Dharmasthala Case: ಕೇಸ್‌ ಹಿಂಪಡೆಯುವಂತೆ ಅನಾಮಿಕನಿಗೆ ಇನ್ಸ್​​ಪೆಕ್ಟರ್​ನಿಂದ ಬೆದರಿಕೆ!? ಒತ್ತಡ ಹೇರಿದ ಆ ಎಸ್‌ಐ ಯಾರು ಗೊತ್ತಾ?

ಧರ್ಮಸ್ಥಳದಲ್ಲಿ ನೂರಾರು ಶವಗಳನ್ನು ಹೂಳಲಾಗಿದೆ ಎಂಬ ಆರೋಪಗಳ ತನಿಖೆ ತೀವ್ರಗೊಂಡಿದೆ. ಈಗಾಗಲೇ ಅನಾಮಿಕ ವ್ಯಕ್ತಿ ಗುರುತಿಸಿದ ಸ್ಥಳಗಳಲ್ಲಿ ಉತ್ಖನನ ಕಾರ್ಯ ನಡೆಸಲಾಗಿದೆ. ಈಗಾಗಲೇ 8 ಸ್ಥಳಗಳಲ್ಲಿ ಅಗೆದು ಪರಿಶೀಲಿಸಲಾಗಿದ್ದು, 8 ನೇ ಸ್ಥಳದಲ್ಲಿ ಮಾತ್ರ ಅಸ್ಥಿಪಂಜರದ ಅವಶೇಷಗಳು ಪತ್ತೆಯಾಗಿವೆ. ಇನ್ನು ತನಿಖೆ ನಿರ್ಣಾಯಕ ಹಂತ ತಲುಪಿರುವ ಸಮಯದಲ್ಲಿ, ಅನಾಮಿಕನ ಮೇಲೆ ಒತ್ತಡ ಹೇರಲಾಗಿದೆ ಎಂದು ಆರೋಪ ಕೇಳಿ ಬಂದಿದೆ.

 

ಇನ್ಸ್‌ಪೆಕ್ಟರ್ ಒಬ್ಬರು ಅನಾಮಿಕನ ಮೇಲೆ ಒತ್ತಡ ಹೇರಿದ್ದಾರೆ ಎಂದು ಆರೋಪಿಸಲಾಗಿದೆ. ಎಸ್‌ಐಟಿ ತನಿಖೆಗೆ ನೇಮಕಗೊಂಡಿದ್ದ ಎಸ್‌ಐ ಮಂಜುನಾಥ್ ಗೌಡ ವಿರುದ್ಧ ಈ ಗಂಭೀರ ಆರೋಪಗಳನ್ನು ಹೊರಿಸಲಾಗಿದೆ. ಪ್ರಕರಣವನ್ನು ಹಿಂಪಡೆಯಲು ಎಸ್‌ಐ ಈ ವ್ಯಕ್ತಿಯ ಮೇಲೆ ಒತ್ತಡ ಹೇರಿದ್ದಾರೆ ಎಂದು ಹೇಳಲಾಗಿದೆ. ಈ  ವಿಚಾರ ಬಹಿರಂಗವಾಗುತ್ತಿದ್ದಂತೆ, ಮಂಜುನಾಥ್ ಗೌಡ ಅವರನ್ನು ಎಸ್‌ಐಟಿ ತಂಡದಿಂದ ಹೊರಗಿಡಲಾಗಿದೆ ಎಂಬ ಮಾತು ಸಹ ಕೇಳಿಬರುತ್ತಿದೆ.  

ಶಿರಸಿ ಪೊಲೀಸ್ ಠಾಣೆಯಲ್ಲಿ ಕೆಲಸ ಮಾಡುವ ಎಸ್‌ಐ ಮಂಜುನಾಥ್ ಗೌಡ ಅವರನ್ನು ಎಸ್‌ಐಟಿ ತನಿಖೆಗೆ ನೇಮಿಸಲಾಗಿತ್ತು. ಈಗ, ಮಂಜುನಾಥ್ ಗೌಡ ವಿರುದ್ಧ ಒತ್ತಡದ ಆರೋಪಗಳು ಕೇಳಿಬಂದಿದ್ದು, ಈ ಬಗ್ಗೆ ಅನಾಮಿಕಾ ಪರ ವಕೀಲರು ಎಸ್‌ಐಟಿ ಮುಖ್ಯಸ್ಥ ಪ್ರಣವ್ ಮೊಹಂತಿ ಅವರಿಗೆ ದೂರು ನೀಡಿದ್ದರು. ಈ ಎಸ್‌ಐ ಮಂಜುನಾಥ ಗೌಡ ತಂಡದಲ್ಲಿದ್ದರೆ, ಅನಾಮಿಕಾನನ್ನು ಸ್ಥಳ ಮಹಜರಿಗೆ ಕರೆತರುವುದಿಲ್ಲ ಎಂದು ಪಟ್ಟು ಹಿಡಿದಿದ್ದರು ಎನ್ನಲಾಗಿದೆ.

 

"ಆಗಸ್ಟ್ 1 ರಂದು ಬೆಳ್ತಂಗಡಿ ಪೊಲೀಸ್ ಠಾಣೆಯಲ್ಲಿ ಅನಾಮಿಕಾಗೆ ಬೆದರಿಕೆ ಹಾಕಲಾಗಿತ್ತು. ಬಾಗಿಲು ಮುಚ್ಚಿ ಎಸ್‌ಐಟಿ ಕಚೇರಿಯಲ್ಲಿ ಬೆದರಿಕೆ ಹಾಕಲಾಗಿತ್ತು. ಪ್ರಕರಣವನ್ನು ಹಿಂಪಡೆಯದಿದ್ದರೆ, ನೀನು ಜೈಲಿನಲ್ಲಿ ಸಮಯ ಕಳೆಯಬೇಕಾಗುತ್ತದೆ ಎಂದು ಒತ್ತಡ ಹೇರಲಾಗಿದೆ" ಎಂದು ವಕೀಲರು ಆರೋಪಿಸಿದ್ದಾರೆ.

 

ಧರ್ಮಸ್ಥಳದ ನೇತ್ರಾವತಿಯ ದಡದಲ್ಲಿರುವ ದಟ್ಟ ಅರಣ್ಯ ಪ್ರದೇಶದಲ್ಲಿ ಉತ್ಖನನ ಕಾರ್ಯ ಪ್ರಾರಂಭವಾಗಿ 5 ದಿನಗಳು ಕಳೆದಿವೆ. ಮೊದಲ 2 ದಿನಗಳಲ್ಲಿ ಯಾವುದೇ ಕುರುಹು ಸಿಗದ ಕಾರಣ ಎಸ್‌ಐಟಿ ತಂಡ ಬರಿಗೈಯಲ್ಲಿ ಹಿಂತಿರುಗಿತ್ತು. ಆದರೆ, ಮೂರನೇ ದಿನ, 6ನೇ ನಂಬರ್ ಸ್ಥಳದಲ್ಲಿ ಅಸ್ಥಿಪಂಜರ ಪತ್ತೆಯಾಗಿದೆ ಎಂದು ವರದಿಯಾಗಿದೆ.