Thrissur Pooram 2025 Updates: തൃശൂർ പൂരവുമായി ബന്ധപ്പെട്ട ചടങ്ങുകൾ
തൃശൂർ പൂരവുമായി ബന്ധപ്പെട്ട ചടങ്ങുകൾ\
മഠത്തിൽവരവ് പഞ്ചവാദ്യം
രാവിലെ 11:30ന് ബ്രഹ്മസ്വം മഠത്തിൽ മഠത്തിൽവരവ് പഞ്ചവാദ്യം. കോങ്ങാട് മധുവിൻ്റെ പ്രാമാണിത്വത്തിലാണ് മേളം.
ചെമ്പടമേളം
സ്വരാജ് റൗണ്ടിലെ പാറമേക്കാവ് ക്ഷേത്ര പരിസരത്ത് ഉച്ചയ്ക്ക് 12 മണിയോടെ ചെമ്പടമേളം. ശേഷം പാണ്ടിമേളം കൊട്ടി ഇലഞ്ഞിത്തറയിലേക്ക് എത്തും.
ഇലഞ്ഞിത്തറമേളം
വടക്കുന്നാഥ ക്ഷേത്രത്തിൻ്റെ പടിഞ്ഞാറേ നടയിൽ ഇലഞ്ഞിത്തറയിൽ ഉച്ചയ്ക്ക് രണ്ടരയ്ക്ക് പാറമേക്കാവ് വിഭാഗത്തിൻ്റെ പ്രധാനമേളമായ ഇലഞ്ഞിത്തറ മേളത്തിന് തുടക്കം. കിഴക്കൂട്ട് അനിയൻ മാരാരുടെ നേതതൃത്വത്തിലാണ് മേളം. 300 കലാകാരന്മാർ മേളത്തിൻ്റെ ഭാഗമാകും. നാലരയ്ക്ക് മേളം സമാപിക്കും.
തെക്കോട്ടിറക്കം
ഇലഞ്ഞിത്തറമേളം സമാപിക്കുന്നതോടെ തെക്കോട്ടിറക്കം നടക്കും. നാലേമുക്കാലോടെ തിരുവമ്പാടി വിഭാഗത്തിൻ്റെ മേളം ശ്രീമൂല സ്ഥാനത്ത് കലാശിച്ചു തെക്കേഗോപുരനടയിൽ എത്തും.
കുടമാറ്റം
തേക്കിൻകാട് മൈതാനത്ത് വൈകുന്നേരം അഞ്ചരയോടെ വർണക്കുടകൾ വാനിലുയരുന്ന കുടമാറ്റത്തിനായി തിരുവമ്പാടി, പാറമേക്കാവ് വിഭാഗങ്ങൾ 15 വീതം ആനകളുമായി അണിനിരക്കും. ഇരുട്ട് വീഴും വരെ കുടമാറ്റം തുടരും.
എഴുന്നള്ളിപ്പ്
രാത്രി 11 ന് പാറമേക്കാവ്, തിരുവമ്പാടി വിഭാഗങ്ങൾ പകൽ നടന്ന ചടങ്ങുകൾ ആവർത്തിക്കും. രാത്രി എട്ടുമുതൽ പുലർച്ചെ ഒന്നുവരെ ചെറുപൂരങ്ങൾ വീണ്ടും പൂരപ്പറമ്പിൽ എത്തും, തുടർന്ന് മടങ്ങും. പിന്നീട് ഇരു വിഭാഗങ്ങളുടെയും എഴുന്നള്ളിപ്പ് നടക്കും. പാറമേക്കാവ് വിഭാഗത്തിൻ്റെ എഴുന്നള്ളിപ്പ് മണികണ്ഠനാലിലും തിരുവമ്പാടിയുടെ എഴുന്നള്ളിപ്പ് നായ്ക്കനാൽ പന്തലിലും അവസാനിക്കും.
പ്രധാന വെടിക്കെട്ട്
തേക്കിൻകാട് മൈതാനത്ത് പുലർച്ചെ മൂന്നിന് ആകാശത്ത് വർണവിസ്മയം തീർക്കുന്ന പ്രധാന വെടിക്കെട്ട്. തിരുവമ്പാടി വിഭാഗമാണ് ആദ്യം തീകൊളുത്തുക.
)
