Patient Died in Kozhikode: ഗർഭപാത്രം നീക്കാൻ ശസ്ത്രക്രിയ, കുടലിന് മുറിവേറ്റു; കോഴിക്കോട് മെഡിക്കൽ കോളജിൽ രോഗി മരിച്ചു

​ഗർഭപാത്രം നീക്കം ചെയ്യാനുള്ള ശസ്ത്രക്രിയയ്ക്ക് ശേഷമാണ് വിലാസിനിയുടെ ആരോ​ഗ്യം വഷളാകുകയും മരണം സംഭവിക്കുകയും ചെയ്തത്.

കോഴിക്കോട്: കോഴിക്കോട് മെഡിക്കൽ കോളജിൽ ചികിത്സാ പിഴവിനെ തുടർന്ന് രോ​ഗി മരിച്ചതായി പരാതി. പേരാമ്പ്ര സ്വദേശി വിലാസിനി (57) ആണ് മരിച്ചത്. ഇന്നു പുലർച്ചെയോടെയാണ് മരണം സംഭവിച്ചത്. ഗർഭപാത്രം നീക്കുന്നതിന് ഇവർ ശസ്ത്രക്രിയ നടത്തിയിരുന്നു. ഈ ശസ്ത്രക്രിയയ്ക്കിടെ കുടലിന് മുറിവേറ്റുവെന്നും ഇതാണ് മരണകാരണമെന്നുമാണ് ബന്ധുക്കൾ ആരോപിക്കുന്നത്. 

Add Zee News as a Preferred Source

മാർച്ച് നാലിനാണ് ശസ്ത്രക്രിയയ്ക്കായി വിലാസിനിയെ ആശുപത്രിയിൽ പ്രവേശിപ്പിച്ചത്. തുടർന്ന് ഏഴാം തിയതി ശസ്ത്രക്രിയ നടത്തി. ശസ്ത്രക്രിയയ്ക്കിടെ ഇവരുടെ കുടലിന് ചെറിയ മുറിവേറ്റതായി ഡോക്ടർമാർ അറിയിക്കുകയും ചെയ്തു. തുന്നലുണ്ടെന്നും പേടിക്കേണ്ട കാര്യമില്ലെന്നുമാണ് ഡോക്ടർമാർ അറിയിച്ചത്. പിന്നീട് മാർച്ച് 8ന് വാർഡിലേക്ക് മാറ്റുകയും ചെയ്തു. ഞായാറാഴ്ച മുതൽ വിലാസിനിക്ക് സാധാരണ ഭക്ഷണം കൊടുക്കാമെന്നും ഡോക്ടർമാർ അറിയിച്ചു.

എന്നാൽ ഭക്ഷണം കഴിക്കാൻ തുടങ്ങിയതോടെ വിലാസിനിക്ക് വയറുവേദന കൂടിയതോടെ ഐസിയുവിലേക്ക് മാറ്റി. അണുബാധയുണ്ടായെന്നും വീണ്ടും ശസ്ത്രക്രിയ വേണമെന്ന് അധികൃതർ പറഞ്ഞു. എന്നാൽ ശസ്ത്രക്രിയ നടത്തിയെങ്കിലും ചൊവ്വാഴ്ചയോടെ ആരോഗ്യം വഷളാകുകയും പുലർച്ചെയോടെ മരണം സംഭവിക്കുകയുമായിരുന്നു. മെഡിക്കൽ കോളജിൽ നിന്ന് മറ്റൊരു ആശുപത്രിയിലേക്ക് മാറ്റാൻ ശ്രമിച്ചിരുന്നുവെന്നും  ആരോഗ്യം വഷളായതിനാൽ അതിന്  സാധിച്ചില്ലെന്നും ബന്ധുക്കൾ അറിയിച്ചു.

ഹൃദയസ്തംഭനം മൂലമാണ് മരണം സംഭവിച്ചതെന്നാണ് ആശുപത്രി അധികൃതർ അറിയിച്ചതെന്ന് ബന്ധുക്കൾ പറഞ്ഞു. അതേസമയം സംഭവത്തിൽ ആശുപത്രി അധികൃതർ പ്രതികരിച്ചിട്ടില്ല.