Crime News: ഇടുക്കിയിൽ അന്യസംസ്ഥാന തൊഴിലാളിയായ സ്ത്രീയെ കൊലപ്പെടുത്തി; ഒപ്പം താമസിച്ചിരുന്ന സുഹൃത്ത് അറസ്റ്റിൽ

വീഴ്ചയിൽ തലയ്ക്കുണ്ടായ പരിക്കും ആന്തരിക രക്തസ്രാവവുമാണ് സരസ്വതിയുടെ മരണ കാരണം.

ഇടുക്കി: ഇടുക്കിയിൽ അന്യ സംസ്ഥാന തൊഴിലാളിയായ സ്ത്രീയെ ഒപ്പം താമസിച്ചിരുന്ന സുഹൃത്ത് കൊലപ്പെടുത്തി. മധ്യപ്രദേശ് സ്വദേശി സരസ്വതിയാണ് കൊല്ലപ്പെട്ടത്. ഇവരുടെ ഒപ്പം താമസിച്ചിരുന്ന മധ്യപ്രദേശ് സ്വദേശിയായ രാജേഷ് ലോഹോ ഠാക്കൂറിനെ പൊലീസ് അറസ്റ്റ് ചെയ്തു. രാജേഷ് മദ്യപിച്ച ശേഷം സരസ്വതിയെ ക്രൂരമായി മർദ്ദിച്ച് കൊലപ്പെടുത്തുകയായിരുന്നുവെന്നാണ് വിവരം. ഞായറാഴ്ച രാത്രിയാണ് സംഭവം നടന്നത്. 

Add Zee News as a Preferred Source

ഞായറാഴ്ച രാവിലെ മുതൽ ഇരുവരും ഒരുമിച്ച് മദ്യപിയ്ക്കുകയും തുടർന്ന് വഴക്കുണ്ടാക്കുകയും ചെയ്തിരുന്നു. ഈ സമയം മറ്റൊരു ആവശ്യത്തിന് ഇവിടെ എത്തിയ നെടുംകണ്ടം പോലീസ് ഇവരോട് സംസാരിക്കുകയും പ്രശ്നം പരിഹരിക്കുകയും ചെയ്തിരുന്നു. എന്നാൽ രാത്രിയോടെ രാജേഷ് വീണ്ടും മദ്യപിക്കുകയും സരസ്വതിയെ മർദ്ദിക്കുകയുമായിരുന്നു. കാപ്പി കമ്പ് ഉപയോഗിച്ചാണ് പ്രതി സരസ്വതിയെ മർദ്ദിച്ചത്. വീണു കിടന്ന സരസ്വതിയുടെ തലയിൽ ചവുട്ടി നിൽക്കുകയും ചെയ്തു പ്രതി. കൂടാതെ ക്രൂരകൃത്യം ഇയാൾ മൊബൈലിൽ പകർത്തുകയും ചെയ്തു. വീഴ്ചയിൽ തലയ്ക്കുണ്ടായ പരിക്കും ആന്തരിക രക്തസ്രാവവുമാണ് മരണ കാരണം.

എട്ട് ദിവസം മുൻപാണ് രാജേഷും സരസ്വതിയും ജോലി അന്വേഷിച്ച് നെടുംകണ്ടം പൊന്നാംകാണിയിലെ തോട്ടത്തിൽ എത്തിയത്. ഇവരുടെ ബന്ധുക്കൾ ഇവിടെ ജോലി ചെയ്യുന്നുണ്ട്. ഇവരോടൊപ്പം താമസിച്ചു മറ്റ് സ്ഥലങ്ങളിൽ ജോലി ചെയ്ത് വരികയായിരുന്നു ഇരുവരും. പ്രതിയെ നാളെ കോടതിയിൽ ഹാജരാക്കും.