Food Poison: തൃശൂരിൽ ധ്യാനം കൂടാനെത്തിയ നഴ്സിങ് വിദ്യാർഥികൾക്ക് ഭക്ഷ്യവിഷബാധ

തൃശൂർ: മുരിങ്ങൂർ ധ്യാന കേന്ദ്രത്തിൽ ധ്യാനം കൂടാനെത്തിയ 25 നഴ്സിങ് വിദ്യാർഥികൾക്ക് ഭക്ഷ്യവിഷബാധയേറ്റു. ഇതിൽ അഞ്ച് പേരെ ആശുപത്രിയിൽ പ്രവേശിപ്പിച്ചിരിക്കുകയാണ്. ബാക്കിയുള്ളവരെ പ്രാഥമിക ചികിത്സ നൽകി വിട്ടയച്ചു. നഴ്സിങ് വിദ്യാർത്ഥികൾക്ക് ഭക്ഷ്യവിഷബാധയേറ്റതോടെ ധ്യാന കേന്ദ്രത്തിൽ ആരോ​ഗ്യ വിഭാ​ഗം പരിശോധന തുടങ്ങി. പരിശേധനയ്ക്കായി മേലൂർ പഞ്ചായത്ത് ആരോഗ്യ വിഭാഗം ഭക്ഷ്യധാന്യങ്ങളുടെ സാംപിൾ ശേഖരിച്ചിട്ടുണ്ട്. 

Sabarimala Entry: മലകയറാൻ അനുവദിക്കണം; 10 വയസുകാരിയുടെ ഹർജി തള്ളി ഹൈക്കോടതി

കൊച്ചി: ശബരിമല പ്രവേശനത്തിന് അനുമതി നൽകണമെന്ന് ആവശ്യപ്പെട്ട് പത്ത് വയസ്സുകാരി സമര്‍പ്പിച്ച ഹർജി തള്ളി ഹൈക്കോടതി. ശബരിമല സ്ത്രീപ്രവേശനം സുപ്രീം കോടതി വിശാല ബെഞ്ചിന്‍റെ പരിഗണയിലാണ് എന്ന് ചൂണ്ടിക്കാട്ടിയാണ് ഹൈക്കോടതി ഡിവിഷൻ ബെഞ്ചിന്‍റെ നിലപാട്. തനിക്ക് ഇപ്പോൾ 10 വയസ്സാണെന്നും എന്നാൽ ആദ്യ ആർത്തവം ഉണ്ടാകാത്തതിനാൽ പ്രായപരിധി കണക്കിലെടുക്കാതെ മലകയറാൻ തന്നെ അനുവദിക്കണമെന്നാണ് കർണാടക സ്വദേശിയായ പെൺകുട്ടിയുടെ ആവശ്യം.

കൊവിഡ് കാലത്ത് മലകയറാൻ ആ​ഗ്രഹിച്ചതാണെന്നും അച്ഛന്‍റെ ആരോഗ്യ പ്രശ്നങ്ങളും സാമ്പത്തിക ബുദ്ധിമുട്ടും കാരണം അന്ന് അതിന് സാധിച്ചില്ലെന്നും ഹർജിയിൽ പറയുന്നു. മലയറാൻ തന്നെ അനുവദിക്കണമെന്ന് തിരുവിതാംകൂർ ദേവസ്വത്തോട് കോടതി നിർദ്ദേശം നൽകണമെന്നായിരുന്നു പെൺകുട്ടിയുടെ ആവശ്യം. ആവശ്യം ഉന്നയിച്ചിരുന്നുവെങ്കിലും തിരുവിതാംകൂര്‍ ദേവസ്വം ഇക്കാര്യത്തിൽ തീരുമാനം എടുക്കാതായതോടെയാണ് പെൺകുട്ടി കോടതിയെ സമീപിച്ചത്. 

ആദ്യ ആർത്തവം ആകാത്തതിനാൽ ആചാരങ്ങൾ പാലിച്ച് തനിക്ക് മലകയറാൻ കഴിയും. 10 വയസ്സെന്ന പ്രായപരിധി സാങ്കേതികമെന്നും പെൺകുട്ടി ഹർജിയിൽ ചൂണ്ടിക്കാട്ടി. അതേസമയം 10 മുതൽ 50 വയസ്സ് വരെ സ്ത്രീകൾക്ക് ശബരിമലയിൽ പ്രവേശനമില്ലെന്ന തിരുവിതാംകൂര്‍ ദേവസ്വത്തിന്റെ നിലപാടിൽ ഇടപെടാൻ സാധിക്കില്ലെന്ന് ഹൈക്കോടതി ഡിവിഷൻ ബെഞ്ച് വ്യക്തമാക്കി. വിഷയം സുപ്രീം കോടതിയുടെ വിശാല ബെഞ്ചിലാണെന്ന് ചൂണ്ടിക്കാട്ടിയാണ് ജസ്റ്റിസ് അനിൽ കെ നരേന്ദ്രൻ, ജസ്റ്റിസ് ഹരിശങ്കർ വി മേനോൻ എന്നിവരടങ്ങിയ ഡിവിഷൻ ബെഞ്ച് ഹർജി തള്ളിയത്.