ನೀತಿ ಸಂಹಿತೆ ಅವಧಿಯಲ್ಲಿ ನಮೋ ಟಿವಿ ಚುನಾವಣಾ ವಿಷಯ ಪ್ರಸಾರ ಮಾಡುವಂತಿಲ್ಲ-ಚುನಾವಣಾ ಆಯೋಗ ಸೂಚನೆ

ನವದೆಹಲಿ: ಚುನಾವಣಾ ಅವಧಿಯಲ್ಲಿ ನಮೋ ಟಿವಿ ಚುನಾವಣಾ ವಿಷಯಗಳನ್ನು ಪ್ರಸಾರ ಮಾಡುವಂತಿಲ್ಲವೆಂದು ಚುನಾವಣಾ ಆಯೋಗ ಸೂಚನೆ ನೀಡಿದೆ.ಉಳಿದ ಆರು ಹಂತದ ಚುನಾವಣೆಗಳಲ್ಲಿ ನಮೋ ಟಿವಿ ಚುನಾವಣಾ ಆಯೋಗದ ನಿರ್ದೇಶನಗಳನ್ನು ಅನುಸುತ್ತದೆಯೇ ಇಲ್ಲವೇ ಎನ್ನುವ ಕುರಿತಾಗಿ ದೆಹಲಿಯ ಚುನಾವಣಾಧಿಕಾರಿಗಳು ಪರಿಶೀಲಿಸಬೇಕೆಂದು ಆಯೋಗ ಸೂಚಿಸಿದೆ.

ದೆಹಲಿ ಚುನಾವಣಾಧಿಕಾರಿ ನೋಡಲ್ ಅಧಿಕಾರಿಯಾಗಿರುವುದರಿಂದ ರಾಷ್ಟ್ರಿಯ ಮಟ್ಟದಲ್ಲಿನ ರಾಜಕೀಯ ವಿಷಯಗಳನ್ನು ಪ್ರಮಾಣಿಕರಿಸುವ ಸಲುವಾಗಿ ನಿರ್ದೇಶನ ನೀಡಲಾಗಿದೆ. ಇದಕ್ಕಾಗಿ ವಿಶೇಷ ಸಮಿತಿಯೊಂದನ್ನು ರಚನೆ ಮಾಡಲಾಗಿದೆ.ಜನಪ್ರತಿನಿಧಿ ಕಾಯ್ದೆಯ ವಿಭಾಗ 126 ಚುನಾವಣೆಯ 48 ಗಂಟೆಗಳ ಮೊದಲು ಸಿನೆಮಾಟೊಗ್ರಾಫ್, ದೂರದರ್ಶನ ಅಥವಾ ಇತರ ರೀತಿಯ ಉಪಕರಣದ ಮೂಲಕ ಚುನಾವಣಾ ವಿಷಯವನ್ನು ಪ್ರಸಾರ ಮಾಡುವುದನ್ನು ನಿಷೇಧಿಸುತ್ತದೆ.

ಈ ಅವಧಿಯನ್ನು ಮೌನದ ಕಾಲಾವಧಿ ಎಂದು ಕರೆಯಲಾಗುತ್ತದೆ.ಈ ವೇಳೆ ಮತದಾರ ಯಾವುದೇ ರೀತಿಯ ರಾಜಕೀಯ ಪ್ರಚಾರಕ್ಕೆ ಒಳಗಾಗದೆ ಮತ ಹಾಕಲು ಈ ಸಮಯ ಅವಕಾಶ ನೀಡುತ್ತದೆ.ಈಗ ಚುನಾವಣಾ ಆಯೋಗದ ನಿಯಮವನ್ನು ನಮೋ ಟಿವಿ ಪಾಲಿಸುತ್ತಿದೆಯೋ ಇಲ್ಲವೋ ಎನ್ನುವುದರ ಕುರಿತಾಗಿ ಅದು ಮತ್ತೊಮ್ಮೆ ಸ್ಪಷ್ಟನೆ ಕೇಳಿದೆ.