Who is JP Tuminadu: ಕನ್ನಡ ಚಿತ್ರರಂಗದಲ್ಲಿ ಹೊಸ ಭರವಸೆ ಹುಟ್ಟುಹಾಕಿದ ಸಿನಿಮಾ ʼಸು ಫ್ರಮ್ ಸೋ' ನಿರ್ದೇಶಕ ಜೆಪಿ ತುಮಿನಾಡ್ ಯಾರು? ಅವರ ಹಿನ್ನಲೆ ಏನೆಂಬುದನ್ನು ಈ ವರದಿಯಲ್ಲಿ ನೋಡೋಣ.
)
Who is JP Tuminadu: ಕನ್ನಡ ಚಿತ್ರರಂಗದಲ್ಲಿ ಹೊಸ ಭರವಸೆ ಹುಟ್ಟುಹಾಕಿದ ಸಿನಿಮಾ ʼಸು ಫ್ರಮ್ ಸೋ' ಭರ್ಜರಿ ಯಶಸ್ಸು ಕಂಡಿದೆ. ಯಾವುದೇ ಅಬ್ಬರ ಪ್ರಚಾರ ಇರಲಿಲ್ಲ.. ದೊಡ್ಡ ದೊಡ್ಡ ನಟ-ನಟಿಯರ ಮೂಲಕ ಸಿನಿಮಾದ ಬಗ್ಗೆ ಅನಿಸಿಕೆಯನ್ನೂ ಹೇಳಿಸಲಿಲ್ಲ... ಮೇಲಾಗಿ ಸ್ಟಾರ್ ಹೀರೋ-ಹೀರೋಯಿನ್ಗಳನ್ನ ಸೇರಿಸಿ ಪ್ಯಾನ್ ಇಂಡಿಯಾ ಎಂದು ಅನಾವಶ್ಯಕ ವಿಚಾರವನ್ನೂ ಪ್ರಸ್ತುತ ಪಡಿಸಿಲ್ಲ... ʼಕಥೆಯೇ ಈ ಚಿತ್ರದ ಜೀವಾಳ, ಕಥೆಯೇ ಈ ಸಿನಿಮಾದ ಹೀರೋʼ ಎಂದು ತೋರಿಸಿರುವ ಈ ಚಿತ್ರ ಕೇವಲ ಮೂರು ದಿನದಲ್ಲಿ ಬರೋಬ್ಬರಿ 6.81 ಕೋಟಿ ಕಲೆಕ್ಷನ್ ಮಾಡಿದೆ.
ಇಷ್ಟು ಸಕ್ಸಸ್ ಕಂಡಿರುವ ಸಿನಿಮಾವನ್ನು ನಿರ್ದೇಶನ ಮಾಡಿರುವುದು ಜೆಪಿ ತುಮಿನಾಡ್. ಈ ವ್ಯಕ್ತಿ ಸಿನಿಮಾ ರಂಗಕ್ಕೆ ಹೊಸಬರೇನಲ್ಲ. ಒಂದು ಮೊಟ್ಟೆಯ ಕಥೆ ಸಿನಿಮಾ ಸೇರಿದಂತೆ ಕೆಲವೊಂದು ಕನ್ನಡ ಸಿನಿಮಾಗಳಲ್ಲಿಯೂ ಕೆಲಸ ಮಾಡಿದ್ದಾರೆ. ಆದರೆ ನಿರ್ದೇಶಕನಾಗಿ ಇಷ್ಟರ ಮಟ್ಟಿಗೆ ಯಶಸ್ವಿ ಜರ್ನಿ ಕೈಗೊಂಡಿದ್ದು ಇದೇ ಮೊದಲು. ಅಂದಹಾಗೆ ಇವರು ರಾಜ್ ಬಿ ಶೆಟ್ಟಿಯವರ ಗರಡಿಯಲ್ಲಿ ಪಳಗಿದ ಕೂಸು.
ನಿರ್ದೇಶಕ ಜೆಪಿ ತುಮಿನಾಡ್ ಅವರ ಪೂರ್ಣ ಹೆಸರು ಜಯಪ್ರಕಾಶ್ ತುಮಿನಾಡ್. ಕರಾವಳಿಯ ಈ ಪ್ರತಿಭೆಗೆ ಸುಮಾರು 14 ವರ್ಷಗಳ ರಂಗಭೂಮಿ ನಂಟಿದೆ. ನಟನೆಯ ಜೊತೆಗೆ, ನಾಟಕ ರಚನೆ, ನಿರ್ದೇಶನವನ್ನೂ ಜೆಪಿ ತುಮಿನಾಡ್ ಮಾಡುತ್ತಿದ್ದರು. ಬಾಲ್ಯದಿಂದಲೇ ಕಥೆಗಳನ್ನು ಬರೆಯುವಲ್ಲಿ ನಿಪುಣರಾಗಿದ್ದ ಅವರು, ತುಳು ಸಾಮಾಜಿಕ-ಹಾಸ್ಯ ನಾಟಕಗಳಿಗೆ ಕಥೆಗಳನ್ನು ಬರೆದು ನಿರ್ದೇಶನ ಮಾಡುತ್ತಿದ್ದರು.
