ന്യൂഡല്‍ഹി: സിപിഎം പ്രവര്‍ത്തകരാല്‍ കൊല്ലപ്പെട്ട കണ്ണൂര്‍ മട്ടന്നൂര്‍ ബ്ലോക്ക് യൂത്ത് കോണ്‍ഗ്രസ് കമ്മിറ്റി ജനറല്‍ സെക്രട്ടറി ഷുഹൈബിന്‍റെ പിതാവ് സി. പി മുഹമ്മദിനെ ഫോണില്‍ വിളിച്ചാശ്വസിപ്പിച്ച് കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി.
എന്ത് ആവശ്യത്തിനും തന്‍റെ ഓഫീസുമായി ബന്ധപ്പെടാമെന്നും ഏത് കാര്യത്തിനും പ്രസ്ഥാനം കൂടെ ഉണ്ടാകുമെന്നും ധീരനായ ശുഹൈബിന്‍റെ ഓര്‍മ്മകള്‍ പുതിയ തലമുറക്ക് ആവേശമാണെന്നും രാഹുല്‍ ഗാന്ധി പറഞ്ഞു.
വ്യാഴാഴ്ച വൈകുന്നേരം 6.15ഓടെ കീഴല്ലൂര്‍ മണ്ഡലം യൂത്ത് കോണ്‍ഗ്രസ് പ്രസിഡണ്ട് നിസ്സാമിന്‍റെ ഫോണിലേക്ക് വിളിച്ചാണ് ഷുഹൈബിന്‍റെ പിതാവിനോട് അദ്ദേഹം സംസാരിച്ചത്.
ശുഹൈബിന്‍റെ വിയോഗം ഒരു നാടിന്‍റെ പ്രതീക്ഷകളെയാണ് ഇല്ലാതാക്കിയതെന്നും കുടുംബത്തിന്‍റെ ദുഃഖത്തില്‍ താനും കോണ്‍ഗ്രസ് പ്രസ്ഥാനവും പങ്കു ചേരുന്നതായും രാഹുല്‍ ഗാന്ധി കൂട്ടിച്ചേര്‍ത്തു.
