 "Drugs Usage: 'ലഹരിക്കെതിരെ സമഗ്ര പദ്ധതി ആവശ്യം'; ബ്രേക്കിംഗ് ഡി വെബ്സൈറ്റ് കേരള ഗവർണർ ലോഞ്ച് ചെയ്തു")
തിരുവനന്തപുരം: സമൂഹത്തിലെ എല്ലാ വിഭാഗങ്ങളെയും ഉൾപ്പെടുത്തിയുള്ള ബോധവത്കരണവും മികച്ച നടപടികളും അടങ്ങുന്ന സമഗ്ര പദ്ധതിയിലൂടെ മാത്രമേ മയക്കുമരുന്ന് എന്ന മാരക വിപത്തിനെ ചെറുത്തു തോൽപ്പിക്കാൻ കഴിയൂവെന്ന് ഗവർണർ രാജേന്ദ്ര വിശ്വനാഥ് ആർലേകർ. യുവാക്കളെയും വിദ്യാർഥികളെയും രക്ഷിതാക്കളെയും കേന്ദ്രീകരിച്ചുള്ള ബോധവത്കരണം കൂടുതൽ ഊർജിതമാക്കേണ്ടതുണ്ടെന്നും ഗവർണർ പറഞ്ഞു.
ലഹരി വിപത്തിനെതിരെ കേരള പത്രപ്രവർത്തക യൂണിയൻ (KUWJ) നിർമിത ബുദ്ധിയുടെ സഹായത്തോടെ നടപ്പാക്കുന്ന ബ്രേക്കിംഗ് ഡി കാമ്പയിനിൻ്റെ വെബ്സൈറ്റ് ലോഞ്ച് ചെയ്ത് സംസാരിക്കുകയായിരുന്നു കേരള ഗവർണർ. വെബ്സൈറ്റ്: www.BreakingD.com. നിർമിത ബുദ്ധി സ്റ്റാർട്ടപ്പ് സൂപർ എഐയുടെ (ZuperAI) സഹകരണത്തോടെയാണ് ഇതിന്റെ നടത്തിപ്പ്.
ഇനിയെങ്കിലും ലഹരിക്ക് തടയിടാൻ കഴിഞ്ഞില്ലെങ്കിൽ ഇത് സമൂഹത്തെ നശിപ്പിക്കുമെന്നും അതിനായി പത്രപ്രവർത്തക യൂണിയൻ ആവിഷ്കരിച്ച പദ്ധതി മാതൃകാപരമാണെന്നും ഗവർണർ അഭിപ്രായപ്പെട്ടു. ലഹരി വിരുദ്ധ പ്രചാരണത്തിന് മാധ്യമങ്ങൾ ദിവസവും പ്രൈം സ്ലോട്ടിൽ സമയവും സ്ഥലവും നീക്കിവെക്കണമെന്നും ഗവർണർ ആർവി ആർലേകർ ആവശ്യപ്പെട്ടു.
രാസലഹരികളുടെ ചങ്ങലക്കണ്ണികളെ കുറിച്ചുള്ള വിവരങ്ങൾ നിര്മിതബുദ്ധിയുടെ സഹായത്തോടെ ഭയപ്പാടില്ലാതെ അധികൃതരുടെ ശ്രദ്ധയില് കൊണ്ടുവരാന് സാധ്യമാകുന്നതാണ് പദ്ധതി. ക്യു.ആര് കോഡ് വഴി ആർക്കുവേണമെങ്കിലും പേര് വിവരങ്ങള് വെളിപ്പെടുത്താതെ ബ്രേക്കിങ് ഡി ആപ്പിലേക്ക് നിര്ണായക വിവരങ്ങള് നല്കാന് സാധിക്കും.
ആദ്യഘട്ടത്തില് എല്ലാ ജില്ലകളിലെയും പ്രസ്ക്ലബ് ആസ്ഥാനങ്ങളിലും കെ.യു.ഡബ്ല്യു.ജെയുടെ സോഷ്യല് മീഡിയ പ്ലാറ്റ്ഫോമുകളിലും ക്യു.ആർ കോഡ് സ്കാനര് പ്രചാരണം നടക്കും. രണ്ടാംഘട്ടത്തില് സംസ്ഥാനത്തെ സ്കൂളുകളില് ക്യു.ആർ കോഡ് പോസ്റ്റർ പതിപ്പിച്ച് ക്ബോധവത്കരണ പരിപാടികള് സംഘടിപ്പിക്കും. വിവിധ സാമൂഹിക സംഘടനകളും പദ്ധതിയിൽ പങ്കാളികളാകും.
ഒരു വര്ഷം നീളുന്ന കാമ്പയിന്റെ ഭാഗമായി വിവിധ ജില്ലകളിൽ പത്രപ്രവർത്തക യൂനിയൻ നേതൃത്വത്തിൽ സ്പോര്ട്സ് ചാമ്പ്യന്ഷിപ്പുകളും നടത്തും. കണ്ണൂരില് വോളിലീഗും, കാസര്കോട് വടംവലി ചാമ്പ്യന്ഷിപ്പും വയനാട്ടില് ക്രിക്കറ്റ് ലീഗും കോഴിക്കോട് ഫുട്ബാള് ലീഗും കാമ്പയിനിന്റെ ഭാഗമായി നടക്കും. മ്യൂസോണ്, കാര്ട്ടന് ഇന്ത്യ അലയന്സ് എന്നീ സ്റ്റാര്ട്ടപ്പുകളുടെ പിന്തുണയോടെയാണ് ബ്രേക്കിംഗ്ഡി വെബ്സൈറ്റ് വികസിപ്പിച്ചത്.
പദ്ധതിയുടെ ലോഗോ കഴിഞ്ഞ ദിവസം മന്ത്രി എം.ബി രാജേഷ് പ്രകാശനം ചെയ്തിരുന്നു. മെഗാ ലോഞ്ച് ജൂണില് മുഖ്യമന്ത്രി പിണറായി വിജയൻ നിര്വഹിക്കും. രാജ്ഭവനിൽ നടന്ന ചടങ്ങിൽ പത്രപ്രവർത്തക യൂണിയൻ സംസ്ഥാന പ്രസിഡൻ്റ് കെ.പി റജി, ജനറൽ സെക്രട്ടറി സുരേഷ് എടപ്പാൾ, സൂപർഎഐ സി. ഇ.ഒ അരുൺ പെരൂളി, വി.എം രാജു, ഗവർണറുടെ അഡീഷനൽ പ്രൈവറ്റ് സെക്രട്ടറി ഹരി എസ്. കർത്ത, രാജ്ഭവൻ പി.ആർ.ഒ എസ് സുബ്രഹ്മണ്യൻ തുടങ്ങിയവർ പങ്കെടുത്തു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.
