ಮೈಸೂರು ಮಹಾನಗರ ಪಾಲಿಕೆ: ಕಾಂಗ್ರೆಸ್ 'ಕೈ'ಗೆ ಒಲಿದ ಮೇಯರ್ ಸ್ಥಾನ, ಉಪಮೇಯರ್ ಜೆಡಿಎಸ್ ಗೆ

ಬೆಂಗಳೂರು: ಶನಿವಾರದಂದು ಮೈಸೂರು ಮಹಾನಗರ ಪಾಲಿಕೆ ಮೇಯರ್ ಮತ್ತು ಉಪಮೇಯರ್ ಆಯ್ಕೆಗಾಗಿ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷವು ಮೇಯರ್ ಸ್ಥಾನವನ್ನು ಪಡೆದರೆ ಜೆಡಿಎಸ್ ಉಪ ಮೇಯರ್ ಸ್ಥಾನಕ್ಕೆ ತೃಪ್ತಿಪಟ್ಟಿದೆ.

ಆ ಮೂಲಕ  ಕಾಂಗ್ರೆಸ್ ಪಕ್ಷದ ಪುಷ್ಪಲತಾ ಜಗನಾಥ್ ಮೇಯರ್ ಆಗಿ ಆಯ್ಕೆಯಾದರೆ ಜೆಡಿಎಸ್ ನ ಶಫಿ ಅಹಮದ್ ಉಪಮೇಯರ್ ಆಗಿ ಆಯ್ಕೆಯಾಗಿದ್ದಾರೆ. ಕಾಂಗ್ರೆಸ್ ಪಕ್ಷದಲ್ಲಿ ಮೇಯರ್ ಸ್ಥಾನಕ್ಕೆ ಪುಷ್ಪಲತಾ ಜಗನ್ನಾಥ್, ಶಾಂತಕುಮಾರಿ, ಶೋಭಾ ಸುನೀಲ್, ಪುಟ್ಟನಿಂಗಮ್ಮ, ಹಜೀರಾ ಸೀಮಾ ನಡುವೆ ಸ್ಪರ್ಧೆ ಇತ್ತು. ಆದರೆ ಅಂತಿಮವಾಗಿ  ಇವರಲ್ಲಿ ಪುಷ್ಪಾಲತಾ ಅವರ ಹೆಸರನ್ನು ಕಾಂಗ್ರೆಸ್ ನಾಯಕರು ಫೈನಲ್ ಮಾಡಿದ್ದಾರೆ. ಈ ಬಾರಿ ಸಾಮಾನ್ಯ ವರ್ಗದ ಮಹಿಳೆಗೆ ಮೇಯರ್ ಸ್ಥಾನ ಮೀಸಲಾಗಿದೆ. ಹಿಂದುಳಿದ ವರ್ಗದ ಬಿ. ವರ್ಗಕ್ಕೆ ಉಪಮೇಯರ್ ಸ್ಥಾನ ಮೀಸಲಾಗಿದೆ.‌

ಮೈಸೂರು ಮಹಾನಗರ ಪಾಲಿಕೆಯ ನೂತನ ಮೇಯರ್ ಆಗಿ ಆಯ್ಕೆಯಾಗಿರುವ ಪುಷ್ಪಲತಾ ಜಗನ್ನಾಥ್ ಹಾಗೂ ಉಪಮೇಯರ್ ಶಫಿ ಅಹಮದ್ ಅವರಿಗೆ ಅಭಿನಂದನೆಗಳು. ತಮ್ಮ ಆಡಳಿತಾವಧಿಯಲ್ಲಿ ನಗರದಲ್ಲಿ ಮತ್ತಷ್ಟು ಅಭಿವೃದ್ಧಿ ಕಾರ್ಯಗಳು ನಡೆಯಲಿ ಎಂದು ಹಾರೈಸುತ್ತೇನೆ.#Mysore @INCKarnataka pic.twitter.com/ayY6qCQ5AC

— Siddaramaiah (@siddaramaiah) November 17, 2018

ಇನ್ನು ಉಪಮೇಯರ್ ಆಗಿ ಜೆಡಿಎಸ್​ನ ಶಫಿ ಅಹಮ್ನದ್ ಆಯ್ಕೆಯಾಗಿದ್ದಾರೆ. ಮೈತ್ರಿ ಪಕ್ಷಗಳ ಅಭ್ಯರ್ಥಿಯಾಗಿ ಉಪಮೇಯರ್​ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಜೆಡಿಎಸ್​ನ ಶಫಿ ಅಹಮ್ಮದ್​ ಭರ್ಜರಿ ಜಯ ಸಾಧಿಸಿದರು. ಮೇಯರ್ ಸ್ಥಾನದ ಆಯ್ಕೆಗಾಗಿ ನಿನ್ನೆ ನಡೆದ ಸಭೆಯಲ್ಲಿ ಮೊದಲ ಅವಧಿಗೆ ಕಾಂಗ್ರೆಸ್ ಬಿಟ್ಟುಕೊಡಲಾಗಿದೆ ಮತ್ತು  ಐದು ವರ್ಷಗಳ ಅಧಿಕಾರವಧಿಯನ್ನು 2:3 ರ ಅನುಪಾತದಲ್ಲಿ ಹಂಚಿಕೊಳ್ಳಲು ನಿರ್ಧರಿಸಲಾಗಿದೆ. ಈ ಹಿನ್ನಲೆಯಲ್ಲಿ  ಎರಡು ವರ್ಷಗಳ ಕಾಲ ಇಬ್ಬರು ಕಾಂಗ್ರೆಸ್ ಸದಸ್ಯರು ಮೇಯರ್ ಆಗಲಿದ್ದಾರೆ. ಉಳಿದ ಮೂರು ವರ್ಷಗಳಲ್ಲಿ ಜೆಡಿಎಸ್  ಮೇಯರ್ ಸ್ಥಾನವನ್ನು ಹೊಂದಲಿದೆ. 

​ಮೈಸೂರು ಪಾಲಿಕೆಯಲ್ಲಿ ಪಕ್ಷಗಳ ಸದಸ್ಯರ ಬಲಾಬಲ

ಒಟ್ಟು ಸದಸ್ಯರು    -     65
ಕಾಂಗ್ರೆಸ್​           -    19
ಜೆಡಿಎಸ್​            -    18
ಬಿಜೆಪಿ               -    22
ಬಿಎಸ್​ಪಿ            -     1
ಪಕ್ಷೇತರರು         -     5