ദര്‍ഗ്: എഐസിസി ജനറല്‍ സെക്രട്ടറി പ്രിയങ്ക ഗാന്ധിയെ കള്ളന്‍റെ ഭാര്യയെന്നു വിശേഷിപ്പിച്ച്‌ കേന്ദ്രമന്ത്രി ഉമാ ഭാരതി.
പ്രിയങ്കയെ രാജ്യത്തെ ജനങ്ങള്‍ കാണുന്നത് കള്ളന്‍റെ ഭാര്യയായാണെന്നും ലോക്സഭാ തിരഞ്ഞെടുപ്പില്‍ ഉത്തര്‍പ്രദേശില്‍ അവര്‍ക്ക് യാതൊരു ചലനവും സൃഷ്ടിക്കാന്‍ സാധിക്കില്ലെന്നും ഉമാ ഭാരതി പറഞ്ഞു. പ്രിയങ്കയുടെ ഭര്‍ത്താവ് അഴിമതി നടത്തിയതിന് പ്രതിയാണെന്നും അവര്‍ പറഞ്ഞു.
ഇതൊരു ജനാധിപത്യ രാജ്യമാണ്, ഇവിടെ ആര്‍ക്കും എവിടെനിന്നും മത്സരിക്കാമെന്നും ഉമാ ഭാരതി വ്യക്തമാക്കി. വാരണാസിയില്‍ പ്രധാനമന്ത്രി നരേന്ദ്ര മോദിക്കെതിരേ പ്രിയങ്ക മത്സരിക്കാന്‍ സാധ്യതയുണ്ടെന്ന വാര്‍ത്തകളോട് പ്രതികരിക്കുകയായിരുന്നു അവര്‍.
അതേസമയം, നരേന്ദ്ര മോദിക്കെതിരെ യുപിയിലെ വാരാണസിയില്‍ മല്‍സരിക്കാന്‍ കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി തയാറാണെന്നു ഭര്‍ത്താവ് റോബര്‍ട്ട് വാദ്ര. ഇക്കാര്യം പ്രിയങ്കയുടെ പരിഗണനയിലുണ്ടെന്നും പാര്‍ട്ടി ഹൈക്കമാന്‍ഡ് ആണ് അന്തിമ തീരുമാനമെടുക്കേണ്ടതെന്നും അദ്ദേഹം പറഞ്ഞു.
മോദിക്കെതിരെ പ്രതിപക്ഷ നിരയുടെ പൊതു സ്ഥാനാര്‍ഥിയായി പ്രിയങ്ക മല്‍സരിച്ചേക്കുമെന്ന സൂചനകള്‍ പുറത്തുവന്ന പശ്ചാത്തലത്തിലാണു വാദ്രയുടെ പ്രതികരണം.
