തിരുവനന്തപുരം: ശബരിമല വിഷയത്തില് കോണ്ഗ്രസ് വിശ്വാസികള്ക്കൊപ്പമാണെന്നും ഇക്കാര്യത്തില് വിശ്വാസികളെ ചതിച്ചതു ബിജെപിയാണെന്നും തിരുവനന്തപുരത്തെ യുഡിഎഫ് സ്ഥാനാര്ഥി ശശി തരൂര്.
ട്രിവാന്ഡ്രം വിമണ്സ് കോണ്ക്ലേവ് സംഘടിപ്പിച്ച സംവാദം പരിപാടിയില് പങ്കെടുത്തു സംസാരിക്കുവേ ആണ് ആദ്ദേഹം ഇപ്രകാരം അഭിപ്രായപ്പെട്ടത്.
കേന്ദ്രത്തില് അധികാരത്തിലിരിക്കുന്ന ബിജെപി സര്ക്കാരിനു കോടതിയില് ഹര്ജി നല്കാനും പാര്ലമെന്റില് നിയമ നിര്മാണം നടത്താനും ഓര്ഡിനന്സ് കൊണ്ടുവരുവാനും സാധിക്കുമായിരുന്നു. എന്നാല് അതവര് ചെയ്തില്ല. പകരം ശബരിമലയെ ഒരു സുവര്ണാവസരമായാണു ബിജെപി കണ്ടത്. ബിജെപിയുടെ സംസ്ഥാന അദ്ധ്യക്ഷന് തന്നെ ഇക്കാര്യം പരസ്യമായി പറയുകയും ചെയ്തു. ചില വിശ്വാസങ്ങളുടെ കാര്യം വരുമ്പോള് മാത്രം കാണിക്കുന്ന ജാഗ്രത സംസ്ഥാന സര്ക്കാര് ശബരിമലയുടെ കാര്യത്തില് പുലര്ത്തിയില്ലെന്നും തരൂര് ചൂണ്ടിക്കാട്ടി.
അഞ്ചു വര്ഷം ഭരണത്തിലിരുന്ന ബിജെപി സര്ക്കാര് രാജ്യത്തെ സാധാരണ ജനങ്ങളെ മറന്നു. വനിതാ സംവരണ ബില് പാസാക്കുമെന്നു പറഞ്ഞ കേന്ദ്ര സര്ക്കാര് കഴിഞ്ഞ അഞ്ചു വര്ഷവും അതിനെക്കുറിച്ച് യാതൊന്നും മിണ്ടിയില്ല. മാത്രമല്ല ഈ തിരഞ്ഞെടുപ്പ് പ്രകടന പത്രികയിലും പഴയ വാഗ്ദാനം തന്നെ ഉള്പ്പെടുത്തി. വാഗ്ദാനങ്ങളൊന്നും പാലിക്കാത്ത സര്ക്കാരാണ് ബിജെപിയുടേത്. എന്നാല് കോണ്ഗ്രസ് അങ്ങനെയല്ലെന്നും പറയുന്നതു ചെയ്യുമെന്നും തരൂര് പറഞ്ഞു.
ഹൈക്കോടതി ബെഞ്ച് തിരുവനന്തപുരത്തു കൊണ്ടുവരുന്നതിന് ഒരു എംപിയെന്ന നിലയില് താന് ചെയേണ്ടതെല്ലാം ചെയ്തൂവെന്നും കേന്ദ്ര സര്ക്കാരാണ് ഇക്കാര്യത്തില് നിലപാടെടുക്കേണ്ടതെന്നും സംവാദത്തില് ഉയര്ന്ന ചോദ്യത്തിനു മറുപടിയായി അദ്ദേഹം പറഞ്ഞു.
അതേസമയം, സംവാദത്തിനിടെ മുസ്ലിം ലീഗ് ദേശീയ സമിതി അംഗം പാണക്കാട് സെയ്ദ് സാദിക്കലി ശിഹാബ് തങ്ങള് വേദിയിലെത്തി. 20 മണ്ഡലങ്ങളിലും മത്സരിക്കുന്ന യുഡിഎഫ് സ്ഥാനാര്ഥികള് മുസ്ലിം ലീഗിന്റെ സ്വന്തം സ്ഥാനാര്ഥികള് തന്നെയാണെന്നും അതുകൊണ്ടു ശശി തരൂരും ലീഗിന്റെ സ്ഥാനാര്ഥിയാണെന്നും ശിഹാബ് തങ്ങള് പറഞ്ഞു.
അതേസമയം, തിരുവനന്തപുരം മണ്ഡലത്തില് പോരാട്ടം കനക്കുകയാണ്. ആര്ക്കാണ് വിജയമെന്ന് പ്രവചിക്കാന് സാധിക്കാത്ത അവസ്ഥയാണ് മണ്ഡലത്തില് കാണുന്നത്. മൂന്നുമുന്നണികളും തമ്മില് കടുത്ത പോരാട്ടമാണ് നടക്കുന്നത്. മൂന്നുമുന്നണികളും ഒന്നിനൊന്ന് മികച്ച സ്ഥാനാര്ഥികളെയാണ് മണ്ഡലത്തില് ഇത്തവണ അങ്കത്തിനിറക്കിയത്... ആര്ക്കും ഒന്നും പ്രവചിക്കാന് സാധിക്കാത്ത അവസ്ഥയാണ് മണ്ടലത്തില്...
മണ്ഡലം ആര്ക്കൊപ്പം? മെയ് 23 വരെ കാത്തിരിക്കാം...