ನಾಟಕಗಳಿಗೆ ಕಥೆ ಬರೆಯುತ್ತಿದ್ದ ಜೆಪಿ ತುಮಿನಾಡ್ ಅವರು, ಚಲನಚಿತ್ರ ಮಾಡುವ ಆಸೆಯನ್ನು ಬೆಳೆಸಿಕೊಂಡರು. ಈ ಹಿನ್ನೆಲೆಯಲ್ಲಿ ಸಿನಿಮಾಗೆ ಕಥೆ ಬರೆದರು. ಅದಾದ ಕೆಲ ಸಮಯದ ಬಳಿಕ ಅವರು ಭೇಟಿಯಾಗಿದ್ದು ಕನ್ನಡದ ಹೆಸರಾಂತ ನಟ, ನಿರ್ದೇಶಕ ರಾಜ್ ಬಿ. ಶೆಟ್ಟಿ ಅವರನ್ನು... ಆ ಭೇಟಿಯೇ ಜೆಪಿ ತುಮಿನಾಡ್ ಜೀವನಕ್ಕೆ ಮಹತ್ವದ ತಿರುವನ್ನು ನೀಡಿತು. ಏಕೆಂದರೆ ರಾಜ್ ಬಿ ಶೆಟ್ಟಿ ಅವರ ಭೇಟಿ ಬಳಿಕ ಸಿನಿಮಾದಲ್ಲಿ ಕಥೆ ಎಂದರೇನು? ಚಿತ್ರಕಥೆ ಎಂದರೇನು? ಎಂಬುದನ್ನು ಸ್ಪಷ್ಟವಾಗಿ ತಿಳಿದುಕೊಂಡು, ಹೊಸ ಆಲೋಚನೆಗಳೊಂದಿಗೆ ಮತ್ತೆ ಕಥೆ ಬರೆಯಲು ಸಾಧ್ಯವಾಗಿತ್ತು.
'ಸು ಫ್ರಮ್ ಸೋ' ಚಿತ್ರ ಮಾಡುವ ಮೊದಲು, ಜೆಪಿ ತುಮಿನಾಡ್ ಕೆಲವು ಚಿತ್ರಗಳಲ್ಲಿ ಸಹಾಯಕರಾಗಿ ಕೆಲಸ ಮಾಡಿದ್ದರು. ರಾಜ್ ಬಿ ಶೆಟ್ಟಿ ಅವರ 'ಗರುಡ ಗಮನ ವೃಷಭ ವಾಹನ', 'ಸಪ್ತ ಸಾಗರದಾಚೆ ಎಲ್ಲೋ' ಮತ್ತು 'ಸ್ವಾತಿ ಮುತ್ತಿನ ಮಳೆ ಹನಿಯೇ' ಚಿತ್ರಗಳಲ್ಲಿ ತೆರೆಮರೆಯಲ್ಲಿ ಕೆಲಸ ಮಾಡಿದ್ದಾರೆ. 'ಸಪ್ತ ಸಾಗರದಾಚೆ ಎಲ್ಲೋ: ಸೈಡ್ ಬಿ' ಚಿತ್ರದಲ್ಲಿ ನಾಯಕಿ ರುಕ್ಮಿಣಿಯ ಗಂಡನ ಪಾತ್ರದಲ್ಲಿ ನಟಿಸಿದ್ದು ಇವರೇ...
'ಸು ಫ್ರಮ್ ಸೋ' ಚಿತ್ರದಲ್ಲಿ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ ಅನೇಕ ಕಲಾವಿದರೊಂದಿಗೆ ಜೆಪಿ ತಮಿನಾಡ್ ರಂಗಭೂಮಿಯಲ್ಲಿ ಕೆಲಸ ಮಾಡುತ್ತಿದ್ದರು. ಕಾಂತಾರ, ಸಹಿಪ್ರಾ ಶಾಲೆ ಕಾಸರಗೋಡು ಸಿನಿಮಾ ಖ್ಯಾತಿಯ ನಟ ಪ್ರಕಾಶ್ ತುಮಿನಾಡ್ ಮತ್ತು ಜೆಪಿ ತುಮಿನಾಡ್ ಒಂದೇ ಊರಿನವರು. ಅಷ್ಟೇ ಅಲ್ಲದೆ ಒಟ್ಟಾಗಿ ಒಂದೇ ನಾಟಕ ತಂಡದಲ್ಲಿ ದುಡಿದವರು. ಮುಖ್ಯವಾಗಿ ಹೇಳುವುದಾದರೆ ಜೆಪಿ ಅವರನ್ನು ಚಿತ್ರರಂಗಕ್ಕೆ ಕರೆತಂದವರೇ ಪ್ರಕಾಶ್ ತುಮಿನಾಡ್ ಎಂದು ಹೇಳಲಾಗುತ್ತಿದೆ.
'ಸು ಫ್ರಮ್ ಸೋ' ಚಿತ್ರದ ಬಗ್ಗೆ ಹೇಳುವುದಾದರೆ, ಜೆಪಿ ಅವರು, ಈ ಚಿತ್ರದ ಕಥೆಯನ್ನು ೨೦೧೯ ರಲ್ಲಿಯೇ ಬರೆದಿದ್ದರಂತೆ. ಆ ಸಂದರ್ಭದಲ್ಲೇ ಚಿತ್ರ ನಿರ್ದೇಶಿಸುವ ಆಲೋಚನೆ ಇತ್ತಾದರೂ ಕೋವಿಡ್ ಮತ್ತು ಇತರ ಚಿತ್ರಗಳಿಂದಾಗಿ,ಸಾಧ್ಯವಾಗಲಿಲ್ಲ. ಆ ಬಳಿಕ ಆರು ವರ್ಷಗಳಲ್ಲಿ ಪಡೆದ ಅನುಭವವನ್ನು ಸೇರಿಸಿ ಈ ಚಿತ್ರ ತಯಾರಿ ಮಾಡಿದ್ದು, ಹಾಗಾಗೇ ಇಷ್ಟು ಚೆನ್ನಾಗಿ ಮೂಡಿಬಂದಿದೆ ಎಂದು ನಿರ್ದೇಶಕ ಜೆಪಿ ತುಮಿನಾಡ್ ಹೇಳುತ್ತಾರೆ.
