 "Kerala Rain Update: അതിതീവ്ര മഴയിൽ വിറങ്ങലിച്ച് കേരളം; മഴക്കെടുതി രൂക്ഷം, 4 മരണം, മലയോര മേഖലകളിൽ ജാഗ്രത, യോല്ലോ അലർട്ട് 9 ജില്ലകളിൽ")
തിരുവനന്തപുരം: സംസ്ഥാനത്ത് മഴക്കെടുതി രൂക്ഷം. വിവിധ ജില്ലകളിലായി മഴയെ തുടർന്നുണ്ടായ അപകടങ്ങളിൽ 4 പേര് മരിച്ചു. കണ്ണൂര് കൂത്തുപറമ്പിൽ വീടിന് മുകളിൽ മരം വീണ് വയോധികന് ദാരുണാന്ത്യം. ചുട്ടാട് അഴിമുഖത്ത് ബോട്ട് മറിഞ്ഞ് മത്സ്യത്തൊഴിലാളി മരിച്ചു. ഇടുക്കിയിൽ മരം വീണ് തോട്ടം തൊഴിലാളിയായ മധ്യവസ്ക മരിച്ചു. മൂന്നാറിലെ മണ്ണിടിച്ചിലിൽ ലോറിക്ക് മുകളിലേക്ക് മണ്ണിടിഞ്ഞ് ഒരാൾ മരിച്ചു. വ്യാപക നാശനഷ്ടങ്ങളാണ് സംസ്ഥാനത്ത് പെയ്യുന്ന കനത്ത മഴയിലും കാറ്റിലും ഉണ്ടായിരിക്കുന്നത്.
കനത്ത മഴയിലും കാറ്റിലും നിരവധി മരങ്ങൾ കടപുഴകി വീണ് വീടുകൾക്ക് നാശനഷ്ടമുണ്ടായിട്ടുണ്ട്. കൊല്ലത്ത് ലോറിക്ക് മുകളിലേക്ക് മരം കടപുഴകി വീണ് അപകടമുണ്ടായി. നിർത്തിയിട്ടിരുന്ന ലോറിയിലേക്കാണ് മരം വീണത്. ഫയർഫോഴ്സും നാട്ടുകാരും ചേർന്ന് മരം മുറിച്ചു മാറ്റി. അതിനിടെ തുടർച്ചയായ മഴയിൽ വെള്ളമിറങ്ങി ശാസ്താംകോട്ടയിൽ കടമുറികൾ പ്രവർത്തിച്ചിരുന്ന കെട്ടിടം ഇടിഞ്ഞു താഴ്ന്നു. കെട്ടിടത്തിൽ വിള്ളൽ കണ്ടെത്തിയിരുന്നു. അപകടാവസ്ഥ മനസിലാക്കിയതിനാൽ ഇന്നലെ ഇവിടെ കടകൾ തുറക്കാഞ്ഞത് വൻ അപകടം ഒഴിവാക്കി.
എറണാകുളം എടത്തലയിൽ മണ്ണിടിഞ്ഞ് വീണ് ഒരു വീട് തകർന്നു. വീട്ടിലുണ്ടായിരുന്നയാൾ അത്ഭുതകരമായാണ് രക്ഷപ്പെട്ടത്. മഴ ശക്തമായതിനാൽ ജില്ലയിലെ മലയോര പ്രദേശങ്ങളിലൂടെയുള്ള രാത്രിയാത്ര നിരോധിച്ചിരുന്നു.
കണ്ണൂർ ആറളം മേഖലയിൽ മലവെള്ള പാച്ചിലുണ്ടായി. വനമേഖലയിൽ മണ്ണിടിച്ചിലുണ്ടായെന്ന സംശയത്തെ തുടർന്ന് സുരക്ഷാ മുൻകരുതലിന്റെ ഭാഗമായി ആദിവാസി പുനരധിവാസ മേഖലയിലെ പതിമൂന്നാം ബ്ലോക്ക്, പതിനൊന്നാം ബ്ലോക്ക് എന്നിവിടങ്ങളിൽ ആളുകളെ മാറ്റിപാർപ്പിച്ചു. 50ലധികം വീടുകളിൽ വെള്ളം കയറിയിട്ടുണ്ട്. പഴശ്ശി ഡാമിന്റെ ഷട്ടറുകൾ തുറക്കുന്നതിനാൽ ഡാമിന്റെ താഴെ ഭാഗത്ത് ഇരുകരകളിലും ഉള്ള ജനങ്ങൾ ജാഗ്രത പാലിക്കണമെന്ന് നിർദേശം നൽകിയിട്ടുണ്ട്. പഴശ്ശി ഡാമിന്റെ 13 ഷട്ടറുകൾ മൂന്നു മീറ്റർ വീതവും ഒരു ഷട്ടർ രണ്ടര മീറ്ററും ഉയർത്തിയിട്ടുണ്ട്. 23.10 മീറ്ററാണ് നിലവിലെ ജലനിരപ്പ്.
വയനാട്ടിലും അതിശക്തമായ മഴ തുടരുകയാണ്. മക്കിമല പുഴയിലെ നീരൊഴുക്ക് അതിശക്തമാണ്. താഴ്ന്ന പ്രദേശങ്ങളിൽ ഇതിനോടകം വെള്ളം കയറിയിട്ടുണ്ട്. ചെളി കലങ്ങിയ വെള്ളമാണ് കുത്തിയൊഴുകുന്നത്. പ്രദേശത്ത് മണ്ണിടിച്ചിൽ ഉണ്ടായോയെന്നും പരിശോധിക്കുന്നുണ്ട്. പ്രദേശവാസികൾ ജാഗ്രത പാലിക്കണമെന്ന് നിർദ്ദേശം.
അതേസമയം കേരളത്തിൽ കനത്ത മഴ തുടരുന്ന സാഹചര്യത്തിൽ ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ യെല്ലോ അലേർട്ടാണ് പ്രഖ്യാപിച്ചിരിക്കുന്നത്. കേരളാ തീരത്ത് 60 കി.മീ വരെ വേഗത്തിൽ കാറ്റ് വീശാനും സാധ്യതയുണ്ട്. മത്സ്യബന്ധനത്തിന് ഏർപ്പെടുത്തിയ വിലക്ക് തുടരുകയാണ്. കേരള തീരത്ത് ഉയർന്ന തിരമാലകൾക്കും സാധ്യതയുണ്ട്. മഹാരാഷ്ട്ര-കേരള തീരത്തോട് ചേർന്ന് ന്യൂനമർദ്ദപാത്തി നിലനിൽക്കുന്നുണ്ട്. മലയോരമേഖലകളിലുള്ളവർ ജാഗ്രത പാലിക്കാൻ നിർദ്ദേശമുണ്ട്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.
)