Question Paper Leaked: `ചോദ്യപേപ്പർ ചോർച്ച അതീവ ഗൗരവമുള്ളത്`; യൂട്യൂബ് ചാനലുകൾക്കെതിരെ കർശന നടപടിയെന്ന് വിദ്യാഭ്യാസ മന്ത്രി

തിരുവനന്തപുരം: ചോദ്യപേപ്പർ ചോർച്ച സ്ഥിരീകരിച്ച് വിദ്യാഭ്യാസ മന്ത്രി വി ശിവൻകുട്ടി. പ്ലസ് വൺ കണക്കിന്റെയും എസ്എസ്എൽസി ഇം​ഗ്ലീഷിന്റെയും ക്രിസ്മസ് പരീക്ഷ ചോദ്യപേപ്പറുകളാണ് ചോർന്നത്. 

ഇത് പൊതു വിദ്യാഭ്യാസത്തോടുള്ള വെല്ലുവിളിയാണെന്ന് മന്ത്രി പറഞ്ഞു. ഇപ്പോഴുള്ളത് ​ഗൗരവമുള്ള ആരോപണം. ഡിജിപിക്കും സൈബ‍‍ർ പൊലീസിനും പരാതി നൽകിയിട്ടുണ്ട്. കുറ്റവാളികളെ നിയമത്തിന് മുന്നിൽ കൊണ്ടുവരുമെന്നും മന്ത്രി പറഞ്ഞു. 

ചോദ്യ പേപ്പർ ചോർത്തിയവർക്കെതിരെയും പ്രചരിപ്പിച്ച യൂട്യൂബ് ചാനലുകൾക്കെതിരെയും കർശന നടപടി എടുക്കുമെന്ന് മന്ത്രി വ്യക്തമാക്കി. സ്വകാര്യ ട്യൂഷൻ സെന്ററിൽ ജോലി ചെയ്യുന്ന അധ്യാപകരുടെ വിവരങ്ങൾ ശേഖരിക്കുമെന്നും മന്ത്രി കൂട്ടിച്ചേർത്തു. 

'ചോദ്യമിടുന്നവരും വിതരണം ചെയ്യുന്നവരും അറിയാതെ ചോ‍ർച്ച ഉണ്ടാകില്ല. ചോദ്യപേപ്പർ പ്രസിദ്ധീകരിച്ച യൂട്യൂബ് ചാനലുകൾക്കെതിരെ നടപടിയുണ്ടാകും.സ്വകാര്യ ട്യൂഷൻ സെന്ററിൽ ജോലി ചെയ്യുന്ന പൊതുവിദ്യാഭ്യാസ വകുപ്പിലെ അധ്യാപകരുടെ വിവരങ്ങൾ ശേഖരിക്കും.അവരിലേക്കും അന്വേഷണം ഉണ്ടാകും.ചോർന്ന പരീക്ഷകൾ വീണ്ടും നടത്തുന്നതിൽ പിന്നീട്  തീരുമാനം ഉണ്ടാകും

.ഇപ്പോഴത്തെ പരീക്ഷ കുട്ടികളുടെ ഭാവിയെ മാത്രം ബാധിക്കുന്ന കാര്യമല്ല. സ്വകാര്യ ട്യൂഷന്‍ എടുക്കുന്നതിൽ അധ്യാപകർക്ക് നിലവിൽ നിയന്ത്രണം ഉണ്ട്. പലർക്കും എതിരെ നടപടി എടുത്തിട്ടുണ്ട്.  ഈ കണക്കുകൾ പിന്നീട് പുറത്ത് വിടുമെന്നും വിദ്യാഭ്യാസ മന്ത്രി വ്യക്തമാക്കി.