Women's Day: വനിതാ ദിനത്തിൽ മഹാസംഗമം നടത്താനൊരുങ്ങി ആശാ വർക്കർമാർ

ആശാ വർക്കർമാരുടെ മഹാസംഗമത്തിന് പിന്തുണയറിയിച്ച് എഴുത്തുകാരി അരുന്ധതി റോയിയും പ്രമുഖ വ്യക്തികളും രംഗത്തെത്തിയിട്ടുണ്ട്.

തിരുവനന്തപുരം: വനിതാ ദിനമായ ഇന്ന് മഹാസംഗമം നടത്താനൊരുങ്ങി ആശാ വർക്കർമാർ. സെക്രട്ടറിയേറ്റിന് മുന്നിലെ സമരവേദിയിലേക്ക് ഇന്ന്  കേരളത്തിലെമ്പാടുമുള്ള സ്ത്രീകളെ ആശാ വർക്കർമാർ സ്വാഗതം ചെയ്തിട്ടുണ്ട്. 

Add Zee News as a Preferred Source

സെക്രട്ടറിയേറ്റിന് മുന്നിൽ എസ്‌യുസിഐയുടെ നേതൃത്വത്തിൽ രാപ്പകൽ സമരം നടത്തുന്ന ആശാ വർക്കർമാരുടെ സമരത്തിന്‍റെ ഇരുപത്തിയേഴാം ദിവസമാണ് ഇന്ന്.  ഇതിനിടയിൽ ആശാ വർക്കർമാരുടെ മഹാസംഗമത്തിന് പിന്തുണയറിയിച്ച് എഴുത്തുകാരി അരുന്ധതി റോയിയും നടിമാരായ ദിവ്യപ്രഭയും, കനി കുസൃതിയും, റിമാ കല്ലിങ്കലും രംഗത്തെത്തിയിട്ടുണ്ട്. ഇവരെ കൂടാതെ വിവിധ വനിതാ സംഘടനകളിൽ നിന്നടക്കമുള്ള പ്രതിനിധികൾ ഇന്ന് സമരവേദിയിൽ എത്തും. സമരം ശക്തമായി നീങ്ങുമ്പോഴും കേന്ദ്ര സർക്കാരും സംസ്ഥാന സർക്കാരും തമ്മിൽ ഫണ്ടിനെ ചൊല്ലിയുള്ള തർക്കത്തിലാണ്. മാത്രമല്ല സംസ്ഥാന സർക്കാർ ഇതുവരെയും അനുനയ ചർച്ചകൾക്കുള്ള സാധ്യതകളും തുറന്നിട്ടില്ല. 

വേതന വർധനവ് ഉൾപ്പെടെ പല ആവശ്യങ്ങൾ ഉന്നയിച്ച് ആശാ വർക്കർമാർ കഴിഞ്ഞ 27 ദിവസങ്ങമായി സമരത്തിലാണ്. വേതനം 7000 രൂപയിൽ നിന്ന് 21000 രൂപയാക്കുക, പെൻഷൻ അനുവദിക്കുക, വിരമിക്കുമ്പോൾ അഞ്ച് ലക്ഷം രൂപ അനുവദിക്കുക തുടങ്ങിയ ആവശ്യങ്ങൾ അംഗീകരിക്കണമെന്ന നിലപാടാണ് സംഘടനയുടെത്.