ಶಾಲಾ ಮೈದಾನಕ್ಕೆ ಕಾಂಪೌಂಡ್ ಬೇಕು ಎಂದು ಪಿಎಂ, ಸಿಎಂಗೆ ಪತ್ರ ಬರೆದ 4ನೇ ತರಗತಿ ಬಾಲಕಿ

Tumkur: ತುಮಕೂರು ಜಿಲ್ಲೆಯ ತಾಲ್ಲೂಕಿನ ಬೆಳೆದರ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿನಿ ಸಿಮ್ರಾ ಸನೋಬರ್ ಇದೀಗ ಮಾದರಿಯಾಗಿದ್ದಾಳೆ. ಕೇವಲ 4ನೇ ತರಗತಿಯಲ್ಲಿರುವ ಈ ಬಾಲಕಿ, ತನ್ನ ಶಾಲೆಯ ಆಟದ ಮೈದಾನಕ್ಕೆ ಕಾಂಪೌಂಡ್ ನಿರ್ಮಿಸುವಂತೆ ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಹಾಗೂ ಕರ್ನಾಟಕದ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರಿಗೆ ಪತ್ರ ಬರೆದು ಮನವಿ ಮಾಡಿಕೊಂಡಿದ್ದಾಳೆ.

ಈ ಹಿಂದೆ, 2024ರಲ್ಲಿ ಆಕೆ ಶಾಲೆಯ ಕ್ಷೇತ್ರ ಶಿಕ್ಷಣಾಧಿಕಾರಿ (BEO) ಅವರಿಗೆ ಕೂಡ ಇದೇ ವಿಷಯವಾಗಿ ಪತ್ರ ಬರೆದು ಮನವಿ ಮಾಡಿದ್ದಳು. ಅಂದಿನ ಸಮಯದಲ್ಲಿ ಅಧಿಕಾರಿಗಳು ಆಕೆಗೆ ಆಶ್ವಾಸನೆ ನೀಡಿದ್ದರು. ಆದರೆ, ಒಂದು ವರ್ಷ ಕಳೆದರೂ ಯಾವುದೇ ಕೆಲಸ ಪ್ರಾರಂಭವಾಗದ ಹಿನ್ನೆಲೆ, ಇದೀಗ ಸಿಮ್ರಾ ತನ್ನ ಧೈರ್ಯಮಯ ತೀರ್ಮಾನದಿಂದ ಪಿಎಂ ಮತ್ತು ಸಿಎಂ ಅವರಿಗೆ ನೇರವಾಗಿ ಪತ್ರ ಬರೆದಿರುವುದು ಗಮನ ಸೆಳೆದಿದೆ.

ಸಿಮ್ರಾ ತನ್ನ ಪತ್ರದಲ್ಲಿ ಶಾಲೆಯ ಆಟದ ಮೈದಾನದಲ್ಲಿ ಸ್ಥಳೀಯ ಕಲ್ಯಾಣ ಮಂಟಪಕ್ಕೆ ಬರುವ ಕಾರುಗಳು, ಬಸ್ಸುಗಳು ನಿಲ್ಲುತ್ತಿದ್ದು, ಅದರಿಂದ ಮಕ್ಕಳಿಗೆ ಆಟವಾಡಲು ಭಯವಾಗುತ್ತಿದೆ ಎಂದು ಉಲ್ಲೇಖಿಸಿದ್ದಾಳೆ. "ಆಟದ ಮೈದಾನವು ನಮ್ಮ ಪಾಲಿಗೆ ಸುರಕ್ಷಿತವಲ್ಲ. ಕಾರುಗಳು ನಿಲ್ಲುತ್ತಿವೆ, ಆಟವಾಡುವಾಗ ಅಪಾಯವಾಗಬಹುದು. ಈ ಕಾರಣಕ್ಕಾಗಿ ಮೈದಾನಕ್ಕೆ ತುರ್ತುವಾಗಿ ಕಾಂಪೌಂಡ್ ಅಗತ್ಯ" ಎಂದು ಆಕೆ ಮನವಿ ಮಾಡಿದ್ದಾಳೆ.

ಇದೇ ಕಾರಣದಿಂದಾಗಿ, ಸಿಮ್ರಾ ತನ್ನ ತೀರ್ಮಾನವನ್ನು ಪತ್ರದಲ್ಲಿ ಸ್ಪಷ್ಟವಾಗಿ ಉಲ್ಲೇಖಿಸಿದ್ದು, "ಕಾಂಪೌಂಡ್ ನಿರ್ಮಾಣ ಆಗೋವರೆಗೆ ನಾನು ಶಾಲೆಗೆ ಬರೋದಿಲ್ಲ" ಎಂಬ ಧೈರ್ಯಮಯ ಮಾತುಗಳಿಂದ ಪತ್ರವನ್ನು ಮುಕ್ತಾಯಗೊಳಿಸಿದ್ದಾಳೆ.