Thamarassery Student Death: പ്രതിഷേധം ശക്തം; എംഎസ്എഫ് സംസ്ഥാന പ്രസിഡന്റടക്കം കരുതൽ തടങ്കലിൽ

Thamarassery Student Death: കെഎസ്‌യു, എംഎസ്എഫ്, യൂത്ത് കോൺഗ്രസ് സംഘടനകളുടെ പ്രവർത്തകർ ഇന്ന് രാവിലെ മുതൽ പ്രതിഷേധം നടത്തുകയാണ്.

കോഴിക്കോട് : താമരശ്ശേരി ഷഹബാസ് കൊലപാതകത്തിൽ കുറ്റോരോപിതരായവരെ പരീക്ഷ എഴുതാൻ അനുവദിച്ചതിനെതിരെ ശക്തമായാ പ്രതിഷേധം.  സമരരംഗത്ത് കെഎസ്‌യുവും എംഎസ്എഫുമാണ് ഉള്ളത്. 

Add Zee News as a Preferred Source

വെള്ളിമാട്കുന്ന് ജുവനൈൽ ഹോമിലേക്ക് യൂത്ത് കോൺഗ്രസും മാർച്ച് സംഘടിപ്പിചിരുന്നു. പ്രതിഷേധിച്ച പ്രവർത്തകരെ പോലീസെത്തി ബലം പ്രയോഗിച്ച് അറസ്റ്റ് ചെയ്ത് നീക്കി. ഇതിനിടെ കെഎസ്‌യു പ്രവർത്തകർ നടത്തിയ പ്രതിഷേധ സമരത്തിനിടെ ജുവനൈൽ ജസ്റ്റിസ് ഹോമിലെ മതിൽചാടി കടന്നു. ഇതിൽ മുഖ്യമന്ത്രിയെ കരിങ്കൊടി കാണിച്ച കെഎസ്‌യു പ്രവർത്തക മിവാ ജോളിയും ഉണ്ടായിരുന്നു. മതിൽ ചാടിയ പ്രതിഷേധക്കാരെയും പോലീസ് കസ്റ്റഡിയിലെടുത്തു.

ജുവനൈൽ ജസ്റ്റിസ് ഹോം പരിസരത്ത് എത്തിയ എംഎസ്എഫ് സംസ്ഥാന പ്രസിഡന്റ് പി കെ നവാസ്, സംസ്ഥാന ട്രഷറർ അശഹ്ർ പെരുമുക്ക്, സാബിത്ത് മയനാട് തുടങ്ങിയ പ്രമുഖ നേതാക്കൾ ഉൾപ്പെടെയുള്ളവരെ പ്രതിഷേധ സാധ്യത കണക്കിലെടുത്ത് പോലീസ് കരുതൽ തടങ്കലിലാക്കിയിട്ടുണ്ട്. അതേ സമയം കുറ്റോരോപിതരായ വിദ്യാർത്ഥികൾ പരീക്ഷ എഴുതുന്ന കെയർഹോമിന് മുൻപിൽ ഇന്ന് രാവിലെ മുതൽ കെഎസ്‌യുവും എംഎസ്എഫും പ്രധിഷേധം നടത്തുകയാണ്. രാവിലെ ആറര മണിയോടു കൂടി കെയർഹോമിന് മുൻപിൽ പ്രതിഷേധിച്ച ആറ് കെഎസ്‌യു പ്രവർത്തകരെ പോലീസ് അറസ്റ്റ് ചെയ്ത് നീക്കിയിരുന്നു. എന്നാൽ വീണ്ടും പ്രതിഷേധവുമായി കെഎസ്‌യുവും യൂത്ത്കോൺഗ്രസും എത്തുകയായിരുന്നു.

എംഎസ്എഫ് പ്രവർത്തകരും രാവിലെ മുതൽ ശക്തമായ പ്രതിഷേധവുമായി രംഗത്തെത്തിയിട്ടുണ്ട്. പ്രവർത്തകരെ അറസ്റ്റ് ചെയ്ത് നീക്കിയെങ്കിലും വീണ്ടും എംഎസ്എഫും പ്രതിഷേധം സംഘടിപ്പിക്കുകയായിരുന്നു. ഷഹബാസ് എഴുതാത്ത പരീക്ഷ ഷഹബാസിന്റെ കൊലയാലികളും എഴുതേണ്ട എന്നാണ് പ്രതിഷേധക്കാർ പറയുന്നത്. കെയർ ഹോമിന് മുൻപിൽ കൂടുതൽ പ്രതിഷേധം സംഘടിപ്പിക്കാനാണ് കെഎസ്‌യുവിൻ്റെയും എംഎസ്എഫിന്റെയും തീരുമാനം. പ്രതിഷേധത്തെ തുടർന്ന് വൻ പോലീസ് സന്നാഹത്തെ വെള്ളിമാടുകുന്ന് കെയർഹോമിന് മുൻപിൽ വിന്യസിച്ചിട്ടുണ്ട്. പ്രതിഷേധ സാധ്യത കണക്കിലെടുത്തായിരുന്നു കുറ്റാരോപിതരായവരുടെ പരീക്ഷാ കേന്ദ്രം താമരശ്ശേരി ഹയർസെക്കൻഡറി സ്കൂളിൽ നിന്നും കോഴിക്കോട് വെള്ളിമാടുകുന്നിലേക്ക് മാറ്റിയത്.