 "Bigg Boss Malayalam Season7: ബിഗ് ബോസ് ടീസർ കണ്ടോ? ഇത്തവണത്തെ വീടിന് ഒരു പ്രത്യേകതയുണ്ട്; കാത്തിരിക്കാം ഓഗസ്റ്റ് 3 വരെ...")
ബിഗ് ബോസ് സീസൺ 7 തുടങ്ങാൻ ഇനി വളരെ കുറച്ച് ദിവസം മാത്രമാണുള്ളത്. മത്സരാർത്ഥികൾ ആരൊക്കെ എന്നതിന്റെ പ്രവചനങ്ങൾ ഇപ്പോഴും സോഷ്യൽ മീഡിയകളിൽ നിറയുകയാണ്. ആരുടെയൊക്കെ പ്രഡിക്ഷൻ ലിസ്റ്റാകും യാഥാർത്ഥ്യമാകുക എന്ന് വരുന്ന ഓഗസ്റ്റ് 3ന് അറിയാൻ സാധിക്കും. ആ ദിവസമാണ് ഏഴാം സീസണിന്റെ ഗ്രാൻഡ് ലോഞ്ച് നടക്കുന്നത്. വളരെ വർണാഭമായ ഇവന്റ് ആയിരിക്കും ഇത് എന്നതിൽ സംശയമില്ല. മത്സരാർത്ഥികൾ ആരൊക്കെ എന്ന കാര്യത്തിൽ മാത്രമെ സംശയമുള്ളൂ....
ബിഗ് ബോസിന്റെ ഇത്തവണത്തെ സീസണ് ഒരു പ്രത്യേകത കൂടിയുണ്ട്. എന്താണെന്നല്ലേ? അത് മറ്റൊന്നുമല്ല. ഇത്തവണ മലയാളം ബിഗ് ബോസിന് സ്വന്തമായി ഒരു വീട് ഒരുങ്ങിയിരിക്കുകയാണ്. ഇത്രയും നാളും ബിഗ് ബോസ് തമിഴ്, ബിഗ് ബോസ് മറാത്തി എന്നിവയുടെയെല്ലാം സെറ്റുകളിലാണ് മലയാളം ബിഗ് ബോസ് നടന്നിരുന്നത്. ആരാധകർക്കിടയിൽ ഇത് ഏറെ വിമർശനങ്ങൾക്ക് വഴിവെച്ചിരുന്നു. കൂടാതെ ബിഗ് ബോസ് ക്രൂവിന് ലോജിസ്റ്റിക് ചലഞ്ചസും നിരവധിയായിരുന്നു.
അതുകൊണ്ട് തന്നെ ഇത്തവണ ബിഗ് ബോസ് മലയാളത്തിന് വേണ്ടി പ്രത്യേകം രൂപകൽപന ചെയ്ത ഒരു വീട് ഒരുങ്ങിയിരിക്കുകയാണ്. ചെന്നൈ ഇവിപി ഫിലിം സിറ്റിയിലാണ് സീസണ് 7ന് വീടൊരുങ്ങിയിരിക്കുന്നത്. വളരെ മനോഹരമായ ഒരു വീഡിയോ പങ്കുവെച്ച് കൊണ്ടാണ് അണിയറക്കാർ ഈ വിവരം പ്രേക്ഷകരെ അറിയിച്ചത്. ഒരു സാൻഡ് ആർട്ട് വീഡിയോ ആണ് പുറത്തുവിട്ടത്. ഇതിൽ മോഹൻലാലും ബിഗ് ബോസും തമ്മിലുള്ള വോയ്സ്ഓവർ സംഭാഷണവും ഉൾക്കൊള്ളുന്നുണ്ട്.
ബിഗ് ബോസ് നമുക്ക് സ്വന്തമായി ഒരു വീട് പണിയണം എന്ന് മോഹൻലാൽ പറയുന്നതിൽ നിന്നാണ് വീഡിയോ തുടങ്ങുന്നത്. വാടക വീട്ടിൽ കിടന്ന് മടുത്തുവെന്ന് ബിഗ് ബോസും മറുപടി പറയുന്നുണ്ട്. വലിപ്പമുള്ള വീട്, ഗംഭീരമായ ഒരു ലേഔട്ട്, വിശാലമായ പൂന്തോട്ടം, ഒരു വലിയ അടുക്കള, ആഡംബരപൂർണ്ണമായ സ്വീകരണമുറി, സുഖപ്രദമായ ഒരു കിടപ്പുമുറി എന്നിവയെല്ലാം അടങ്ങുന്നതായിരിക്കണം വീട് എന്നാണ് മോഹൻലാൽ ആവശ്യപ്പെടുന്നത്. വീട്ടിൽ ഒരു കുമ്പസാര കൂട് കൂടി ആയാലോ എന്ന് ബിഗ് ബോസ് ചോദിക്കുമ്പോൾ ആയിക്കോട്ടെ എന്ന് മോഹൻലാൽ മറുപടി പറഞ്ഞ് നിർത്തുകയാണ്. ടീസർ ഇതിനോടകം ശ്രദ്ധ നേടിക്കഴിഞ്ഞു. ഈ ടീസർ കൂടി പുറത്തിറങ്ങിയതോടെ പ്രേക്ഷകരുടെ ആവേശം വാനോളം ഉയർന്നിരിക്കുകയാണ്.
ബിഗ് ബോസ് മലയാളം സീസൺ 7 ഓഗസ്റ്റ് 3 ന് പ്രീമിയർ ചെയ്യും. എല്ലാ തവണത്തെയും പോലെ തന്നെ സാധാരണക്കാരും സെലിബ്രിറ്റികളും എല്ലാം അടങ്ങുന്ന മത്സരാർത്ഥി നിര തന്നെയാകും ഇത്തവണയും. അനുമോൾ, അപ്പാനി ശരത്, ആദിത്യൻ ജയൻ, രേണു സുധി തുടങ്ങി നിരവധി ആളുകളുടെ പേരുകളാണ് യൂട്യൂബർമാർ പ്രവചിക്കുന്നത്. ഓഗസ്റ്റ് മൂന്നിനറിയാം ഇവരിൽ ആരൊക്കെയാണ് ബിഗ് ബോസ് വീട്ടിലേക്ക് എത്തുകയെന്ന്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.
ഞങ്ങളുടെ സോഷ്യൽ മീഡിയ പേജുകൾ സബ്സ്ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല് സബ്സ്ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.
)