Allu Arjun Arrest:പുഷ്പ 2 പ്രീമിയർ ഷോക്കിടെ അപകടമരണം; അല്ലു അർജുൻ അറസ്റ്റിൽ

പുഷ്പ 2 വിന്റെ റിലീസിനിടയിലുണ്ടായ അപകട മരണവുമായി ബന്ധപ്പെട്ടാണ് നടൻ അല്ലു അർജുൻ അറസ്റ്റിൽ. ജൂബിലി ഹിൽസിലെ വസതിയിൽ നിന്നാണ് ഹൈദരാബാദ് പൊലീസ് നടനെ അറസ്റ്റ് ചെയ്തത്.  

പ്രീമിയർ ഷോയ്ക്ക് എത്തിയ അല്ലു അർജുനെ കാണാൻ വലിയ തിരക്കനുഭവപ്പെട്ടിരുന്നു. ഇതിനിടയിൽ പെട്ടാണ് ഹൈദരാബാദ് ദിൽഷുക്നഗർ സ്വദേശിനി രേവതി (39) മരിച്ചത്. സംഭവത്തിൽ നടനെതിരെ മനപൂർവ്വമല്ലാത്ത നരഹത്യയ്ക്ക് കേസെടുത്തിരുന്നു.

അപകട മരണത്തിൽ നേരത്തെ തിയറ്റ‍ർ ഉടമ ഉൾപ്പെടെ മൂന്ന് പേരെ അറസ്റ്റ് ചെയ്തിരുന്നു. നടൻ തിയറ്ററിലെത്തുമെന്ന് അറിയാമായിരുന്നിട്ടും വിവരം പൊലീസിനെ അറിയിച്ചില്ല, ജനക്കൂട്ടത്തെ നിയന്ത്രിക്കുന്നതിൽ വീഴ്ച പറ്റിയെന്നിവയായിരുന്നു കുറ്റങ്ങൾ.

ഭർത്താവിനും മക്കൾക്കുമൊപ്പമാണ് രേവതി പ്രീമിയർ ഷോ കാണാൻ എത്തിയത്. തിക്കിലും തിരക്കിലും പെട്ട് വീണ് പോയ ഇവർക്ക് പോലീസ് ഉദ്യോഗസ്ഥർ അടക്കം എത്തി സിപിആർ നൽകിയെങ്കിലും ജീവൻ രക്ഷിക്കാനായില്ല. രാത്രി 11 മണിക്ക് ഉള്ള പ്രീമിയർ കാണാൻ അല്ലു അർജുൻ എത്തുമെന്ന് അവസാന നിമിഷമാണ് വിവരം ലഭിച്ചത്. ഇതോടെ തിയേറ്ററിലേക്ക് ജനപ്രവാഹമായിരുന്നു.

രേവതിയുടെ മരണത്തെ തുടർന്ന് ഭർത്താവ് ഭാസ്കർ തിയറ്റർ മാനേജ്മെന്റിനെതിരെയും അല്ലു അർജുന്റെ സുരക്ഷാ സംഘത്തിനെതിരെയും പരാതി കൊടുത്തിരുന്നു.  സംഭവത്തിൽ നിർമാതക്കളായ മൈത്രി മൂവി മേക്കേഴ്സും അല്ലു അർജുനും ഖേ​ദം പ്രകടിപ്പിച്ചിരുന്നു.