ബംഗളൂരു: പാകിസ്ഥാനിലെ ഭീകര കേന്ദ്രങ്ങള്‍ക്കെതിരായ വ്യോമാക്രമണം രാജ്യത്ത് മോദി തരംഗം ഉണ്ടാക്കുമെന്ന് കര്‍ണാടക ബിജെപി അദ്ധ്യക്ഷന്‍ ബി എസ് യെദ്യൂരപ്പ.
രാഷ്ട്രീയ അന്തരീക്ഷം ഓരോ ദിവസവും ബിജെപിക്ക് അനുകൂലമാവുകയാണ്. ഇന്ത്യയുടെ തിരിച്ചടി യുവാക്കള്‍ക്കിടയില്‍ ബിജെപിക്ക് അനുകൂലമായ വികാരം ഉണ്ടാക്കിയിട്ടുണ്ടെന്നും ഇത് ലോക്സഭാ തിരഞ്ഞെടുപ്പില്‍ പ്രതിഫലിക്കുമെന്നും യെദ്യൂരപ്പ പറഞ്ഞു.
ഇരു രാജ്യങ്ങളും തമ്മിലുണ്ടായ പ്രശ്‌നം ബിജെപി രാഷ്ട്രീയ നേട്ടത്തിനായി ഉപയോഗിക്കുകയാണെന്ന ആരോപണം ശക്തമായി നിലനില്‍ക്കെയാണ്‌ യെദ്യൂരപ്പയുടെ ഇത്തരമൊരു പ്രതികരണം.
യെദ്യൂരപ്പയുടെ പ്രസ്‌താവനക്കെതിരെ സിപിഐ എം ഉള്‍പ്പെടെയുള്ള രാഷ്ട്രീയ പാര്‍ട്ടികള്‍ രംഗത്തെത്തി.
എന്നാല്‍, പാകിസ്ഥാനില്‍ ഇന്ത്യ നടത്തിയ വ്യോമാക്രമണം വരുന്ന ലോക്സഭാ തിരഞ്ഞെടുപ്പില്‍ ബിജെപിക്ക് അനുകൂലമാകുമെന്ന് താന്‍ പറഞ്ഞിട്ടില്ലെന്നും തന്‍റെ വാക്കുകള്‍ വളച്ചൊടിച്ചതാണെന്നും യെദ്യൂരപ്പ പിന്നീട് പറഞ്ഞു. ലോക്സഭാ തിരഞ്ഞെടുപ്പില്‍ ബിജെപിക്ക് അനുകൂലമായ സാഹചര്യമാണെന്ന് മാസങ്ങളായി താന്‍ പറയുന്ന കാര്യമാണ്. കര്‍ണാടകയില്‍ ബിജെപി 22 സീറ്റ് നേടുമെന്ന് പറഞ്ഞത് ആദ്യമായിട്ടല്ലെന്നും യെദ്യൂരപ്പ കൂട്ടിച്ചേര്‍ത്തു.
