ന്യൂഡല്ഹി: കോണ്ഗ്രസ് നേതാവും വയനാട് എംപിയുമായ രാഹുല് ഗാന്ധി ബുധനാഴ്ച കേരളത്തില് എത്തും.
വയനാട് എംപിയായ അദ്ദേഹം മണ്ഡലത്തില് വിവിധ പരിപാടികളില് പങ്കെടുക്കുമെന്നാണ് റിപ്പോര്ട്ട്.
കോണ്ഗ്രസ് ബൂത്തു തല പ്രവര്ത്തകരുടെ യോഗത്തിലും എംപി സംബന്ധിക്കും. റിപ്പോര്ട്ട് അനുസരിച്ച് ബത്തേരി സര്വജന സ്കൂളില് പാമ്പ് കടിയേറ്റു മരിച്ച ഷഹ്ല ഷെറിന്റെ വീട്ടില് രാഹുല് സന്ദര്ശനം നടത്തുമെന്നാണു സൂചന.
അതേസമയം, ഷഹ്ലയുടെ മരണത്തെതുടര്ന്ന്, മണ്ഡലത്തിലെ സര്ക്കാര് സ്കൂളില് ഒരു വിദ്യാര്ഥിനി പാമ്പുകടിയേറ്റ് മരിച്ചിട്ട് എംപി തിരിഞ്ഞുനോക്കിയില്ല എന്ന പരാതി വയനാട് മണ്ഡലത്തില് ഉയര്ന്നിരുന്നു.
കൂടാതെ, രാഹുല് ഗാന്ധിയുടെ തിരോധാനം അന്വേഷിക്കണമെന്ന് ആവശ്യപ്പെട്ട് പോലീസില് പരാതിയും എത്തിയിരുന്നു.
നിലമ്പൂര് പോലീസിലാണ് പരാതി എത്തിയത്.
യുവമോര്ച്ച സംസ്ഥാന സെക്രട്ടറി സന്ദീപ് വാര്യരാണ് ഇക്കാര്യം ഫേസ്ബുക്ക് പോസ്റ്റിലൂടെ അറിയിച്ചത്. വയനാട് എംപി രാഹുല് ഗാന്ധിയുടെ തിരോധാനം അന്വേഷിക്കണമെന്നാവശ്യപ്പെട്ട് വയനാട് മണ്ഡലത്തിലെ വോട്ടറും യുവമോര്ച്ച സംസ്ഥാന സെക്രട്ടറിയുമായ അജി തോമസാണു നിലമ്പൂര് പോലീസില് പരാതി നല്കിയത്. നിലമ്പൂര് പോലീസ് പരാതി സ്വീകരിച്ച് അന്വേഷണം ആരംഭിച്ചെന്നും പറയപ്പെടുന്നു.
തുടര്ന്ന്, ഡിസംബര് ആദ്യവാരം രാഹുല്ഗാന്ധി വയനാട്ടിലെത്തുമെന്ന വാര്ത്തകള് പുറത്തു വന്നിരുന്നു.