April Fool : ഏപ്രിൽ ഒന്ന് വിഡ്ഢിദിനം ആയതെങ്ങനെ? അറിയാം ഇതിനു പിന്നിലെ കഥ...!

ഇന്ന് ഏപ്രിൽ ഒന്ന്. ലോകവിഡ്ഢിദിനം. ലോകം മുഴുവൻ ഇന്ന് വിഡ്ഢിദിനം ആഘോഷിക്കുന്നു. നിരുപദ്രവകരമായ തമാശകളും കുസൃതികളുമൊക്കെയായാണ് വിഡ്ഢിദിനം ആഘോഷിക്കുന്നത്. ചിലപ്പോഴെല്ലാം ഈ തമാശകൾ അതിരുവിട്ടുപോകാറും ഉണ്ട് എന്നത് സത്യമാണ്. വ്യാജവാർത്തകൾ പോലും ഏപ്രിൽ ഫൂളിന്റെ മറവിൽ ലോകം മുഴുവൻ പടച്ചുവിടപ്പെടാറും ഉണ്ട്.

Add Zee News as a Preferred Source

വിഡ്ഢിദിനത്തിന്റെ കഥ........

യൂറോപ്യൻമാരാണ് ആദ്യമായി വിഡ്ഢിദിനം ആഘോഷിക്കാനായി തുടങ്ങിയതെന്നാണ് ചരിത്രം. ഈ ആചാരം ലോകത്തിന്റെ വിവിധ 
ഭാഗങ്ങളിലേക്ക് എത്തിച്ചതും യൂറോപ്യൻമാർ തന്നെയാണ്. യഥാർത്ഥത്തിൽ ഒരു കലണ്ടർ മാറ്റം വരുത്തിവെച്ച വിനയാണ് വിഡ്ഢിദിനം എന്നാണ് ചരിത്രകാരൻമാർ പറയുന്നത്. ജൂലിയൻ കലണ്ടർ പ്രകാരം ഏപ്രിൽ ഒന്നാം തീയതിയായിരുന്നു ന്യൂയർ ആഘോഷിച്ചിരുന്നത്. ജൂലിയൻ കലണ്ടറിൽ നിന്ന് ഗ്രിഗോറിയൻ കലണ്ടറിലേക്ക് മാറിയപ്പോൾ ജനുവരി ഒന്ന് പുതുവത്സരമായി മാറി. 

1582ൽ ഫ്രാൻസിലായിരുന്നു ആ കലണ്ടർ മാറ്റം. അക്കാലത്ത് മാർപാപ്പ പോപ് ഗ്രിഗറി പതിമൂന്നാമൻ പഴയ കലണ്ടർ പരിഷ്‌കരിച്ച് ഗ്രിഗോറിയൻ കലണ്ടർ തുടങ്ങിയത്. വാർത്താ വിനിമയ ഉപാധികൾ വളരെ കുറവായ അന്നത്തെ പരിഷ്‌കാരങ്ങൾ പലരും അറിഞ്ഞില്ല. രാജപരിഷ്‌കാരങ്ങൾ ജനങ്ങളിലെത്താൻ ഒരുപാട് സമയമെടുത്തു. കലണ്ടർ മാറ്റമറിയാതെ പിന്നെയും ചിലർ ഏപ്രിൽ ഒന്നിന് തന്നെ പുതുവത്സരം ആഘോഷിച്ചു. ഇവരെ 'മണ്ടൻമാർ' എന്നു വിളിക്കാൻ തുടങ്ങി. അതു മാത്രവുമല്ല, പുത്തൻ പരിഷ്‌കാരങ്ങൾ ഉൾക്കൊള്ളാൻ തയ്യാറാവാത്തവരെയും കൂടി പരിഹസിക്കാൻ വേണ്ടിയാണ് ഏപ്രിൽ ഒന്നിന് വിഡ്ഢി ദിനം ആഘോഷിച്ചു തുടങ്ങിയത്. അതിന്റെ ചുവടുപിടിച്ച് എല്ലാ വർഷവും ഏപ്രിൽ ഒന്നിന് പലരെയും കളിയാക്കാൻ തുടങ്ങി. അങ്ങനെ ഏപ്രിൽ ഒന്ന് 'വിഡ്ഢികളുടെ' ദിനമായി മാറി.

വിഡ്ഢിദിനത്തിന്റെ തുടക്കത്തെക്കുറിച്ച് പല കഥകളും ഉണ്ടെങ്കിലും ഏറെ പ്രചാരം കലണ്ടറിലെ മാറ്റവുമായി ബന്ധപ്പെട്ട കഥക്കാണ്.

വിവിധ രാജ്യങ്ങളിൽ ഈ ദിനം പല പേരുകളിൽ അറിയപ്പെടുന്നു. ഇംഗ്ലണ്ടിൽ നൂഡി, ജർമനിയിൽ ഏപ്രിന ഫ്രാൻസിൽ ഏപ്രിൽ ഫിഷ് എന്നിങ്ങനെ. ബ്രിട്ടീഷുകാരുടെ വരവോടെയാണ് ഇന്ത്യയിൽ ഈ ദിനം പ്രചാരത്തിൽ വന്നത്.