Thamarassery Murder: താമരശ്ശേരി കൊലപാതകം; യാസർ ഉമ്മയെ കൊന്ന ആഷിഖിൻ്റെ സുഹൃത്ത്, ഭാര്യയെ കൊന്നത് സ്വബോധത്തോടെ

Shibila Murder Case: ചൊവ്വാഴ്ച രാത്രി 7.10ന് കാറിൽ ഷിബിലയുടെ വീട്ടിലെത്തിയ യാസിർ വീട്ടിലേക്ക് അതിക്രമിച്ചു കയറി ഭാര്യയെ കൊലപ്പെടുത്തുകയായിരുന്നു. തടയാൻ ശ്രമിച്ച ഷിബിലയുടെ പിതാവ് അബ്ദുറഹ്മാൻ (48), മാതാവ് ഹസീന (44) എന്നിവർക്കും വെട്ടേറ്റു.

കോഴിക്കോട്: താമരശേരിയിൽ ഭാര്യയെ കുത്തിക്കൊലപ്പെടുത്തിയ യാസർ സ്വന്തം അമ്മയെ കഴുത്തറുത്ത് കൊലപ്പെടുത്തിയ ആഷിഖിന്റെ സുഹൃത്ത്. ഇരുവരും ഒന്നിച്ച് നിൽക്കുന്ന ചിത്രങ്ങൾ പുറത്ത് വന്നു. താമരശേയിൽ തന്നെയാണ് സ്വന്തം ഉമ്മയെ കഴുത്തറുത്തു കൊലപ്പെടുത്തിയ സംഭവവും ഉണ്ടായത്. ഇരുവരും അടുത്ത സുഹൃത്തുക്കളാണെന്നാണ് സൂചന.

ഫെബ്രുവരി 18ന് ആണ് ആ കൊലപാതകം നടന്നത്. അസുഖബാധിതയായി സഹോദരിയുടെ വീട്ടിൽ കഴിയുകയായിരുന്ന കായിക്കൽ സുബൈദ (52) ആണ് മകൻ ആഷിഖിന്റെ (25) വെട്ടേറ്റ് മരിച്ചത്. മൂന്ന് വയസുകാരി മകൾ സെന്നുവിന് പെരുന്നാളിന് വസ്ത്രം വാങ്ങി വരാമെന്ന് പറഞ്ഞുപോയ യാസിർ ആയുധവുമായി തിരികെയെത്തി ഭാര്യ ഷിബിലയെ (23) വെട്ടിക്കൊലപ്പെടുത്തുകയായിരുന്നു.

ഷിബിലയും യാസിറും 2020ൽ ആണ് വിവാഹിതരായത്. തുടർന്ന് അടിവാരത്തെ വാടകവീട്ടിലായിരുന്നു താസമം. മൂന്ന് മാസം മുൻപ് ഷിബില ഈങ്ങാപ്പുഴയിലെ കക്കാട്ടെ സ്വന്തം വീട്ടിലേക്ക് തിരിച്ചു വന്നു. ലഹരിക്ക് അടിമയായ യാസിറിന്റെ ഉപദ്രവത്തെ തുടർന്നാണ് ഷിബില തിരിച്ചുവന്നതെന്നാണ് സൂചന. തിരികെ ചെന്നില്ലെങ്കിൽ കൊല്ലുമെന്ന് യാസിർ ഷിബിലയെ ഭീഷണിപ്പെടുത്തിയിരുന്നതായും പറയുന്നു.

ചൊവ്വാഴ്ച രാത്രി 7.10ന് കാറിൽ ഷിബിലയുടെ വീട്ടിലെത്തിയ യാസിർ വീട്ടിലേക്ക് അതിക്രമിച്ചു കയറി ഭാര്യയെ കൊലപ്പെടുത്തുകയായിരുന്നു. തടയാൻ ശ്രമിച്ച ഷിബിലയുടെ പിതാവ് അബ്ദുറഹ്മാൻ (48), മാതാവ് ഹസീന (44) എന്നിവർക്കും വെട്ടേറ്റു. അബ്ദുറഹ്മാന്റെ പരിക്ക് ​ഗുരുതരമാണ്. ഷിബില സംഭവസ്ഥലത്ത് വച്ചുതന്നെ മരിച്ചതായാണ് വിവരം.