Sarpanch Murder: സഹായി പിടിയിലായതിനെ തുടർന്ന് മഹാരാഷ്ട്ര ഭക്ഷ്യമന്ത്രി രാജിവെച്ചു

മുണ്ടെയുടെ രാജിക്കത്ത് അംഗീകരിച്ചതായും അത് ഗവര്‍ണര്‍ക്ക് അയച്ചുകൊടുത്തതായും മുഖ്യമന്ത്രി ദേവേന്ദ്ര ഫട്‌നാവിസ്‌ അറിയിച്ചു.

മുംബൈ: മഹാരാഷ്ട്രയില്‍ സര്‍പഞ്ച് സന്തോഷ് ദേശ്മുഖിന്റെ കൊലപാതകവുമായി ബന്ധപ്പെട്ട വിവാദത്തെ തുടര്‍ന്ന് സംസ്ഥാന ഭക്ഷ്യമന്ത്രി ധനഞ്ജയ് മുണ്ടെ രാജിവെച്ചു.  എൻസിപി അജിത് പവാർ വിഭാഗം നേതാവാണ് ധനഞ്ജയ് മുണ്ടെ. 

Add Zee News as a Preferred Source

ബീഡിൽ ജില്ലയിലെ ഗ്രാമത്തലവനായ സന്തോഷ് ദേശമുഖിൻ്റെ കൊലപാതകത്തിൽ മുണ്ടെയുടെ അടുത്ത സഹായിയും എൻസിപി നേതാവുമായ വാൽമീക് കാരാഡ്‌  അറസ്റ്റിലായിരുന്നു. ഇതിന് പിന്നാലെ പ്രതിപക്ഷം രാജി ആവശ്യം ശക്തമാക്കിയിരുന്നു. രാജിവെക്കില്ലെന്നും കാര്യങ്ങൾ വ്യക്തമാക്കാൻ സമയം വേണമെന്നും ധനഞ്ജയ് മുണ്ടെ അജിത് പവാറിനോട് ആവശ്യപ്പെട്ടിരുന്നു. തുടർന്ന് ഇന്നലെ രാത്രി മുഖ്യമന്ത്രി ദേവേന്ദ്ര ഫട്നാവിസ് ഉപമുഖ്യമന്ത്രി അജിത് പവാറുമായി ചർച്ച നടത്തിയതിന് പിന്നാലെയായിരുന്നു രാജി.

മുണ്ടെയുടെ രാജിക്കത്ത് ഗവര്‍ണര്‍ക്ക് അയച്ചുകൊടുത്തതായും അത് അംഗീകരിച്ചതായും മുഖ്യമന്ത്രി ദേവേന്ദ്ര ഫട്‌നാവിസ്‌ മാധ്യമങ്ങളെ അറിയിച്ചു.  കഴിഞ്ഞ വര്‍ഷം ഡിസംബര്‍ 9 ന് ബീഡ് ജില്ലയിലെ ഒരു ഊര്‍ജ്ജ കമ്പനി കൊള്ളയടിക്കാനുള്ള ശ്രമം തടഞ്ഞു എന്നാരോപിച്ച് ബീഡിലെ മസാജോഗ് ഗ്രാമത്തിലെ സന്തോഷ് ദേശ്മുഖിനെ തട്ടിക്കൊണ്ടുപോയി പീഡിപ്പിച്ച് കൊലപ്പെടുത്തി എന്നാതാണ് കേസ്. 

കേസില്‍ ഇതുവരെ ഏഴു പ്രതികള്‍ അറസ്റ്റിലായാതായാണ് റിപ്പോർട്ട്. കേസിൽ ഒരാള്‍ ഇപ്പോഴും ഒളിവിലാണ്. കൊലപാതകത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായിരുന്നു. കൊലപാതകത്തിൽ ധനഞ്ജയ് മുണ്ടേക്കും പങ്കുണ്ടെന്ന് ആരോപിച്ച് പ്രതിപക്ഷം രംഗത്തെത്തിയിരുന്നു.