Kerala Trawling Ban: ഇന്ന് അർധരാത്രി മുതൽ ട്രോളിങ് നിരോധനം; ആഴക്കടൽ മത്സ്യബന്ധനം പാടില്ല, ചെറുവള്ളങ്ങൾക്ക് കടലിൽ പോകാം- നിബന്ധനകൾ ഇങ്ങനെ

Kerala Trawling Details: സംസ്ഥാനത്ത് 52 ദിവസത്തെ ട്രോളിങ് നിരോധനത്തിന് ഇന്ന് അർധരാത്രി മുതൽ തുടക്കമാകും.

തിരുവനന്തപുരം: ഇന്ന് അർധരാത്രി മുതൽ സംസ്ഥാനത്ത് ട്രോളിങ് നിരോധനം നിലവിൽ വരും. 52 ദിവസത്തേക്കാണ് കേരളത്തിൽ ട്രോളിങ് നിരോധിക്കുന്നത്. വലിയ ബോട്ടുകൾക്ക് ആഴക്കടൽ മത്സ്യബന്ധനം നടത്തുന്നതിന് വിലക്കുണ്ട്. വലിയ ബോട്ടുകൾ കടലിൽ ഇറക്കാൻ പാടില്ല. എന്നാൽ, പരമ്പരാ​ഗത മത്സ്യബന്ധനത്തിനും ചെറുബോട്ടുകൾക്കും വിലക്കില്ല.

Add Zee News as a Preferred Source

ചെറുവള്ളങ്ങൾക്ക് തീരത്ത് നിന്ന് 10 നോട്ടിക്കൽ മൈൽ ദൂരപരിധിയിൽ വരെ ചെന്ന് മീൻ പിടിക്കാം. നിയമവിരുദ്ധമായി മത്സ്യബന്ധനം നടത്തിയാൽ നിയമനടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകിയിട്ടുണ്ട്. നിയമലംഘനങ്ങൾക്ക് എതിരെ കർശന നടപടികളുണ്ടാകും. യന്ത്രവൽകൃത ബോട്ടുകൾക്ക് കടലിൽ പോകാനും മത്സ്യബന്ധനം നടത്താനും വിലക്കുണ്ട്.

ഇന്ന് അർധരാത്രി 12 മണിക്ക് മുൻപായി എല്ലാ ബോട്ടുകളും ഹാർബറിൽ എത്തിക്കണം. ട്രോളിങ് നിരോധനം അവസാനിക്കുന്ന ജൂലൈ 31ന് അർധരാത്രി 12 മണിക്ക് ശേഷമേ വീണ്ടും മത്സ്യബന്ധനത്തിനായി ബോട്ടുകൾ പുറപ്പെടാവൂ. കേരള തീരത്ത് മത്സ്യബന്ധം നടത്തുന്ന ഇതര സംസ്ഥാന ബോട്ടുകൾ ഇന്ന് രാത്രി 12 മണിക്ക് മുൻപായി കേരല തീരം വിടണമെന്നാണ് നിർദേശം.

ട്രോളിങ് നിരോധനം കൃത്യമായി നടപ്പിലാക്കാനും നിയമവിരുദ്ധ മത്സ്യബന്ധനം തടയാനും ആവശ്യമെങ്കിൽ കൂടുതൽ പോലീസ് സേനയെ വിന്യസിക്കുമെന്നും അധികൃതർ വ്യക്തമാക്കി. മത്സ്യബന്ധനത്തിന് ഉപയോ​ഗിക്കുന്ന എല്ലാ യാനങ്ങളിലും രജിസ്ട്രേഷൻ മാ‍ർക്ക് ഉണ്ടാകണം.

മത്സ്യബന്ധനത്തിനായി പുറപ്പെടുന്ന തൊഴിലാളികൾ തിരിച്ചറിയൽ രേഖ, ജീവൻരക്ഷാ ഉപകരണങ്ങൾ, ആവശ്യമായ ഇന്ധനം, ടൂൾ കിറ്റ് എന്നിവ വള്ളങ്ങളിൽ കരുതരണം. അനധികൃത മത്സ്യബന്ധനത്തിനെതിരെ കർശന നടപടിയുണ്ടാകുമെന്ന് അധികൃതർ അറിയിച്ചു.