കൊച്ചി: പാലാ ഉപതിരഞ്ഞെടുപ്പില്‍ യുഡിഎഫ് സ്ഥാനാര്‍ഥി ആരെന്നത് സംബന്ധിച്ച്‌ ഉചിതമായ തീരുമാനം ഉടന്‍ ഉണ്ടാകുമെന്നു മുന്‍ മുഖ്യമന്ത്രി ഉമ്മന്‍ ചാണ്ടി.
ഈ വിഷയത്തില്‍ മുന്നണിക്കുള്ളില്‍ തര്‍ക്കങ്ങളൊന്നുമില്ലെന്നും ചര്‍ച്ചകള്‍ അവസാനഘട്ടത്തിലാണെന്നും രണ്ട് ദിവസത്തിനകം തീരുമാനം ഉണ്ടാകുമെന്നും ഉമ്മന്‍ ചാണ്ടി കൂട്ടിച്ചേര്‍ത്തു. കൊച്ചിയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
സംസ്ഥാനത്ത് നടക്കാനിരിക്കുന്ന 6 ഉപതിരഞ്ഞെടുപ്പുകള്‍ നേരിടുന്നതിനും യുഡിഎഫ് സുസജ്ജമാണെന്നും ഉമ്മന്‍ ചാണ്ടി പറഞ്ഞു.
കൂടാതെ, പാലായില്‍ ഉപതിരഞ്ഞെടുപ്പ് അടുത്തിരിക്കേ കേരള കോണ്‍ഗ്രസിനുള്ളിലെ തര്‍ക്കങ്ങള്‍ അവര്‍ തന്നെ പരിഹരിക്കുമെന്നാണ് പ്രതീക്ഷ‍യെന്നും അദ്ദേഹം പറഞ്ഞു. കേരള കോണ്‍ഗ്രസ് നേതാക്കള്‍ ആവശ്യപ്പെട്ടാല്‍ പ്രശ്നത്തില്‍ ഇടപെടുമെന്നും ഉമ്മന്‍ ചാണ്ടി അറിയിച്ചു.
