ന്യൂഡല്‍ഹി: രാജ്യത്ത് നടക്കുന്ന സ്ത്രീ പീഡനങ്ങളെ കടുത്ത ശബ്ദത്തില്‍ വിമര്‍ശിച്ച് കോണ്‍ഗ്രസ് നേതാവ് രാഹുല്‍ഗാന്ധി.
വിമര്‍ശനത്തില്‍ പ്രധാനമന്ത്രി നരേന്ദ്രമോദിയേയും അദ്ദേഹം ലക്ഷ്യമിട്ടു. ഹിംസയില്‍ വിശ്വസിക്കുന്ന ആളാണ് രാജ്യത്തെ നയിക്കുന്നതെന്ന് രാഹുല്‍ പറഞ്ഞു.
നമ്മുടെ രാജ്യത്ത് നിലനില്‍ക്കുന്ന സുസ്ഥാപിത ഘടനക്ക് മാറ്റം വന്നതിനും ജനങ്ങളും സ്ഥാപനങ്ങളും നിയമം കൈയിലെടുക്കുന്നതിനും വ്യക്തമായ കാരണമുണ്ട്. അക്രമത്തില്‍ വിശ്വസിക്കുകയും അവിവേകത്തോടെ അധികാരം കൈയാളുകളും ചെയ്യുന്ന വ്യക്തി ഇന്ത്യ ഭരിക്കുന്നുവെന്നതാണ് ഇതിനെല്ലാം കാരണമെന്നും രാഹുല്‍ കൂട്ടിച്ചേര്‍ത്തു.
പീഡനങ്ങളുടെ തലസ്ഥാനം എന്നാണ് ഇപ്പോള്‍ ഇന്ത്യ അറിയപ്പെടുന്നത്. ഇന്ത്യയ്ക്ക് പെണ്‍മക്കളെയും സഹോദരിമാരെയും പരിപാലിക്കാന്‍ കഴിയാത്തത് എന്തുകൊണ്ടാണെന്ന് വിദേശരാജ്യങ്ങള്‍ ചോദിക്കുന്നു. ഉത്തര്‍പ്രദേശില്‍ പെണ്‍കുട്ടിയെ മാനഭംഗം ചെയ്ത കേസില്‍ ബിജെപി എംഎല്‍എയാണ് പ്രതി. എന്നാല്‍ പ്രധാനമന്ത്രി ഇതെകുറിച്ച്‌ ഒരക്ഷരം മിണ്ടുന്നില്ലെന്നും രാഹുല്‍ വിമര്‍ശിച്ചു.
എന്നാല്‍, രാഹുല്‍ ഗാന്ധിയുടെ വിമര്‍ശനത്തിന് കടുത്ത മറുപടിയുമായി ബിജെപി ഡല്‍ഹി അദ്ധ്യക്ഷന്‍ മനോജ്‌ തിവാരി രംഗത്തെത്തി. യശസുള്ള രാജ്യമായി രാഹുല്‍ ഇന്ത്യയെ കാണുന്നില്ലെന്ന പറഞ്ഞ അദ്ദേഹം, അനവസരത്തിലുള്ള രാഹുലിന്‍റെ ഇത്തരം പ്രതികരണങ്ങള്‍ അതാണ് സൂചിപ്പിക്കുന്നതെന്നും രാഹുലിന്‍റെ മനോനിലയ്ക്ക് എന്തോ തകരാര്‍ സംഭവിച്ചിട്ടുണ്ടെന്നും പറഞ്ഞു.
