಿಸಿದ್ದಾರೆ ಎಂಬ ಸಂಗತಿ ಬೆಳಕಿಗೆ ಬಂದಿದ್ದು, ಇದು ಸಂಭಾವ್ಯ ಲಂಚ ವಿನಿಮಯವನ್ನು ಸೂಚಿಸುತ್ತದೆ.
ರಿಲಯನ್ಸ್ ಪವರ್ನಿಂದ ಸ್ಪಷ್ಟನೆ:
ರಿಲಯನ್ಸ್ ಪವರ್ ಕಂಪನಿಯು ಇಡಿಯ ಕಾರ್ಯಾಚರಣೆಯು ತನ್ನ ವ್ಯವಹಾರ ಕಾರ್ಯಾಚರಣೆ, ಆರ್ಥಿಕ ಕಾರ್ಯಕ್ಷಮತೆ, ಷೇರುದಾರರು, ಉದ್ಯೋಗಿಗಳು ಅಥವಾ ಇತರ ಪಾಲುದಾರರ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.ಮಾಧ್ಯಮ ವರದಿಗಳು ರಿಲಯನ್ಸ್ ಕಮ್ಯುನಿಕೇಷನ್ಸ್ ಲಿಮಿಟೆಡ್ (ಆರ್ಕಾಮ್) ಮತ್ತು ರಿಲಯನ್ಸ್ ಹೋಮ್ ಫೈನಾನ್ಸ್ ಲಿಮಿಟೆಡ್ (ಆರ್ಎಚ್ಎಫ್ಎಲ್) ಸಂಬಂಧಿತ 10 ವರ್ಷಗಳಿಗಿಂತ ಹಳೆಯ ವಹಿವಾಟುಗಳ ಆರೋಪಗಳಿಗೆ ಸಂಬಂಧಿಸಿವೆ ಎಂದು ಕಂಪನಿ ತಿಳಿಸಿದೆ.
“ರಿಲಯನ್ಸ್ ಪವರ್ ಒಂದು ಪ್ರತ್ಯೇಕ ಮತ್ತು ಸ್ವತಂತ್ರ ಪಟ್ಟಿಮಾಡಲಾದ ಕಂಪನಿಯಾಗಿದ್ದು, ಆರ್ಕಾಮ್ ಅಥವಾ ಆರ್ಎಚ್ಎಫ್ಎಲ್ನೊಂದಿಗೆ ಯಾವುದೇ ವ್ಯಾಪಾರ ಅಥವಾ ಆರ್ಥಿಕ ಸಂಬಂಧವಿಲ್ಲ. ಆರ್ಕಾಮ್ ಕಳೆದ 6 ವರ್ಷಗಳಿಂದ ದಿವಾಳಿತನ ಮತ್ತು ದಿವಾಳಿತನ ಕಾಯ್ದೆ, 2016 ರ ಅಡಿಯಲ್ಲಿ ಕಾರ್ಪೊರೇಟ್ ಇನ್ಸಾಲ್ವೆನ್ಸಿ ರೆಸಲ್ಯೂಷನ್ ಪ್ರಕ್ರಿಯೆಯಲ್ಲಿದೆ,” ಎಂದು ಕಂಪನಿ ಹೇಳಿದೆ.ಆರ್ಎಚ್ಎಫ್ಎಲ್ ವಿಷಯವು ಸುಪ್ರೀಂ ಕೋರ್ಟ್ನ ತೀರ್ಪಿನ ಅನುಸಾರವಾಗಿ ಸಂಪೂರ್ಣವಾಗಿ ಬಗೆಹರಿಸಲ್ಪಟ್ಟಿದೆ. ಮಾಧ್ಯಮ ವರದಿಗಳಲ್ಲಿ ತಿಳಿಸಲಾದ ಆರೋಪಗಳು ಈಗಲೂ ಸೆಕ್ಯುರಿಟೀಸ್ ಅಪಿಲೇಟ್ ಟ್ರಿಬ್ಯೂನಲ್ನಲ್ಲಿ ವಿಚಾರಣೆಯಲ್ಲಿದ್ದು, ನ್ಯಾಯಾಲಯದಲ್ಲಿ ಬಾಕಿಯಿದೆ. ಇದಲ್ಲದೆ, ಅನಿಲ್ ಡಿ. ಅಂಬಾನಿ ಅವರು ರಿಲಯನ್ಸ್ ಪವರ್ನ ನಿರ್ದೇಶಕ ಮಂಡಳಿಯಲ್ಲಿಲ್ಲ. ಆದ್ದರಿಂದ, ಆರ್ಕಾಮ್ ಅಥವಾ ಆರ್ಎಚ್ಎಫ್ಎಲ್ ವಿರುದ್ಧ ಕೈಗೊಂಡ ಯಾವುದೇ ಕ್ರಮವು ರಿಲಯನ್ಸ್ ಪವರ್ನ ಆಡಳಿತ, ನಿರ್ವಹಣೆ ಅಥವಾ ಕಾರ್ಯಾಚರಣೆಯ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ರಿಲಯನ್ಸ್ ಪವರ್ ತನ್ನ ವ್ಯವಹಾರ ಯೋಜನೆಗಳ ಮೇಲೆ ಕೇಂದ್ರೀಕರಿಸುವುದನ್ನು ಮುಂದುವರೆಸಿದ್ದು, ಎಲ್ಲಾ ಪಾಲುದಾರರಿಗೆ ಮೌಲ್ಯವನ್ನು ಸೃಷ್ಟಿಸಲು ಬದ್ಧವಾಗಿದೆ ಎಂದು ಕಂಪನಿ ತಿಳಿಸಿದೆ.
