ന്യൂഡല്‍ഹി: അന്തരിച്ച കോണ്‍ഗ്രസ് നേതാവും ഡല്‍ഹി മുന്‍ മുഖ്യമന്ത്രിയുമായ ഷീല ദീക്ഷിത് ഇനി ജ്വലിക്കുന്ന ഓര്‍മ.
ശനിയാഴ്ച അന്തരിച്ച തങ്ങളുടെ പ്രിയനേതാവിന് കണ്ണീരില്‍ കുതിര്‍ന്ന യാത്രാമൊഴി നേര്‍ന്ന് ഡല്‍ഹി. ഷീലാ ദീക്ഷിതിന്‍റെ മൃതദേഹം ഔദ്യോഗിക ബഹുമതികളോടെ സംസ്കരിച്ചു...
ഇന്ന് വൈകുന്നേരം 3.45ഓടെ ഡല്‍ഹിയില്‍ യമുനാ തീരത്തെ നിഗംബോധ് ഘാട്ടില്‍ ഷീല ദീക്ഷിതിന്‍റെ ഭൗതിക ശരീരം പൂര്‍ണ ഔദ്യോഗിക ബഹുമതികളോടെ സംസ്കരിച്ചു. ആയിരങ്ങളാണ് സംസ്കാര ചടങ്ങില്‍ സംബന്ധിച്ചത്.
ആധുനിക ഡല്‍ഹിയുടെ ശില്‍പി എന്ന വിശേഷണത്തിന് ഉടമയായിരുന്നു ഷീല ദീക്ഷിത്. മുന്‍ മുഖ്യമന്ത്രിയുടെ വിയോഗത്തില്‍ അനുശോചിച്ചുകൊണ്ട് രാജ്യ തലസ്ഥാനത്ത് മൂന്ന് ദിവസത്തെ ദുഃഖാചരണം പ്രഖ്യാപിച്ചിട്ടുണ്ട്.
ഷീല ദീക്ഷിതിന്‍റെ ഭൗതിക ശരീരം നിസാമുദ്ദീനിലെ വസതിയില്‍ നിന്ന് വിലാപ യാത്രയായി കോണ്‍ഗ്രസ് ആസ്ഥാനത്ത് എത്തിച്ച്‌ ഒന്നരയോടെ പൊതുദര്‍ശനത്തിന് വെച്ചു. ശേഷം മൂന്നരയോടെ നിഗംബോധ് ഘാട്ടിലെത്തിച്ച്‌ സമ്പൂര്‍ണ്ണ ഔദ്യോഗിക ബഹുമതികളോടെ സംസ്കരിക്കുകയായിരുന്നു.
ആഭ്യന്തരമന്ത്രി അമിത് ഷാ, ഡല്‍ഹി മുഖ്യമന്ത്രി അരവിന്ദ് കേജ്‌രിവാള്‍, ഡല്‍ഹി ഉപമുഖ്യമന്ത്രി മനീഷ് സിസോദിയ, ഡല്‍ഹി ആഭ്യന്തരമന്ത്രി സത്യേന്ദ്ര ജെയിന്‍ തുടങ്ങിയവര്‍ മരണാനന്തരചടങ്ങുകളില്‍ പങ്കെടുത്തു.
പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തര മന്ത്രി അമിത് ഷാ, മുന്‍ പ്രധാനമന്ത്രി മന്‍മോഹന്‍ സിംഗ്, യു.പി.എ അദ്ധ്യക്ഷ സോണിയ ഗാന്ധി, ഡല്‍ഹി മുഖ്യമന്ത്രി അരവിന്ദ് കെജ്രിവാള്‍, കോണ്‍ഗ്രസ് ജനറല്‍ സെക്രട്ടറിമാരായ പ്രിയങ്ക ഗാന്ധി, കെ.സി വേണുഗോപാല്‍, മുതിര്‍ന്ന കോണ്‍ഗ്രസ് നേതാക്കളായ മോത്തിലാല്‍ വോറ, എ.കെ ആന്‍റണി, അഹമ്മദ് പട്ടേല്‍ എന്നിവരും ഭരണ പ്രതിപക്ഷ പാര്‍ട്ടികളുടെ മറ്റ് മുതിര്‍ന്ന നേതാക്കളും അന്തിമോപചാരം അര്‍പ്പിച്ചു.
മധ്യപ്രദേശ്, രാജസ്ഥാന്‍, ഛത്തീസ്ഗഢ് മുഖ്യമന്ത്രിമാരും കേരള സര്‍ക്കാറിനെ പ്രതിനീധീകരിച്ച്‌ റവന്യൂ മന്ത്രി ഇ. ചന്ദ്ര ശേഖരനും അന്തിമോപചാരം അര്‍പ്പിച്ചു.
