Tiger Attack: ദൗത്യസംഘത്തെ ആക്രമിക്കാനാഞ്ഞപ്പോൾ വെടിവച്ചു; ഇടുക്കിയിൽ ജനവാസ മേഖലയിൽ ഇറങ്ങിയ കടുവ ചത്തു

Idukki Tiger Attack: മയക്കുവെടി വച്ച് പിടികൂടാൻ ശ്രമിക്കുന്നതിനിടെ കടുവ വനംവകുപ്പ് ഉദ്യോ​ഗസ്ഥരെയും ആക്രമിക്കാൻ ശ്രമിച്ചു.

ഇടുക്കി: ഇടുക്കി വണ്ടിപ്പെരിയാർ ​ഗ്രാമ്പിയിലെ ജനവാസ മേഖലയിൽ നിന്ന് ദൌത്യ സംഘം പിടികൂടിയ കടുവ ചത്തു. ജനവാസ മേഖലയിലിറങ്ങി വളർത്തുമൃഗങ്ങളെ കൊന്ന കടുവ ദൗത്യത്തിനിടെ വനംവകുപ്പ് ഉദ്യോ​ഗസ്ഥരെയും ആക്രമിക്കാൻ ശ്രമിച്ചു.

ദൌത്യത്തിനിടെ വനംവകുപ്പ് ഉദ്യോഗസ്ഥർക്ക് നേരെ ചാടിയ കടുവയെ ദൌത്യസംഘം വെടിവച്ചിരുന്നു. ഇടുക്കിയിൽ ജനവാസ മേഖലയിൽ ഇറങ്ങിയ കടുവ വളർത്തുമ‍‍‍ൃ​ഗങ്ങളെ കൊന്നിരുന്നു. പശുവിനെയും നായയെയുമാണ് കടുവ കൊന്നത്.

ഇന്ന് രാവിലെ അരണക്കല്ലിലെത്തിയ കടുവ വളർത്തുമൃ​ഗങ്ങളെ ആക്രമിച്ച് കൊല്ലുകയായിരുന്നു. വെറ്ററിനറി ഡോക്ടർ അനുരാജിന്റെ നേതൃത്വത്തിലുള്ള വിദ​ഗ്ധ സംഘമാണ് കടുവയെ മയക്കുവെടി വച്ച് പിടികൂടിയത്.

ആദ്യം മയക്കുവെടിയേറ്റെങ്കിലും കടുവ മയങ്ങാൻ സമയമെടുത്തു. ഇതിന് ശേഷം രണ്ടാമത് മയക്കുവെടിവച്ച സമയത്ത് കടുവ ദൌത്യസംഘത്തിന് നേരെ പാഞ്ഞടുത്തു. കടുവയുടെ അടിയേറ്റ് ഒരു ഉദ്യോഗസ്ഥൻറെ ഹെൽമറ്റും ഇവരുടെ ഷീൽഡും തകർന്നു. ഇതോടെ കടുവയ്ക്ക് നേരെ വെടിയുതിർക്കുകയായിരുന്നു.