Murder Case: പീഡന ശ്രമം വീട്ടിലറിയിക്കുമെന്ന് പറ‍ഞ്ഞു; തൃശൂരിൽ 6 വയസുകാരനെ മുക്കിക്കൊന്നു, പ്രതി പിടിയിൽ

കുട്ടിയുടെ അയൽവാസിയായ ജോജോ എന്നയാളാണ് പൊലീസ് പിടിയിലായിരിക്കുന്നത്. ഇയാളുടെ അറസ്റ്റ് ഇന്ന് രേഖപ്പെടുത്തും.

തൃശൂര്‍: മാളയില്‍ പീഡനശ്രമം ചെറുത്ത ആറ് വയസുകാരനെ കുളത്തിൽ മുക്കിക്കൊന്ന സംഭവത്തിൽ ഞെട്ടിക്കുന്ന വിവരങ്ങളാണ് പുറത്തുവരുന്നത്. യുകെജി വിദ്യാർത്ഥിയെ കുട്ടിയുടെ അയൽവാസിയായ ജോജോ (20) ആണ് കുളത്തിൽ മുക്കി കൊലപ്പെടുത്തിയത്. പ്രകൃതി വിരുദ്ധ പീഡനത്തെ എതിർത്തതാണ് ക്രൂരമായ കൊലപാതകം നടത്താൻ കാരണമെന്ന് തൃശൂർ റൂറൽ എസ്പി ബി കൃഷ്ണകുമാർ പറഞ്ഞു. പ്രതി ജിജോയുടെ അറസ്റ്റ് ഇന്ന് രേഖപ്പെടുത്തും. പ്രതിയെ വൈകിട്ടോടെ കോടതിയിൽ ഹാജരാക്കിയേക്കും. 

Add Zee News as a Preferred Source

അതേസമയം കുട്ടിയുടെ മൃതദേഹം കുഴിക്കാട്ടുശ്ശേരിയിലെ മരിയ തെരേസ ആശുപത്രി മോർച്ചറിയിലാണുള്ളത്. ഇവിടെ നിന്ന് പോസ്റ്റ്മോർട്ടത്തിനായി തൃശ്ശൂർ മെഡിക്കൽ കോളേജ് ആശുപത്രിയിലേക്ക് കൊണ്ടുപോകും. പ്രകൃതിവിരുദ്ധ പീഡനത്തിന് ഇരയാക്കാൻ ശ്രമിച്ചപ്പോൾ കുട്ടി എതിർത്തു. തുടർന്ന് വിവരം പുറത്തറിയുമെന്ന് ഭയന്ന് കുട്ടിയെ കുളത്തിൽ മുക്കി കൊലപ്പെടുത്തുകയായിരുന്നു. പീഡന ശ്രമം അമ്മയെ അറിയിക്കുമെന്ന് കുട്ടി പറഞ്ഞതോടെയാണ് കൊലപാതകം നടത്തിയതെന്ന് പ്രതി പറഞ്ഞതായി എസ്പി ബി കൃഷ്ണകുമാർ കൂട്ടിച്ചേര്‍‍ത്തു.

കുട്ടിയുടെ അയൽവാസിയായ ജോജോ നേരത്തെ ബൈക്ക് മോഷണ കേസിൽ പ്രതിയായിരുന്നു. ഈ അടുത്താണ് ഇയാൾ ജാമ്യത്തിൽ ഇറങ്ങിയത്. കൂട്ടുകാർക്കൊപ്പം കളിക്കുകയായിരുന്ന കുട്ടിയെ പ്രതി ആളൊഴിഞ്ഞ സ്ഥലത്തേക്ക് കൂട്ടിക്കൊണ്ടുപോകുകയും പ്രകൃതി വിരുദ്ധ പീഡനത്തിന് ഇരയാക്കാൻ ശ്രമിക്കുകയുമായിരുന്നു. എന്നാൽ പീഡനം കുട്ടി ചെറുക്കുകയും അമ്മയെ അറിയിക്കുമെന്ന് പറയുകയും ചെയ്തതോടെ പ്രതി കുട്ടിയെ കുളത്തിലേക്ക് തള്ളിയിടുകയായിരുന്നു. കുട്ടി കയറി വരാൻ ശ്രമിച്ചപ്പോൾ വീണ്ടും തള്ളിയിട്ടു. മൂന്നാം തവണയും തള്ളിയിട്ടപ്പോഴാണ് കുട്ടി ചെളിയിൽ താഴ്‌ന്ന് പോയത്. 

എന്നാൽ കൃത്യം നടത്തിയതിന് ശേഷം തൊട്ടടുത്ത പറമ്പിലേക്ക് മാറി നിന്ന പ്രതി നാട്ടുകാർക്കൊപ്പം തെരച്ചിലിനിറങ്ങുകയും ചെയ്തു. ഇതിനിടെ പ്രതിക്കൊപ്പം കുട്ടി നടന്നുപോകുന്ന സിസിടിവി ദൃശ്യങ്ങൾ പൊലീസിന് ലഭിച്ചിട്ടും കുട്ടിയെ കണ്ടില്ലെന്നാണ് ജോജോ പറഞ്ഞത്. തുടർന്ന് നടത്തിയ ചോദ്യം ചെയ്യലിലാണ് പ്രതി കുറ്റം സമ്മതിച്ചത്.