തിരുവനന്തപുരം: ചൊവ്വാഴ്ച നടക്കുന്ന ലോക്സഭാ തിരഞ്ഞെടുപ്പിനോട് അനുബന്ധിച്ച് സംസ്ഥാനത്തെ എല്ലാ പോളിംഗ് ബൂത്തുകളിലും പരിസരങ്ങളിലും സുരക്ഷ ശക്തിപ്പെടുത്തിയതായി ഡിജിപി ലോകനാഥ് ബെഹ്റ.
പ്രശ്നബാധിത മേഖലകളില് റിസര്വില് ഉള്ള പൊലീസ് സംഘങ്ങളെ പോളിംഗ് ബൂത്തിന് സമീപം റോന്ത് ചുറ്റാന് നിയോഗിക്കുംമെന്നും ഡിജിപി പറഞ്ഞു.
തിരഞ്ഞെടുപ്പ് തടസ്സപ്പെടുത്തുക എന്ന ലക്ഷ്യത്തോടെ കൂട്ടം കൂടി നില്ക്കുകയും സംഘര്ഷം ഉണ്ടാക്കാന് ശ്രമിക്കുകയും ചെയ്യുന്നവര്ക്ക് എതിരെ കര്ശനനടപടി സ്വീകരിക്കാനും കര്ശന നിര്ദ്ദേശം നല്കിയിട്ടുണ്ട്. കൂടാതെ, ക്യാമറ സംഘങ്ങള് നിരീക്ഷണം നടത്താത്ത പ്രശ്നബാധിത സ്ഥലങ്ങളില് നിന്ന് വീഡിയോ ദൃശ്യങ്ങള് പകര്ത്താന് പ്രത്യേക സംഘങ്ങളെ നിയോഗിച്ചിട്ടുണ്ട്. ഇടുങ്ങിയതും എത്തിപ്പെടാന് ബുദ്ധിമുട്ടുള്ളതുമായ സ്ഥലങ്ങളില് ഇരുചക്രവാഹനങ്ങളില് പൊലീസ് സംഘം പട്രോളിംഗ് നടത്തും.
വനിതാ വോട്ടര്മാര്ക്ക് സ്വതന്ത്രമായും നിര്ഭയമായും വോട്ട് ചെയ്യാന് അവസരം ഒരുക്കുന്നതിനായി 3500 ലേറെ വനിതാ പൊലീസുകാരെയാണ് ഇത്തവണ നിയോഗിച്ചിരിക്കുന്നത്. അതുകൂടാതെ, വനിത വോട്ടരമാരെ ഭയപ്പെടുത്തുകയോ ശല്യം ചെയ്യുകയോ ചെയ്താല് കര്ശന നടപടിയെടുക്കാനാണ് നിര്ദ്ദേശം.
അടിയന്തിര സാഹചര്യങ്ങള് നേരിടുന്നതിന് ആവശ്യമെങ്കില് സജ്ജരായിരിക്കാന് മുതിര്ന്ന പൊലീസ് ഓഫീസര്മാര്ക്ക് നിര്ദ്ദേശം നല്കിയിട്ടുണ്ട്.