മുംബൈ: തോരാത്ത മഴ മുംബൈവാസികളുടെ ജീവിതം ദുരിതപൂര്‍ണ്ണമാക്കിയിരിയ്ക്കുകയാണ്. കനത്ത മഴ തുടരുന്ന മുംബൈയില്‍ വ്യോമ, റെയില്‍, റോഡ് ഗതാഗതം അപ്പാടെ താറുമാറായി.
പ്രധാനപ്പെട്ട പല റോഡുകളും റെയില്‍വേ ട്രാക്കുകളും വെള്ളത്തിനടിയില്‍ ആയതോടെ വ്യാപക ഗതാഗത കുരുക്കാണ് മുംബൈയില്‍ അനുഭവപ്പെടുന്നത്.
മുംബൈ വിമാനത്താവളത്തില്‍ നിന്നുള്ള 11 വിമാനങ്ങള്‍ റദ്ദാക്കി. 17 വിമാനങ്ങള്‍ വഴിതരിച്ച്‌ വിടുകയും ചെയ്തു. നിരവധി വിമാനങ്ങള്‍ വൈകിയാണ് സര്‍വീസ് നടത്തുന്നത്.
ലോക്കല്‍ സര്‍വീസ് ഉള്‍പ്പെടെയുള്ള ട്രെയിന്‍ സര്‍വീസുകളെയും മഴ സാരമായി ബാധിച്ചിട്ടുണ്ട്.
700 യാത്രക്കാരുമായി മുംബൈ-കോലാപ്പൂർ മഹാലക്ഷ്മി എക്സ്പ്രസ് ബദ്‌ലാപൂരിനും വംഗാനിക്കും ഇടയിൽ കുടുങ്ങിക്കിടക്കുകയാണ്. കുടുങ്ങി കിടക്കുന്ന യാത്രക്കാര്‍ക്കായി ചായയും വെള്ളവും ബിസ്കറ്റും ആര്‍പിഎഫും സിറ്റി പൊലീസും വിതരണം ചെയ്തു.
ജുഹു താരാ റോഡ്, ജോഗസ്വാരി വിഗറോലി ലിങ്ക് റോഡ്, എസ്.വി റോഡ്, വെസ്റ്റേൺ എക്സ്പ്രസ് ഹൈവേയുടെ ചില ഭാഗങ്ങൾ എന്നിവിടങ്ങളിലെല്ലാം വെള്ളം കയറി ഗതാഗതം തടസപ്പെട്ടു.
ശനിയാഴ്ച ഉച്ചക്ക് വരെ കനത്ത മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രം അറിയിക്കുന്നത്.
