 "VS Achuthanandan TS Thiruvambu Poem: തല നരയ്ക്കുവതല്ലെന്റെ വൃദ്ധത്വം, തലനരയ്ക്കാത്തതല്ലെന് യുവത്വവും.... രാഹുല് ഗാന്ധിയ്ക്ക് കൊടുത്ത ആ മറുപടിക്കവിത")
രാഹുല് ഗാന്ധിയുടെ രാഷ്ട്രീയ ജീവിതത്തിലെ ഏറ്റവും അപക്വമായ പ്രതികരണം എന്ന് വിശേഷിപ്പിക്കാവുന്ന ഒന്നാണ് വിഎസ് അച്യുതാനന്ദന്റെ പ്രായത്തെ പരിഹസിച്ചത്. ഒരു ദാക്ഷിണ്യവും ഇല്ലാതെ ആയിരുന്നു അതിന് വിഎസ് അച്യുതാനന്ദന് മറുപടി നല്കിയത്. ഒരല്പം ക്രൂരമെന്ന് വിശേഷിപ്പിച്ചാല് പോലും തെറ്റില്ലെന്ന് പറയാം...
അതിന് വിഎസ് ഉപയോഗിച്ചത് ഒരുകവിതാ ശകലം ആയിരുന്നു. അദ്ദേഹത്തിന്റെ സ്വതസിദ്ധമായ ശൈലിയില് നീട്ടിയും കുറുക്കിയും ഒരു അസ്ത്രം തൊടുക്കും വിധം എയ്ത് വിട്ടപ്പോള് തറച്ചത് രാഹുല് ഗാന്ധിയുടെ പരിഹാസത്തിന്റെ മാറില് തന്നെ ആയിരുന്നു. 'തല വരക്കുവതല്ലെന്റെ വൃദ്ധത്വം, തല നരയ്ക്കാത്തതല്ലെന് യുവത്വവും, കൊടിയ ദുഷ്പ്രഭുത്വത്തിന് തിരുമുമ്പില്, തലകുനിക്കാത്ത ശീലമെന് യൗവ്വനം'- ഇതായിരുന്നു ആ മറുപടി.
ടി സുബ്രഹ്മണ്യം തിരുമുമ്പ് എന്ന ടിഎസ് തിരുമുമ്പ് 86 വര്ഷങ്ങള്ക്ക് മുമ്പ് എഴുതിയ കവിതയിലെ വരികള് ആയിരുന്നു അത് എന്നതും ചരിത്രം. പാടുന്ന പടവാളെന്ന് ഇഎംഎസ് അച്യുതാനന്ദന് വിശേഷിപ്പിച്ച കമ്യൂണിസ്റ്റായിരുന്നു ടിഎസ് തിരുമുമ്പ്. 'എന്റെ യുവത്വം' എന്ന ആ വിഖ്യാത കവിതയുടെ പൂര്ണ രൂപം വായിക്കാം...
തല നരയ്ക്കുവതല്ലെന്റെ വൃദ്ധത്വം,
തല നരക്കാത്തതല്ലെന് യുവത്വവും,
പിറവിതൊട്ടു നാളെത്രയെന്നെണ്ണുമ-
പ്പതിവുകൊണ്ടല്ലളപ്പതെന് യൗവനം
കൊടിയ ദുഷ്പ്രഭുത്വത്തിന് തിരുമുമ്പില്
തലകുനിക്കാത്ത ശീലമെന് യൗവനം
ധനികധിക്കൃതിതന് കണ്ണുരുട്ടലില്
പനിപിടിക്കാത്ത ശീലമെന് യൗവനം;
വിഷമഘട്ടത്തിലേതിലും ചെറ്റുമേ-
പതറിടാത്ത ഹൃദയമെന് യൗവനം!
വിരിവൊടക്രമം ചീറ്റിയടുക്കുമ്പോള്
പൊരുതുവാനാഞ്ഞണഞ്ഞെത്തുമക്ഷമ;
വഴിമുടക്കുന്ന മാമൂല്തലകളെ
പിഴുതെടുക്കുന്ന തീവ്രാസഹിഷ്ണുത;
പ്രതിനിമിഷം വളരാന്-വികസിക്കാന്-
കൊതിപെരുകിയുഴറുമശാന്തത;
അവശലോകത്തെ ഞെക്കിഞ്ഞെരുക്കുന്ന
ദുരധികാരത്തെ വെല്ലുവിളിക്കുവാന്,
പ്രഭുതതന് വിഷപ്പല്ലു പറിക്കുവാന്,
വിഭുതയാളുമമോഘസുധീരത;
ഭയമൊരിത്തിരി തീണ്ടാത്ത പൗരുഷം;
അലസത ചളി തേക്കാത്ത ജീവിതം;
വിവിധ ദുഃഖങ്ങളാര്ത്തടുക്കുമ്പോഴും
വിരളമാവാത്ത ദുര്ദ്ധര്ഷവിക്രമം;
ജയലഹരിയില് മങ്ങാത്ത തന്റേടം;
അപജയത്തില് കലങ്ങാത്ത സൗഹൃദം;
ഇവയെഴുന്നോര് സദാപി യുവാക്കന്മാ,-
രിവരയെഴാത്തവര് വൃദ്ധരില് വൃദ്ധരും!
നിരുപമം യുവലോകമുച്ഛൃംഖലം
സമരസന്നാഹമുണ്ടൊന്നൊരുക്കുന്നു!
ഉദധിയേഴും കലങ്ങിമറിയുമാ-
റഖിലലോകവും ഞെട്ടുന്ന മട്ടിലും
പഴകിജീര്ണ്ണിച്ചൊരിസ്സമുദായത്തിന്-
ഘടന മാറ്റിപ്പുതുക്കിപ്പണിയുവാന്
ഒരുമയോടൊരുമ്പെട്ട യുവത്വത്തിന്-
സമരകാഹളമുണ്ടതാ കേള്ക്കുന്നു!
അലയടിച്ചാര്ത്തിരമ്പുന്ന വിപ്ലവ-
ക്കടലിളകിമറിഞ്ഞു വരുന്നതാ!
കരുതിനില്ക്കുക! ദുഷ്ടസാമ്രാജ്യമേ!
കരുതിനില്ക്കുക! ദുഷ്ടപ്രഭുത്വമേ!
നിജനിജാധികാരായുധമൊക്കെയും
നിജശിരസ്സറ്റുവീഴുന്നതിന്മുമ്പെ,
അണിനിരക്കുന്ന യുവജനശക്തിതന്-
നികടഭൂവിലടിയറവെക്കുക!
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.
)