close

News WrapGet Handpicked Stories from our editors directly to your mailbox

അദ്വാനി, ബിജെപിയെ രാജ്യം ഭരിക്കുന്ന പാര്‍ട്ടിയാക്കിയ നേതാവ്!!

92-ാം പിറന്നാളിന്‍റെ നിറവില്‍ ബിജെപിയുടെ പ്രമുഖ നേതാവ് എല്‍ കെ അദ്വാനി.

Sheeba George | Updated: Nov 8, 2019, 07:24 PM IST
അദ്വാനി, ബിജെപിയെ രാജ്യം ഭരിക്കുന്ന പാര്‍ട്ടിയാക്കിയ നേതാവ്!!

ന്യൂഡല്‍ഹി: 92-ാം പിറന്നാളിന്‍റെ നിറവില്‍ ബിജെപിയുടെ പ്രമുഖ നേതാവ് എല്‍ കെ അദ്വാനി.

പിറന്നാള്‍ ദിനത്തില്‍ എല്‍ കെ അദ്വാനിയെ വീട്ടിലെത്തിയാണ് പ്രധാനമന്ത്രി നരേന്ദ്രമോദി ആശംസകള്‍ അറിയിച്ചത്

അദ്വാനി പണ്ഡിതനും രാഷ്ട്രതന്ത്രജ്ഞനും ഇന്ത്യയിലെ ഏറ്റവും പ്രധാനപ്പെട്ട നേതാക്കളില്‍ ഒരാളുമാണെന്ന് മോദി ട്വീറ്ററില്‍ കുറിച്ചു. 

ട്വീറ്ററില്‍ ആശംസ സന്ദേശം കുറിച്ചതിന് പിന്നാലെ അദ്വാനിയുടെ വീട്ടിലെത്തിയ നരേന്ദ്രമോദി പൂക്കള്‍ സമ്മാനിക്കുകയും ആശംസകള്‍ നേരുകയും ചെയ്‍തു. 

''അദ്വാനിയെ സംബന്ധിച്ച് പൊതുപ്രവര്‍ത്തനമെന്നാല്‍ മൂല്യങ്ങളില്‍ അടിസ്ഥാനമായുള്ളതാണ്. തന്‍റെ ആശയങ്ങളില്‍ അദ്ദേഹം ഒരിക്കല്‍ പോലും അദ്ദേഹം വിട്ടുവീഴ്‍ചയ്ക്ക് തയ്യാറിയിട്ടില്ല. ജനാധിപത്യത്തിന്‍റെ സംരക്ഷണത്തിന് അദ്ദേഹം എന്നും മുന്‍പന്തിയിലുണ്ടായിരുന്നു. മന്ത്രിയെന്ന നിലയില്‍ അദ്ദേഹത്തിന്‍റെ ഭരണപാടവും ലോകം തന്നെ അംഗീകരിച്ചതാണ്.'' - മോദി ട്വീറ്ററില്‍ കുറിച്ചു.

വര്‍ഷങ്ങളോളം കഠിനാധ്വാനം ചെയ്‍താണ് അദ്വാനി ബിജെപിക്ക് കരുത്തും രൂപവും നല്‍കിയതെന്നും മോദി പറഞ്ഞു. 

''ഇന്ത്യന്‍ രാഷ്ട്രീയത്തിലെ സുപ്രധാന സാന്നിധ്യമായി ബിജെപി മാറിയതിന് പിന്നില്‍ അദ്വാനിയും അദ്ദേഹം വളര്‍ത്തിയെടുത്ത നിസ്വാര്‍ഥരായ പ്രവര്‍ത്തകരുമാണ്.''- മോദി കുറിച്ചു.

ബിജെപിയുടെ സ്ഥാപക നേതാക്കളില്‍ ഒരാളാണ് അദ്വാനി. കൂടാതെ, ഏറ്റവും കൂടുതല്‍ കാലം ബിജെപി അദ്ധ്യക്ഷനായ നേതാവുമാണ് അദ്വാനി.

1984-ല്‍ പാര്‍ലമെന്‍റില്‍ രണ്ട് സീറ്റ് മാത്രമുണ്ടായിരുന്ന ബിജെപിയെ ഇന്ത്യ ഭരിക്കുന്ന പാര്‍ട്ടിയാക്കി വളര്‍ത്തുന്നതില്‍ അദ്വാനി വഹിച്ച പങ്ക് വളരെ വലുതാണ്. അയോധ്യയിലെ രാമക്ഷേത്രത്തിനായി അദ്വാനി നടത്തിയ രഥയാത്രയാണ് രാജ്യത്ത് ബിജെപിയുടെ വളര്‍ച്ചയ്‍ക്ക് ഊര്‍ജം പകര്‍ന്നത്.

5 തവണ ലോക് സഭാംഗമായ അദ്വാനി കഴിഞ്ഞ തിരഞ്ഞെടുപ്പില്‍ മത്സരിച്ചിരുന്നില്ല. ബിജെപി ഉപദേശക സമിതിയില്‍ അംഗമാണ് അദ്വാനി ഇപ്പോള്‍. നരേന്ദ്രമോദി പ്രധാനമന്ത്രിയായതിനു ശേഷം അദ്വാനി രാഷ്ട്രീയത്തില്‍ സജീവമല്ല.

വിഭജിക്കപ്പെടാത്ത ഇന്ത്യയിലെ കറാച്ചിയില്‍ 1927 നവംബര്‍ എട്ടിനാണ് എല്‍ കെ അദ്വാനിയുടെ ജനനം. വിഭജനത്തിന് ശേഷം അദ്വാനിയുടെ കുടുംബം ഇന്ത്യയിലേക്ക് കുടിയേറുകയായിരുന്നു.