‌Rapper Vedan Ganja Seized: റാപ്പർ വേടന്റെ ഫ്ലാറ്റിൽ പരിശോധന; 7 ​ഗ്രാം കഞ്ചാവ് പിടികൂടി

ഹിരൺ ദാസ് മുരളി എന്നാണ് വേടന്റെ യഥാർത്ഥ പേര്. നേരത്തെ സോഷ്യൽ മീഡിയയിലൂടെ ഇയാൾ ലഹരിക്കെതിരെ പ്രചാരണം നടത്തിയിരുന്നു.

കൊച്ചി: റാപ്പർ വേടന്റെ ഫ്ലാറ്റിൽ ഡാൻസാഫ് സംഘം നടത്തിയ പരിശോധനയിൽ കഞ്ചാവ് പിടികൂടി. 7 ​ഗ്രാം കഞ്ചാവ് ആണ് പിടികൂടിയത്. വേടന്റെ കൊച്ചി തൃപ്പൂണിത്തുറയിലെ ഫ്ലാറ്റിലാണ് പരിശോധന നടത്തിയത്. ഫ്ലാറ്റിൽ ലഹരി ഉപയോഗിക്കുന്നുണ്ടെന്ന രഹസ്യ വിവരത്തെ തുടർന്നായിരുന്നു പരിശോധന. പരിശോധന സമയം 9 പേരടങ്ങുന്ന സംഘമാണ് വേടന്റെ ഫ്ലാറ്റിൽ ഉണ്ടായിരുന്നത്. ഇന്നലെ രാത്രി ഒരു പ്രോ​ഗ്രാം കഴിഞ്ഞ ശേഷമാണ് വേടനും കൂട്ടുകാരും ഫ്ലാറ്റിലെത്തിയത്. വേടന്‍റെ അറസ്റ്റ് ഉടന്‍ രേഖപ്പെടുത്തുമെന്നാണ് വിവരം. തൃപ്പൂണിത്തുറ പൊലീസ് തുടർനടപടിയെടുക്കും. 

അതേസമയം കഴിഞ്ഞ ദിവസം കഞ്ചാവുമായി സംവിധായകരായ ഖാലിദ് റഹ്മാനെയും അഷ്റഫ് ഹംസയെയും അറസ്റ്റ് ചെയ്തിരുന്നു. ഷാലിഫ് മുഹമ്മദ് എന്നയാളും പിടിയിലായിരുന്നു. ഇവരിൽ നിന്ന് 1.6 ​ഗ്രാം കഞ്ചാവാണ് പിടികൂടിയത്. ഛായാ​ഗ്രഹകൻ സമീർ താഹിന്റെ ഉടമസ്ഥതയിലുള്ള ഫ്ലാറ്റിൽ നിന്നാണ് ഇവരെ കഞ്ചാവുമായി പിടികൂടിയത്. ഷാലിഫ് ആണ് ഇടനിലക്കാരിൽ നിന്ന് ഹ്രൈബിഡ് കഞ്ചാവ് വാങ്ങിയതെന്നാണ് വിവരം.

അതിനിടെ ആലപ്പുഴ ഹൈബ്രിഡ് കഞ്ചാവ് കേസില്‍ മുൻ ബിഗ് ബോസ് താരം ജിന്റോയ്ക്ക് എക്സൈസ് നോട്ടീസ് അയച്ചിരുന്നു. ചൊവ്വാഴ്ച ചോദ്യം ചെയ്യലിന് ഹാജരാകാനാണ് നോട്ടീസ് നൽകിയത്. കഞ്ചാവ് കേസില്‍ പിടിയിലായ ഒന്നാം പ്രതി തസ്ലിമയ്ക്ക് ജിന്റോയുമായി സാമ്പത്തിക ഇടപാടുകൾ ഉണ്ടെന്ന് കണ്ടെത്തിയതിനെ തുടര്‍ന്നാണ് ചോദ്യം ചെയ്യാന്‍ വിളിപ്പിച്ചിരിക്കുന്നത്. ലഹരി ഇടപാടുമായി ബന്ധപ്പെട്ട് ആണോ സാമ്പത്തിക ഇടപാട് എന്ന കാര്യത്തിൽ വ്യക്തത വരുത്താനാണ് ചോദ്യം ചെയ്യുന്നത്. ആലപ്പുഴയിലെ ഹൈബ്രിഡ് കഞ്ചാവ് കേസിൽ നടന്മാരായ ഷൈൻ ടോം ചാക്കോ, ശ്രീനാഥ് ഭാസി എന്നിവർ ഉൾപ്പടെ അഞ്ച് പേർക്കാണ് എക്സൈസ് നോട്ടീസ് അയച്ചിരിക്കുന്നത്.