High Court of Kerala: 'റാഗിങ് നിയമങ്ങൾ പരിഷ്ക്കരിക്കണം'; പുതിയ ചട്ടം രൂപീകരിക്കണമെന്ന് ഹൈക്കോടതി

High Court of Kerala: 1998ലെ റാഗിങ് നിരോധന നിയമത്തിന്റെ അടിസ്ഥാനത്തിൽ ചട്ടങ്ങൾ രൂപീകരിക്കണമെന്നാണ് കോടതി മുന്നോട്ടു വച്ചിരിക്കുന്ന പ്രധാന നിർദേശം

കൊച്ചി:  സംസ്ഥാനത്തെ റാഗിങ് തടയാൻ കർശന നടപടികൾ വേണമെന്ന് ഹൈക്കോടതി. ഇതു സംബന്ധിച്ചുള്ള നിയമങ്ങളിൽ പരിഷ്കരണം വേണമെന്നും കോടതി വ്യക്തമാക്കി. 1998ലെ റാഗിങ് നിരോധന നിയമത്തിന്റെ അടിസ്ഥാനത്തിൽ ചട്ടം രൂപീകരിക്കണമെന്നും ചീഫ് ജസ്റ്റിസ് നിതിൻ ജാംദാർ, ജസ്റ്റിസ് സി. ജയചന്ദ്രൻ എന്നിവരടങ്ങിയ പ്രത്യേക ബെഞ്ച് നിർദേശിച്ചു. കോട്ടയം ഗവ. നഴ്സിങ് കോളജിലെ റാഗിങ്, പൂക്കോട്ടൂർ വെറ്ററിനറി സർവകലാശാലയിലെ സിദ്ധാർഥന്റെ മരണം തുടങ്ങിയ ഒട്ടേറെ റാഗിങ് സംഭവങ്ങൾ ചൂണ്ടിക്കാട്ടി ലീഗൽ സർവീസ് അതോറിറ്റി നൽകിയ ഹർജിയിലാണ് ഹൈക്കോടതിയുടെ ഇടപെടൽ.

Add Zee News as a Preferred Source

1998ലെ റാഗിങ് നിരോധന നിയമത്തിന്റെ അടിസ്ഥാനത്തിൽ ചട്ടങ്ങൾ രൂപീകരിക്കണമെന്നാണ് കോടതി മുന്നോട്ടു വച്ചിരിക്കുന്ന പ്രധാന നിർദേശം. ചട്ടങ്ങൾ നിലവിൽ വന്നാൽ തന്നെ പ്രശ്നങ്ങൾ പരിഹരിക്കപ്പെടും. ഇത്തരത്തിൽ ചട്ടങ്ങൾ രൂപീകരിക്കുന്നതിന് സമൂഹത്തിന്റെ വിവിധ മേഖലകളിൽനിന്നുള്ളവർ ഉൾപ്പെടുന്ന വർക്കിങ് ഗ്രൂപ്പ് രൂപീകരിക്കണം. 1998ലെ നിയമമാണ് അതുകൊണ്ടു തന്നെ ആവശ്യമായ പരിഷ്കരണം ആവാം. നിയമത്തിൽ ഭേദഗതി വരുത്തുന്ന കാര്യത്തിലും വർക്കിങ് ഗ്രൂപ്പിൽ നിന്നു നിർദേശങ്ങൾ തേടാമെന്ന് കോടതി വ്യക്തമാക്കി.

അതേസമയം, റാഗിങ് നിരോധന നിയമം പ്രകാരം സംസ്ഥാനത്തെ കോളേജുകളിൽ പ്രത്യേക നിയമങ്ങൾ രൂപീകരിക്കണമെന്നും സർക്കാരിനും പ്രവർത്തന ഗ്രൂപ്പ്  രൂപീകരിക്കാമെന്നും പ്രത്യേക ബെഞ്ച് നിര്‍ദേശിച്ചു. ഇതുസംബന്ധിച്ച് സംസ്ഥാന സര്‍ക്കാരിനോട് മറുപടി സത്യവാങ്മൂലം നൽകാനും കോടതി നിര്‍ദേശിച്ചു. ജില്ല- സംസ്ഥാന തല റാഗിങ് നിരോധന കമ്മിറ്റികളുട പ്രവർത്തനങ്ങൾ രേഖാമൂലം ഉറപ്പ് വരുത്തണം. ജില്ല- സംസ്ഥാന കമ്മിറ്റികൾ ഇതുവരെ രൂപീകരിച്ചിട്ടില്ലെങ്കിൽ എത്രസമയം വേണമെന്ന് സർക്കാർ കോടതിയെ അറിയിക്കണമെന്നും നിലവിലുള്ള റാഗിങ് നിരോധന നിയമങ്ങള്‍ പരിശോധിക്കുകയാണെന്നും ഹൈക്കോടതി വ്യക്തമാക്കി.

ജില്ല-സംസ്ഥാന തല കമ്മിറ്റികളാണ് റാഗിങ് നിരോധന നിയമപ്രകാരം ചട്ടങ്ങൾ രൂപീകരിക്കേണ്ടതെന്നും കോടതി വ്യക്തമാക്കി. യുജിസിയെ കക്ഷി ചേര്‍ക്കാനും ഹൈക്കോടതി നിര്‍ദേശം നൽകി. കോടതിയിൽ ഹാജരാകാൻ കക്ഷികള്‍ക്ക് നോട്ടീസ് നൽകി. ഇന്നലെയാണ് ഹൈക്കോടതി ചീഫ് ജസ്റ്റിസ് അധ്യക്ഷനായ ഡിവിഷൻ ബെഞ്ച് റാഗിങ് കേസുകള്‍ക്കായി പ്രത്യേക ബെഞ്ച് രൂപീകരിക്കാൻ നിര്‍ദേശിച്ചത്. സംസ്ഥാനത്തെ കോളജുകളിലും സ്കൂളുകളിലും റാഗിങ് കേസുകൾ വർധിക്കുന്ന സാഹചര്യത്തിലാണ് കേരള ലീഗൽ സർവീസസ് അതോറിറ്റി ഹൈക്കോടതിയിൽ പൊതുതാൽപര്യ ഹർജി നൽകിയത്. ഇതിന്‍റെ അടിസ്ഥാനത്തിലാണ് പ്രത്യേക ബെഞ്ച് രൂപീകരിച്ചത്.