Kollam Crime News: അരമണിക്കൂറിനിടെ രണ്ടാമത്തെ ആക്രമണം; കൊല്ലത്ത് നടന്നുപോകുന്നതിനിടെ യുവാവിന് വെട്ടേറ്റു

അരമണിക്കൂറിന്റെ വ്യത്യാസത്തിലാണ് കൊല്ലത്ത് രണ്ട് ആക്രമണങ്ങളും ഉണ്ടായത്. ഒരേ സം​ഘമാണ് ആക്രമണങ്ങൾക്ക് പിന്നിലെന്നാണ് പൊലീസ് നി​ഗമനം

കൊല്ലം: കൊല്ലത്ത് യുവാവിനെ വീട്ടിൽ കയറി വെട്ടിക്കൊന്നതിന് പിന്നാലെ വീണ്ടും ആക്രമണം. ഓച്ചിറ വവ്വാക്കാവിൽ അനീറിനെ വെട്ടിക്കൊലപ്പെടുത്താൻ ശ്രമം. ആക്രമണത്തിൽ ​ഗുരുതരമായി പരിക്കേറ്റ അനീറിനെ വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പുലർച്ചെയാണ് സംഭവം. സുഹൃത്തിനൊപ്പം നടന്നു പോകുമ്പോൾ കാറിലെത്തിയ സംഘം അനീറിനെ ആക്രമിക്കുകയായിരുന്നുവെന്നാണ് പൊലീസ് പറയുന്നത്. അന്വേഷണം തുടങ്ങി. 

Add Zee News as a Preferred Source

കരുനാ​ഗപ്പള്ളി താച്ചയിൽമുക്ക് സ്വദേശി സന്തോഷ് സന്തോഷ് കൊല്ലപ്പെട്ടിരുന്നു. ഈ കൊലപാതകത്തിന് പിന്നാലെയാണ് വീണ്ടുമൊരു ആക്രമണം ഉണ്ടായത്. സന്തോഷിനെ കൊലപ്പെടുത്തിയ അതേ സംഘമാണ് അനീറിനേയും ആക്രമിച്ചതെന്നാണ് സൂചന. അരമണിക്കൂറിൻ്റെ  ഇടവേളയിലാണ് രണ്ട് ആക്രമണങ്ങളും നടന്നത്. ആക്രമണങ്ങൾക്ക് പിന്നിൽ ഗുണ്ടാ കുടിപ്പകയാണെന്നാണ് പൊലീസ് സംശയിക്കുന്നത്.

കാറിലെത്തിയ സംഘമാണ് സന്തോഷിനെ വീട്ടിൽ കയറി വെട്ടിക്കൊലപ്പെടുത്തിയത്. സംഭവ സമയത്ത് സന്തോഷിന്റെ അമ്മയും വീട്ടിലുണ്ടായിരുന്നു. അക്രമികൾ സന്തോഷിന്റെ കാല് വെട്ടിമാറ്റുകയായിരുന്നു. തുടർന്ന് രക്തം വാർന്നാണ് സന്തോഷ് മരിച്ചതെന്നാണ് നി​ഗമനം. ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.

വധശ്രമക്കേസിൽ പ്രതിയാണ് കൊല്ലപ്പെട്ട സന്തോഷ്. 2014ൽ പങ്കജ് എന്നയാളെ ആക്രമിച്ച കേസിലാണ് സന്തോഷ് പ്രതിയായിട്ടുള്ളത്. ഈ സംഭവവുമായി കൊലപാതകത്തിന് ബന്ധമുണ്ടോ എന്നത് പൊലീസ് അന്വേഷിക്കുന്നുണ്ട്. സമീപത്തെ സിസിടിവി ദൃശ്യങ്ങളടക്കം പൊലീസ് പരിശോധിക്കുന്നുണ്ട്.