കോഴിക്കോട്: ഡല്‍ഹി ജെഎന്‍യുവിലെ വിദ്യാര്‍ത്ഥി സമരത്തിന് ഐക്യദാര്‍ഢ്യം പ്രഖ്യാപിച്ച്‌ കാലിക്കറ്റ് സര്‍വകലാശാല വിദ്യാര്‍ത്ഥികള്‍.
കേന്ദ്രമന്ത്രിയെ കരിങ്കൊടി കാട്ടിയാണ് വിദ്യാര്‍ത്ഥികള്‍ പ്രതിഷേധം അറിയിച്ചത്.
എസ്‌എഫ്‌ഐ പ്രവര്‍ത്തകരാണ് കേന്ദ്രമാനവ വിഭവശേഷി സഹമന്ത്രി സഞ്ജയ് ധോത്രെക്ക് നേരെ പ്രതിഷേധമുയര്‍ത്തിയത്.
സര്‍വകലാശാലയില്‍ പുതുതായി നിര്‍മിച്ച അധ്യാപക പരിശീലന കേന്ദ്രത്തിന്‍റെ ഉദ്ഘാടനത്തിനെത്തിയതായിരുന്നു മന്ത്രി.
സംഭവത്തില്‍ പതിനഞ്ചോളം എസ്‌എഫ്‌ഐ പ്രവര്‍ത്തകരെ പോലീസ് കസ്റ്റഡിയിലെടുത്തു. മന്ത്രി സംസാരിക്കാന്‍ എഴുന്നേറ്റപ്പോള്‍ മുദ്രാവാക്യം വിളിക്കുകയും കൊടി വീശുകയുമായിരുന്നു.
ക്യാമ്പസിലെ ഇ.എം.എസ്. ഹാളിലായിരുന്നു പ്രതിഷേധം അരങ്ങേറിയത്.
ജെഎന്‍യു അധികൃതര്‍ തന്നെ പ്രശ്നം പരിഹരിക്കണമെന്നും വിദ്യാര്‍ത്ഥികള്‍ പരിധി ലംഘിക്കരുതെന്നും ധോത്രെ പിന്നീട് മാധ്യമപ്രവര്‍ത്തകരോട് പറഞ്ഞു.
