സംസ്ഥാനത്ത് 8 ജില്ലകളിലാണ് നിലവിൽ ഓറഞ്ച് അലർട്ട് പ്രഖ്യാപിച്ചിരിക്കുന്നത്. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, വയനാട് എന്നിവിടങ്ങളിലാണ് അലർട്ട്.
തിരുവനന്തപുരം: സംസ്ഥാനത്ത് മഴ മുന്നറിയിപ്പിൽ മാറ്റം. 8 ജില്ലകളിൽ ഓറഞ്ച് അലർട്ട് പ്രഖ്യാപിച്ചു. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, വയനാട് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചിരിക്കുന്നത്. രാവിലെ മുതൽ ശക്തമായ മഴയാണ് സംസ്ഥാനത്തുടനീളം പെയ്ത് കൊണ്ടിരിക്കുന്നത്.
ഇടുക്കിയിൽ പൊന്മുടി, കല്ലാർകുട്ടി, ലോവർപെരിയാർ, മലങ്കര അണക്കെട്ടുകൾ തുറന്നു. പെരിയാർ, കല്ലാർ, മുതിരപ്പുഴയാർ, തൊടുപുഴ - മൂവാറ്റുപുഴ ആറുകൾ എന്നിവിടങ്ങളിൽ നീരൊഴുക്ക് ശക്തമായിരിക്കുന്നതിനാൽ തീരങ്ങളോട് ചേർന്ന് താമസിക്കുന്നവർ ജാഗ്രത പുലർത്തണമെന്ന് നിർദ്ദേശം നൽകിയിട്ടുണ്ട്. പലയിടങ്ങളിലും ഗതാഗതവും തടസപ്പെട്ടു.
വയനാട്ടിലും ശക്തമായ മഴ തുടരുകയാണ്. ചൂരൽമല, മുണ്ടക്കൈ മേഖലകളിൽ കനത്ത മഴയാണ് പെയ്യുന്നത്. അതേസമയം മഴ തുടരുന്ന സാഹചര്യത്തിൽ ബെയ്ലി പാലം താൽക്കാലികമായി അടച്ചു. പാലത്തിന്റെ സംരക്ഷണ ഭിത്തിക്ക് വിള്ളൽ കണ്ടെത്തിയിരുന്നു. പാലത്തിന്റെ അടിഭാഗത്തെ മണ്ണും ഒലിച്ചു പോയി. PWDയും ഊരാളുങ്കൽ സെസൈറ്റിയും ചേർന്ന് 40 ലക്ഷം രൂപ ചെലവഴിച്ച് നിർമ്മിച്ച സംരക്ഷണ ഭിത്തിക്കാണ് വിള്ളൽ സംഭവിച്ചിരിക്കുന്നത്.
കനത്ത മഴയിൽ തൊടുപുഴയാർ നിറഞ്ഞ് കവിഞ്ഞൊഴുകുകയാണ്. പലയിടത്തും വെള്ളം കര കവിഞ്ഞൊഴുകി. കെ.എസ്.ആർ.ടി.സി ബസ് സ്റ്റാൻഡിലെ പാർക്കിങ് ഏരിയയിൽ വെള്ളം കയറിയത് ആശങ്ക പരത്തി. ഇന്നലെ രാത്രി മുതൽ പെയ്യുന്ന കനത്ത മഴയിൽ മലങ്കര ഡാമിൽ നിന്ന് പുറത്തേക്കൊഴുക്കുന്ന വെള്ളം ഒരുമിച്ചെത്തിയതാണ് പുഴയിലെ ജലനിരപ്പ് ക്രമാതീതമായി ഉയരാൻ കാരണം. പ്രദേശത്ത് ഇപ്പോഴും ശക്തമായ മഴ തുടരുകയാണ്. മുതലിയാർമഠം ഭാഗത്ത് വീടുകളിൽ വെള്ളം കയറി. നാലു വീടുകളിലാണ് വെള്ളം കയറിയത്. വീട്ടിൽ ഉണ്ടായിരുന്നവരെ സമീപ വീടുകളിലേക്ക് മാറ്റി താമസിപ്പിച്ചു.
അതേസമയം പുതുക്കുറിച്ചിയിൽ മത്സ്യബന്ധന വള്ളം മറിഞ്ഞ് ഒരാളെ കാണാതായി. രാവിലെ ഏഴ് മണിയോടെയാണ് അപകടമുണ്ടായത്. പുതുക്കുറിച്ചി തൈരുവിൽ തൈവിളാകം വീട്ടിൽ ആൻ്റണി ( 65 ) യെയാണ് കാണാതായത്. മത്സ്യബന്ധനത്തിന് പോകുമ്പോൾ ശക്തമായ തിരയിൽ വള്ളം മറിയുകയും ആൻ്റണി കടലിലേയ്ക്ക് തെറിച്ചു വീഴുകയുമായിരുന്നു. വള്ളത്തിലുണ്ടായിരുന്ന മറ്റ് മൂന്നു പേർ നീന്തി രക്ഷപ്പെട്ടു. ആന്റണിക്കായി മത്സ്യത്തൊഴിലാളികളും കോസ്റ്റൽ പോലീസും തിരച്ചിൽ തുടരുകയാണ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.
)