Union Cabinet Meeting: കേന്ദ്രമന്ത്രിസഭാ യോ​ഗം ഇന്ന്; വെടിനിർത്തൽ ധാരണയ്ക്ക് ശേഷമുള്ള ആദ്യ യോ​ഗം

ന്യൂഡൽഹി: ഇന്ത്യ-പാക് വെടിനിർത്തൽ ധാരണയ്ക്ക് ശേഷമുള്ള കേന്ദ്ര മന്ത്രിസഭാ യോ​ഗം ഇന്ന് ചേരും. അതിർത്തിയിലെ സാഹചര്യമാകും ഇന്നത്തെ യോ​ഗത്തിൽ വിലയിരുത്തുക. സുരക്ഷാകാര്യങ്ങൾ പരിഗണിക്കുന്ന ക്യാബിനറ്റ് സമിതിയും ഇന്ന് യോ​ഗം ചേരുമെന്നാണ് വിവരം. പഹൽഗാം ഭീകരാക്രമണത്തിന് ശേഷം മൂന്നാം തവണയാണ് ഈ സമിതി യോഗം ചേരുന്നത്. ഓപ്പറേഷൻ സിന്ദൂരിന് ശേഷം കേന്ദ്ര മന്ത്രിസഭാ യോ​ഗം ചേർന്നിരുന്നു. പാകിസ്താന് നൽകിയ തിരിച്ചടി ഇന്ത്യയ്ക്ക് അഭിമാനനിമിഷമെന്നായിരുന്നു മന്ത്രിസഭാ യോ​ഗത്തിന് ശേഷം പ്രധാനമന്ത്രി നരേന്ദ്രമോദി പറ‍ഞ്ഞത്.

അതിനിടെ ഇന്ത്യ - പാക് ഡിജിഎംഒ തല ചർച്ച വീണ്ടും നടത്താനാണ് ധാരണ. അതിൽ സ്വീകരിക്കേണ്ട നിലപാടുകളും ഇന്നത്തെ മന്ത്രിസഭാ യോഗത്തിൽ ചർച്ചയാകുമെന്നാണ് വിവരം. പഹൽഗാം ഭീകരാക്രമണം നടത്തിയ ടിആർഎഫിനെ ഭീകരസംഘടനയായി പ്രഖ്യാപിക്കണമെന്ന ആവശ്യവുമായി യുഎൻ രക്ഷാസമിതിയെ സമീപിക്കാനൊരുങ്ങുകയാണ് ഇന്ത്യ. തെളിവുകൾ സഹിതം അടുത്തയാഴ്ച യുഎൻ സുരക്ഷാ സമിതിയെ സമീപിക്കും. ഇത് സംബന്ധിച്ചും ഇന്നത്തെ യോഗത്തിൽ ചർച്ചയുണ്ടാകും.

അതേസമയം വെടിനിർത്തൽ ധാരണയായതിന് ശേഷമുള്ള നാലാം രാത്രിയിലും അതിർത്തി ശാന്തമായിരുന്നു. ഇന്നലെ രാത്രിയും ഇന്ന് പുലർച്ചെയും ജമ്മു കശ്മീരും പഞ്ചാബും രാജസ്ഥാനും ഗുജറാത്തുമടക്കമുള്ള അതിർത്തി മേഖലകളിൽ സംഘർഷമോ, ഡ്രോൺ സാന്നിധ്യമോ ഉണ്ടായിട്ടില്ല.